రాయలసీమ న్యూస్, వై.యస్.ఆర్: కడప, సెప్టెంబర్ 16: కడప జిల్లాలోని హోటళ్లు, రెస్టారెంట్లు, కేఫ్లు తదితర ఆహార సరఫరా సంస్థల్లో వినియోగదారుల నుంచి తప్పనిసరిగా సర్వీస్ ఛార్జీ వసూలు చేయరాదని జిల్లా కలెక్టర్ డా. శ్రీధర్ చెరుకూరి స్పష్టం చేశారు. వినియోగదారుల హక్కులను కాపాడేందుకు కేంద్ర వినియోగదారుల రక్షణ ప్రాధికార సంస్థ జారీ చేసిన నిబంధనలను సంబంధిత సంస్థలు తప్పనిసరిగా పాటించాలని ఆయన సూచించారు.
2022 జూలై 4న కేంద్ర వినియోగదారుల రక్షణ ప్రాధికార సంస్థ హోటళ్లు, రెస్టారెంట్లలో సర్వీస్ ఛార్జీ వసూలు విధానంపై స్పష్టమైన నిబంధనలు జారీ చేసిందని కలెక్టర్ తెలిపారు. ఈ నిబంధనలపై హోటళ్లు, రెస్టారెంట్లు, కేఫ్ల నిర్వాహకులకు అవగాహన కల్పించాలని సంబంధిత అధికారులను కేంద్రం ఆదేశించినట్లు ఆయన పేర్కొన్నారు. నిబంధనలు ఉల్లంఘించినట్లు గుర్తిస్తే తగిన చర్యలు తీసుకోవాలని కూడా ఆదేశాలు జారీ చేసినట్లు వివరించారు.
వినియోగదారులపై అనవసరమైన రుసుములు వేయకుండా, బిల్లింగ్లో పూర్తి పారదర్శకత పాటించాలని కలెక్టర్ సూచించారు. హోటళ్లు, రెస్టారెంట్లు తమ బిల్లుల్లో సర్వీస్ ఛార్జీని ముందుగానే కలిపి వసూలు చేయకూడదని తెలిపారు. వినియోగదారుడు స్వచ్ఛందంగా చెల్లిస్తే తప్ప సర్వీస్ ఛార్జీని ఎట్టి పరిస్థితుల్లోనూ తప్పనిసరి చేయరాదని స్పష్టం చేశారు.
సర్వీస్ ఛార్జీ పేరుతో కాకుండా ఇతర పేర్లతో వసూలు చేసినా, అది సర్వీస్ ఛార్జీగానే పరిగణించబడుతుందని కలెక్టర్ తెలిపారు. సర్వీస్ ఛార్జీ చెల్లించలేదనే కారణంతో వినియోగదారుడిని హోటల్ లేదా రెస్టారెంట్లోకి అనుమతించకుండా ఉండటం, సేవలు అందించకపోవడం వంటి చర్యలకు పాల్పడరాదని హెచ్చరించారు. వినియోగదారుడు ఏ సేవకు ఎంత చెల్లించాలో బిల్లులో స్పష్టంగా చూపించాలని సూచించారు.
సర్వీస్ ఛార్జీకి బదులుగా ‘సిబ్బంది సంక్షేమ రుసుము’, ‘ఉద్యోగుల సంక్షేమ రుసుము’, ‘సర్వీస్ ఫీజు’, ‘హాస్పిటాలిటీ ఛార్జీ’ వంటి పేర్లు పెట్టి తప్పనిసరిగా డబ్బు వసూలు చేసినా, దానిని సర్వీస్ ఛార్జీగానే పరిగణిస్తామని కలెక్టర్ తెలిపారు. పేరు మార్చినంత మాత్రాన నిబంధనల నుంచి తప్పించుకునే అవకాశం లేదని ఆయన పేర్కొన్నారు.
సర్వీస్ ఛార్జీని ఆహార బిల్లులో కలిపి, దానిపై వస్తు సేవల పన్ను విధించకూడదని కూడా నిబంధనల్లో స్పష్టం చేసినట్లు కలెక్టర్ తెలిపారు. వినియోగదారులు తమకు ఇచ్చే బిల్లును జాగ్రత్తగా పరిశీలించి, అదనంగా ఏదైనా రుసుము వసూలు చేస్తున్నారా లేదా అన్నది గమనించాలని సూచించారు.
వినియోగదారుల హక్కులను కాపాడటం ప్రతి ఒక్కరి బాధ్యతగా భావించాలని, హోటళ్లు, రెస్టారెంట్ల నిర్వాహకులు నిబంధనలను కచ్చితంగా పాటిస్తూ వినియోగదారులకు స్పష్టమైన బిల్లులు ఇవ్వాలని, ఎలాంటి బలవంతపు సర్వీస్ ఛార్జీ వసూలు చేయరాదని జిల్లా కలెక్టర్ డా. శ్రీధర్ చెరుకూరి స్పష్టం చేశారు.
