రాయలసీమ న్యూస్, వై.యస్.ఆర్: కడప: వైఎస్ఆర్ కడప జిల్లాలో మొబైల్ ఫోన్లు పోగొట్టుకోవడం, దొంగతనానికి గురవడం వంటి ఘటనలు పెరుగుతున్న నేపథ్యంలో బాధితులు తక్షణం తీసుకోవాల్సిన రక్షణ చర్యలపై జిల్లా పోలీస్ శాఖ ప్రత్యేక మార్గదర్శకాలను విడుదల చేసింది. సాంకేతికత విస్తృతమవుతున్న ఈ కాలంలో మొబైల్ ఫోన్ పోతే కేవలం పరికరం నష్టం మాత్రమే కాకుండా, అందులో భద్రపరిచిన బ్యాంకింగ్ వివరాలు, యూపీఐ పిన్లు, వ్యక్తిగత సమాచారం దుర్వినియోగం అయ్యే ప్రమాదం అధికంగా ఉందని పోలీసులు హెచ్చరించారు.
ఫోన్ పోయిన వెంటనే అప్రమత్తంగా వ్యవహరించి, ఆర్థిక నష్టం, సైబర్ మోసాలు, వ్యక్తిగత డేటా దుర్వినియోగం వంటి ప్రమాదాలను తగ్గించేందుకు ఐదు కీలక చర్యలను తప్పనిసరిగా చేపట్టాలని సూచించారు.
మొదటగా, జాతీయ సైబర్ క్రైమ్ హెల్ప్లైన్ 1930 కు వెంటనే కాల్ చేయాలని పోలీసులు సూచిస్తున్నారు. ఫోన్ పోయిన విషయం, బ్యాంకింగ్ యాప్లు, యూపీఐ, ఇతర ఆర్థిక లావాదేవీలకు సంబంధించిన వివరాలను హెల్ప్లైన్కు తెలియజేయడం ద్వారా, అనుమానాస్పద లావాదేవీలను అడ్డుకునే అవకాశం ఉంటుంది.
రెండవది, పోలీస్ ఫిర్యాదు చేయడం. అత్యవసర సహాయం కోసం 112 నంబర్కు కాల్ చేయవచ్చు లేదా సమీపంలోని పోలీస్ స్టేషన్ను సందర్శించి అధికారికంగా ఫిర్యాదు నమోదు చేయాలి. ఫిర్యాదు చేసిన తర్వాత అందించే రసీదు లేదా ఎఫ్ఐఆర్ ప్రతిని భద్రపరచుకోవడం భవిష్యత్ విచారణ, బీమా క్లెయిమ్లు వంటి సందర్భాల్లో ఉపయోగపడుతుంది.
మూడవది, సిమ్ కార్డ్ బ్లాకింగ్. Jio, Airtel, Vi, BSNL వంటి మీ మొబైల్ సర్వీస్ ప్రొవైడర్ను తక్షణం సంప్రదించి, ఫోన్ నంబర్కు సంబంధించిన సిమ్ కార్డును డియాక్టివేట్ చేయించాలి. దీనివల్ల మీ నంబర్ను ఉపయోగించి OTPలు, బ్యాంకింగ్ లావాదేవీలు, సోషల్ మీడియా అకౌంట్లు హ్యాక్ చేసే అవకాశాలు తగ్గుతాయి.
నాలుగవది, IMEI నంబర్ బ్లాకింగ్. భారత ప్రభుత్వ సెంట్రల్ ఎక్విప్మెంట్ ఐడెంటిటీ రిజిస్టర్ (CEIR) పోర్టల్ను సందర్శించి, మీ మొబైల్ IMEI నంబర్ను బ్లాక్ చేయాలి. CEIR ద్వారా బ్లాక్ చేసిన ఫోన్ భారతదేశంలోని ఏ మొబైల్ నెట్వర్క్లోనూ పనిచేయకుండా ఉండటంతో, దొంగిలించిన ఫోన్ వినియోగాన్ని అడ్డుకోవచ్చు.
ఐదవది, ట్రాకింగ్ సదుపాయాలు వినియోగించడం. ఆండ్రాయిడ్ ఫోన్లకు ఫైండ్ మై డివైస్ , iPhoneలకు Find My iPhone (iCloud) సదుపాయాల ద్వారా ఫోన్ చివరిగా ఉన్న స్థానం, నెట్వర్క్ కనెక్టివిటీ వంటి వివరాలను తెలుసుకునే ప్రయత్నం చేయవచ్చు. ఈ వివరాలు పోలీస్ విచారణకు కూడా తోడ్పడతాయి.
ప్రజల సౌలభ్యం కోసం ముఖ్యమైన హెల్ప్లైన్ నంబర్లు, వెబ్సైట్లు కూడా పోలీస్ శాఖ గుర్తు చేసింది. పోలీస్ అత్యవసర సేవ 112, జాతీయ సైబర్ క్రైమ్ హెల్ప్లైన్ 1930, సైబర్ క్రైమ్ రిపోర్టింగ్ పోర్టల్ https://cybercrime.gov.in, CEIR అధికారిక పోర్టల్ ceir.gov.in ద్వారా సేవలు పొందవచ్చు.
మొబైల్ ఫోన్ పోయినప్పుడు ఆందోళనకు లోనవకుండా, ఈ డిజిటల్ భద్రతా నియమాలను క్రమంగా పాటించడం ద్వారా ఆర్థిక నష్టాల నుంచి, సైబర్ నేరాల నుంచి రక్షించుకోవచ్చని కడప జిల్లా పోలీసులు స్పష్టం చేశారు.
