రాయలసీమ న్యూస్, వై.యస్.ఆర్: కడప: జిల్లాలో టెట్ పరీక్షలను ఆగస్ట్ 5 నుంచి 16 వరకు నిర్వహించనున్నట్లు జిల్లా అధికారులు తెలిపారు. ఈ మేరకు గురువారం కడపలో సంబంధిత శాఖల అధికారులతో సమీక్ష సమావేశం నిర్వహించారు. పరీక్షల నిర్వహణ, కేంద్రాల ఏర్పాటు, భద్రతా ఏర్పాట్లు, పరీక్షా విధానంపై ఈ సమావేశంలో చర్చించారు.
డీఆర్వో మల్లికార్జున, డీఈవో షంషుద్దీన్ వివరాల ప్రకారం, కడప జిల్లాలో మొత్తం 8 పరీక్షా కేంద్రాలను ఏర్పాటు చేశారు. కడప నగరంలో 5 కేంద్రాల్లో 9,469 మంది అభ్యర్థులు, ప్రొద్దుటూరులోని 2 కేంద్రాల్లో 1,951 మంది, రాజంపేటలోని ఒక కేంద్రంలో 360 మంది పరీక్ష రాయనున్నారు. మొత్తం 11,780 మంది అభ్యర్థులు ఈసారి టెట్ పరీక్షలకు హాజరుకానున్నట్లు అధికారులు తెలిపారు.
పరీక్షా కేంద్రాల్లో అవసరమైన సౌకర్యాలు, పర్యవేక్షణ బృందాల నియామకం, ప్రశ్నాపత్రాల భద్రత, పరీక్షా నియమావళి అమలు వంటి అంశాలపై సమీక్షలో అధికారులకు సూచనలు ఇచ్చినట్లు డీఆర్వో, డీఈవో పేర్కొన్నారు. పరీక్షా కేంద్రాల వద్ద రవాణా, తాగునీటి వంటి ప్రాథమిక సౌకర్యాలపై కూడా చర్చించినట్లు సమాచారం.
టెట్ పరీక్షలను ప్రశాంత వాతావరణంలో, ఎలాంటి అవకతవకలు లేకుండా నిర్వహించేందుకు అన్ని ఏర్పాట్లు పూర్తి చేస్తున్నామని అధికారులు స్పష్టం చేశారు. పరీక్షా తేదీలు, కేంద్రాల వివరాలు, సూచనలను అభ్యర్థులు సమయానికి తెలుసుకుని, పరీక్షకు హాజరయ్యేలా ఏర్పాట్లు చేసుకోవాలని సూచించారు.
