రాయలసీమ న్యూస్, వై.యస్.ఆర్: కడప జిల్లాలో రానున్న స్థానిక సంస్థల ఎన్నికల ఫలితాలు, 2029 సాధారణ ఎన్నికల రాజకీయ సమీకరణాలపై కీలక ప్రభావం చూపనున్నాయని ప్రొద్దుటూరు మాజీ ఎమ్మెల్యే, వై.యస్.ఆర్.సి.పి రాష్ట్ర అధికార ప్రతినిధి రాచమల్లు శివప్రసాద్ రెడ్డి అభిప్రాయపడ్డారు.
సోమవారం కడప పట్టణంలోని కడప కన్వెన్షన్ హాల్లో వై.యస్.ఆర్.సి.పి జిల్లా స్థాయి విస్తృత సమావేశం జరిగింది. ఈ సమావేశానికి వై.యస్.ఆర్.సి.పి జిల్లా అధ్యక్షులు రవీంద్రనాథ్ రెడ్డి అధ్యక్షత వహించగా, కడప ఎంపీ వై.యస్ అవినాష్ రెడ్డి ముఖ్య అతిథిగా హాజరయ్యారు.
సమావేశంలో మాట్లాడిన రాచమల్లు శివప్రసాద్ రెడ్డి, ప్రొద్దుటూరు నియోజకవర్గంలో పార్టీ టికెట్ కేటాయింపుపై స్పష్టతనిచ్చారు. వై.యస్.ఆర్ కాంగ్రెస్ పార్టీ కమిటీ కార్డు కలిగిన వై.యస్.ఆర్.సి.పి నాయకులలో ఒకరికి రాబోయే ఎన్నికల్లో ప్రొద్దుటూరు నుంచి పార్టీ టికెట్ ఇస్తామని తెలిపారు. అట్టి అభ్యర్థి స్థానికంగా ప్రజల మధ్యకు వెళ్లి Telugu Desam Party వైఫల్యాలను బలంగా వివరించగలిగితే, విజయం సాధించడం ఖాయమనే నమ్మకం వ్యక్తం చేశారు.
గెలిచిన తరువాత పార్టీ మారే స్వభావం ఉన్న వారికి టికెట్ ఇవ్వకూడదని, పార్టీకి నిబద్ధత కలిగిన అభ్యర్థులకే అవకాశం కల్పించాలనే అభిప్రాయాన్ని ఆయన వ్యక్తం చేశారు. వై.యస్.ఆర్.సి.పి అభ్యర్థులు గెలిచేలా ప్రతి కార్యకర్త కృషి చేయాలని పిలుపునిచ్చారు.
జగన్ మోహన్ రెడ్డి రాష్ట్ర అభివృద్ధి కోసం కష్టపడుతున్నారని, అదే ధైర్యం, మొక్కవోని మనస్తత్వంతో స్థానిక నాయకత్వం కూడా పనిచేయాలని రాచమల్లు సూచించారు. ఎలాంటి ఇబ్బందులు ఎదురైనా వై.యస్.ఆర్.సి.పి కార్యకర్తలకు తాము బలమైన అండగా ఉంటామని ఆయన హామీ ఇచ్చారు.
కార్యకర్తల సంక్షేమం కోసం ప్రతి ఎమ్మెల్యే, నియోజకవర్గ సమన్వయకర్తలు ముందుకు రావాల్సిన అవసరం ఉందని రాచమల్లు పేర్కొన్నారు. ప్రొద్దుటూరు నియోజకవర్గంలో వార్డు మెంబర్ నుంచి మునిసిపల్ ఛైర్మన్ వరకు సుమారు 480 మంది వై.యస్.ఆర్ కాంగ్రెస్ పార్టీ కమిటీ కార్డు కలిగిన వారికే పార్టీ టికెట్లు కేటాయించేలా చర్యలు తీసుకుంటామని తెలిపారు.
రాబోయే ఎన్నికల్లో రాష్ట్ర ప్రభుత్వం, పోలీసు వ్యవస్థలతో తాను రాజకీయ యుద్ధం చేసి, పార్టీ గెలుపు దిశగా కృషి చేస్తానని రాచమల్లు శివప్రసాద్ రెడ్డి స్పష్టం చేశారు. ఈ క్రమంలో జిల్లా అధ్యక్షులు రవీంద్రనాథ్ రెడ్డికి తాను ఇచ్చిన హామీని నిలబెట్టుకుంటానని ఆయన పేర్కొన్నారు.
