రాయలసీమ న్యూస్, వై.యస్.ఆర్: కడప రాజీవ్ పార్కు పరిసరాలు సినీ వాతావరణంతో కళకళలాడాయి. ‘నాగబంధం’ చిత్ర బృందం అక్కడికి చేరుకోవడంతో అభిమానులు, నగర వాసులు పెద్ద సంఖ్యలో తరలివచ్చి సందడి చేశారు.
చిత్ర యూనిట్ ముందుగా వాహనంపై ఏర్పాటు చేసిన అతిపెద్ద పద్మనాభ స్వామి విగ్రహం వద్ద ప్రత్యేక పూజలు నిర్వహించింది. ఈ కార్యక్రమంలో కథానాయకుడు విరాట్ కర్ణ, కథానాయిక నభా నటేష్, దర్శకుడు అభిషేక్ నామా తదితరులు పాల్గొన్నారు. విగ్రహానికి పూజలు, హారతులు అర్పించి, చిత్ర విజయానికి ప్రార్థనలు చేసినట్టు యూనిట్ సభ్యులు తెలిపారు.
పూజా కార్యక్రమం అనంతరం అక్కడ ఏర్పాటు చేసిన సాంస్కృతిక కార్యక్రమాల్లో భాగంగా నభా నటేష్ స్థానిక కళాకారులతో కలిసి నృత్యం చేసి ప్రేక్షకులను అలరించారు. ఆమెతో పాటు పాల్గొన్న కళాకారుల నృత్య ప్రదర్శనలు అక్కడి వాతావరణాన్ని మరింత ఉత్సాహభరితంగా మార్చాయి.
చిత్ర బృందం రాకతో రాజీవ్ పార్కు వద్దకు నగరంలోని వివిధ ప్రాంతాల నుంచి ప్రజలు అధిక సంఖ్యలో చేరుకున్నారు. విరాట్ కర్ణ, నభా నటేష్లను దగ్గరగా చూడటానికి, ఫొటోలు తీయడానికి అభిమానులు పోటీపడ్డారు. కుటుంబ సభ్యులతో, స్నేహితులతో కలిసి వచ్చిన వారు ఈ కార్యక్రమాన్ని ఆసక్తిగా వీక్షించారు.
సినిమా యూనిట్ పర్యటనతో ఆ ప్రాంతం పూర్తిగా ట్రాఫిక్తో నిండిపోయింది. పార్కు చుట్టుపక్కల రహదారులపై వాహనాల రద్దీ పెరగడంతో పోలీసులు ట్రాఫిక్ నియంత్రణకు చర్యలు తీసుకున్నారు. కార్యక్రమం ముగిసే వరకు అక్కడ కిక్కిరిసిన వాతావరణం నెలకొంది.
‘నాగబంధం’ చిత్ర బృందం ఈ సందర్శనతో కడపలో సినిమా ప్రచారానికి మంచి ఊపునిచ్చినట్టుగా సినీ వర్గాలు భావిస్తున్నాయి. అభిమానుల స్పందనతో యూనిట్ సభ్యులు సంతృప్తి వ్యక్తం చేసినట్టు తెలిసింది.
