రాయలసీమ న్యూస్, వై.యస్.ఆర్: వైఎస్ఆర్ కడప జిల్లా ప్రొద్దుటూరు జిల్లా ఆసుపత్రి (గవర్నమెంట్ హాస్పిటల్) లో వైద్య సేవల కోసం వచ్చే పేద, మధ్య తరగతి రోగులకు నిరీక్షణ తప్పడం లేదు. ఆసుపత్రిలోని ల్యాబ్‌లో రక్త పరీక్షల సేకరణతో పాటు పరీక్షల ఫలితాల సేకరణ కోసం ప్రతిరోజూ వందలాది మంది రోగులు గంటల తరబడి క్యూ లైన్లలో నిలబడాల్సి వస్తోంది.
పట్టణంతో పాటు చుట్టుపక్కల మండలాల నుండి, సుదూర గ్రామాల నుండి చికిత్స నిమిత్తం వచ్చే వృద్ధులు, గర్భిణులు, చిన్నారులు, తీవ్ర అనారోగ్యంతో బాధపడుతున్న వారు క్యూ లైన్లలో ఎక్కువసేపు నిలబడలేక ఇబ్బందులు పడుతున్నారు. ల్యాబ్ వద్ద శాంపిల్స్ తీసుకునేందుకు, రిపోర్టులు ఇవ్వేందుకు పరిమిత సంఖ్యలోనే కౌంటర్లు ఉండటం, సిబ్బంది కొరత, సాంకేతిక జాప్యం వంటి కారణాల వల్ల సమస్య మరింత తీవ్రమవుతోందని రోగులు, వారి బంధువులు ఆవేదన వ్యక్తం చేస్తున్నారు.
ఆసుపత్రి అధికారులు, జిల్లా వైద్యాధికారులు (DMHO) తక్షణమే స్పందించి రోగుల ఇబ్బందులను తగ్గించేలా చర్యలు తీసుకోవాలని ప్రజలు కోరుతున్నారు. రోగుల ఆరోగ్య భద్రతను దృష్టిలో ఉంచుకుని సేవలను సక్రమంగా అందించేలా ఆసుపత్రి నిర్వహణను మెరుగుపరచాలని స్థానికులు అభిప్రాయపడుతున్నారు.
బ్లడ్ శాంపిల్స్ సేకరణ, రిపోర్టుల పంపిణీ కోసం అదనపు కౌంటర్లను ఏర్పాటు చేయాలని రోగులు, వారి బంధువులు డిమాండ్ చేస్తున్నారు. ప్రస్తుతం ఉన్న కౌంటర్ల వద్ద రద్దీ అధికంగా ఉండటంతో, ఒకే కౌంటర్ వద్ద శాంపిల్స్, రిపోర్టుల పనులు సాగడం వల్ల క్యూ లైన్లు మరింత పొడవుగా మారుతున్నాయని వారు చెబుతున్నారు.
క్యూ లైన్లలో గంటల తరబడి నిలబడకుండా డిజిటల్ టోకెన్ విధానాన్ని అమలు చేయాలని, లేదా షేడ్ ఉన్న ప్రాంగణంలో కూర్చునే వసతి కల్పించాలని ప్రజలు సూచిస్తున్నారు. ముఖ్యంగా వృద్ధులు, గర్భిణులు, చిన్నారులకు ప్రత్యేక సౌకర్యాలు కల్పించి, వారికి ప్రాధాన్య క్రమంలో సేవలు అందించాలని కోరుతున్నారు.
ఓపీ రద్దీకి అనుగుణంగా ల్యాబ్ టెక్నీషియన్లు, ఆపరేటర్లను పెంచి సేవలను వేగవంతం చేయాలని స్థానికులు అభిప్రాయపడుతున్నారు. రోగుల ఆరోగ్య భద్రతను దృష్టిలో ఉంచుకుని సంబంధిత ఆసుపత్రి సూపరింటెండెంట్, ఉన్నతాధికారులు తగు చర్యలు తీసుకోవాలని రోగుల బంధువులు, ప్రజలు కోరుతున్నారు.
