రాయలసీమ న్యూస్, వై.యస్.ఆర్: ప్రొద్దుటూరు మున్సిపల్ కార్యాలయం, గాంధీ పార్కులో మహాత్మా గాంధీ జయంతి వేడుకలు సోమవారం ఘనంగా నిర్వహించారు. ఈ కార్యక్రమానికి ప్రొద్దుటూరు కమీషనర్ తూతిక శ్రీనివాస విశ్వనాధ్ ఆధ్వర్యం వహించారు. ఉదయం నుంచి మున్సిపల్ కార్యాలయం ప్రాంగణం, గాంధీ పార్కు ప్రాంతం పూలతో, అలంకరణలతో సందడిగా మారింది.
మహాత్మా గాంధీ ప్రతిమకు కమీషనర్ తూతిక శ్రీనివాస విశ్వనాధ్ పుష్పాంజలి ఘటించారు. అనంతరం నిర్వహించిన సభలో గాంధీ జీవితం, ఆయన సిద్ధాంతాలపై ప్రసంగించారు. శాంతి మార్గంలో సత్యం, అహింస అనే ఆయుధాలతో భారతదేశానికి స్వాతంత్ర్యం సాధించడంలో గాంధీ చేసిన త్యాగాలు, పోరాటాన్ని ఆయన స్మరించారు.ఉద్యోగులు, ప్రజలు గాంధీ ఆలోచనలను ఆచరణలో పెట్టాలని, ఆయన చూపిన మార్గంలో నడవాలని కమీషనర్ పిలుపునిచ్చారు. మహాత్మా గాంధీ స్ఫూర్తితో ఆచరణ సాధ్యమైన ప్రభుత్వ విధానాన్ని ప్రజలలోకి తీసుకెళ్లేలా మున్సిపల్ సిబ్బంది కృషి చేయాలని ఆయన సూచించారు.
ఈ కార్యక్రమంలో విశిష్ట అతిథిగా APNGO ప్రొద్దుటూరు అధ్యక్షులు రామసుబ్బయ్య పాల్గొన్నారు. ప్లాస్టిక్ వినియోగం వల్ల పర్యావరణానికి కలుగుతున్న నష్టాన్ని ఆయన ప్రస్తావించారు. ప్లాస్టిక్ రహిత ప్రొద్దుటూరును నిర్మించేందుకు ప్రతి ఒక్కరూ ముందుకు రావాలని, మున్సిపల్ చర్యలకు ప్రజలు సహకరించాలని ఆయన కోరారు.
గాంధీ జయంతి సందర్భంగా మున్సిపల్ పరిధిలో ప్లాస్టిక్ వినియోగాన్ని తగ్గించే దిశగా అవగాహన కార్యక్రమాలు నిర్వహించాలని అధికారులు నిర్ణయించినట్లు మున్సిపల్ వర్గాలు తెలిపాయి. పర్యావరణ పరిరక్షణలో భాగంగా ప్లాస్టిక్‌కు ప్రత్యామ్నాయంగా పునర్వినియోగం అయ్యే వస్తువులను ఉపయోగించేందుకు ప్రజలను ప్రోత్సహించనున్నట్లు పేర్కొన్నారు.కార్యక్రమంలో అసిస్టెంట్ కమీషనర్ మంజునాధ్ గౌడ్, డిప్యూటీ ఎగ్జిక్యూటివ్ ఇంజనీర్ రాజేష్, యశోద, అసిస్టెంట్ ఇంజనీర్ సురేంద్ర, దస్తగిరి, శానిటేషన్ సూపర్ వైజర్ నూర్ బాషా తదితరులు పాల్గొన్నారు. మున్సిపల్ సిబ్బంది, స్థానిక ప్రజలు, సంఘ ప్రతినిధులు గాంధీ జయంతి వేడుకలకు హాజరయ్యారు.
