రాయలసీమ న్యూస్, వై.యస్.ఆర్: ప్రొద్దుటూరు పట్టణంలోని 27వ వార్డులో కూటమి ప్రభుత్వం ఏర్పాటుై రెండు సంవత్సరాలు పూర్తైన సందర్భంగా నిర్వహించిన డోర్ టు డోర్ కార్యక్రమంలో చోటుచేసుకున్న సమస్యకు స్థానిక ప్రజాప్రతినిధులు వెంటనే స్పందించారు. ఈ కార్యక్రమంలో ప్రొద్దుటూరు ఎమ్మెల్యే నంద్యాల వరదరాజుల రెడ్డి పాల్గొన్నారు.
కార్యక్రమం సందర్భంగా 27వ వార్డులోని C.S.I చర్చి సమీపంలో ఉన్న కరెంటు ట్రాన్స్ఫార్మర్ చుట్టూ ఇనుప కంచె లేకపోవడం వల్ల చర్చికి వచ్చే పిల్లలు, పెద్దలకు ప్రమాదం ఏర్పడే అవకాశం ఉందని అక్కడి ప్రజలు ఎమ్మెల్యే నంద్యాల వరదరాజుల రెడ్డి, TDP పార్లమెంట్ కార్యదర్శి తలారి పుల్లయ్య దృష్టికి తీసుకువచ్చారు. ట్రాన్స్ఫార్మర్ పూర్తిగా బహిర్గతంగా ఉండటంతో, ముఖ్యంగా పిల్లలు ఆ ప్రాంతంలో తిరిగేటప్పుడు ప్రమాదం తలెత్తుతుందనే ఆందోళనను వారు వ్యక్తం చేశారు.
ఈ ఫిర్యాదుపై ఎమ్మెల్యే నంద్యాల వరదరాజుల రెడ్డి వెంటనే స్పందించారు. సంబంధిత విద్యుత్ శాఖ అధికారులకు ఫోన్ ద్వారా సమాచారం అందించి, ట్రాన్స్ఫార్మర్ చుట్టూ తక్షణమే ఇనుప గ్రిల్ ఏర్పాటు చేయాలని ఆదేశించారు. ప్రజల భద్రత దృష్ట్యా ఆలస్యం చేయకుండా చర్యలు తీసుకోవాలని ఎమ్మెల్యే అధికారులను కోరినట్లు స్థానికులు తెలిపారు.
ఎమ్మెల్యే ఆదేశాలపై విద్యుత్ శాఖ అధికారులు కూడా త్వరితగతిన స్పందించారు. బుధవారం రోజున C.S.I చర్చి సమీపంలోని ట్రాన్స్ఫార్మర్ చుట్టూ ఇనుప గ్రిల్ ఏర్పాటు చేశారు. దీంతో ఆ ప్రాంతంలో తిరిగే పిల్లలు, చర్చికి వచ్చే భక్తులు, స్థానికులకు కొంత భద్రత కలిగినట్లు అక్కడి ప్రజలు భావిస్తున్నారు.
ట్రాన్స్ఫార్మర్ చుట్టూ ఇనుప గ్రిల్ ఏర్పాటు చేయడంతో 27వ వార్డు ప్రజలు సంతృప్తి వ్యక్తం చేశారు. తమ విజ్ఞప్తికి వెంటనే స్పందించి చర్యలు తీసుకున్న ఎమ్మెల్యే నంద్యాల వరదరాజుల రెడ్డి, విద్యుత్ శాఖ అధికారులకు 27వ వార్డు ప్రజల తరఫున కృతజ్ఞతలు తెలిపారు. ప్రజల సమస్యలను గుర్తించి తక్షణమే పరిష్కరించేందుకు ప్రజాప్రతినిధులు, అధికారులు ముందుకు రావడం అభినందనీయమని స్థానికులు పేర్కొన్నారు.
