రాయలసీమ న్యూస్, అగ్రికల్చర్ డెస్క్: వర్షాకాలం ప్రారంభంతో ఇంటి తోటల ఏర్పాటుకు ఇది అత్యంత అనుకూలమైన కాలంగా నిపుణులు సూచిస్తున్నారు. ఈ సీజన్లో తక్కువ ఖర్చుతో, తక్కువ స్థలంలోనే కుటుంబ అవసరాలకు సరిపడే కూరగాయలను పండించుకోవచ్చని వ్యవసాయ విభాగం అధికారులు చెబుతున్నారు.
ఇంటి ఆవరణ, బాల్కనీ, టెర్రస్లలో లభ్యమయ్యే ఖాళీ ప్రదేశాన్ని వినియోగించుకుని చిన్న స్థాయిలోనైనా తోటలను ఏర్పాటు చేయాలని వారు సూచిస్తున్నారు. వర్షాకాల వాతావరణం కారణంగా తక్కువ నీటితోనే మొక్కలు బాగా పెరుగుతాయని, సరైన ప్రణాళికతో సాగు చేస్తే నిరంతర దిగుబడి సాధ్యమవుతుందని తెలియజేస్తున్నారు.
ఈ కాలంలో చెట్టు చిక్కుడు, గోరు చిక్కుడు, ధనియాలు, బెండ, పొద్దు తిరుగుడు, గుమ్మడి, బీర, చుక్కకూర, పాలకూర వంటి కూరగాయల విత్తనాలను నాటుకోవడం ఉత్తమమని నిపుణులు సూచిస్తున్నారు. వీటి పెరుగుదలకు వర్షాకాల తేమ, ఉష్ణోగ్రతలు అనుకూలంగా ఉండటం వల్ల మంచి దిగుబడి వచ్చే అవకాశాలు ఎక్కువగా ఉంటాయని పేర్కొంటున్నారు.
కుటుంబ అవసరాలను దృష్టిలో పెట్టుకుని మొక్కల సంఖ్యను నిర్ణయించుకోవాలని, ఒకేసారి కాకుండా బ్యాచ్లుగా విత్తనాలు వేయడం ద్వారా నిరంతరంగా కూరగాయలు లభించేలా ప్రణాళిక చేసుకోవాలని సూచిస్తున్నారు. ఇలా చేయడం వల్ల ఒకేసారి అధిక దిగుబడి రావడం, తర్వాత కొరత ఏర్పడే పరిస్థితులను నివారించవచ్చని చెబుతున్నారు.
పాలకూర, చుక్కకూర వంటి ఆకుకూరలను పైపుల్లో నాటుకోవచ్చని, కొత్తిమీరను బ్లాక్ టబ్లలో పెంచితే మంచి ఫలితాలు వస్తాయని నిపుణులు సూచిస్తున్నారు. చెట్టు చిక్కుడు, బెండ వంటి మొక్కలను బ్లాక్ టబ్లు, గ్రో బ్యాగులలో నాటితే అవి సులభంగా పెరిగి మంచి దిగుబడి ఇస్తాయని వివరిస్తున్నారు.
విత్తనాలు నాటిన తర్వాత వాతావరణ పరిస్థితులను బట్టి నీటిపారుదల చేయాలని, అధిక నీరు పోయడం వల్ల వేరుబంధం పాడైపోయే ప్రమాదం ఉండటంతో జాగ్రత్తలు తీసుకోవాలని సూచిస్తున్నారు. వర్షం పడిన రోజుల్లో అదనంగా నీరు పోయకుండా, నేల తడిని పరిశీలించి అవసరాన్ని బట్టి నీరు పెట్టాలని సలహా ఇస్తున్నారు.
ఇంటి తోటల పెంపకం ద్వారా రసాయనాల మిశ్రమం తక్కువగా ఉండే, తాజా కూరగాయలను కుటుంబ సభ్యులు వినియోగించుకోవచ్చని నిపుణులు చెబుతున్నారు. స్వయంగా పండించిన కూరగాయలను వాడటం వల్ల ఆరోగ్య పరిరక్షణతో పాటు, ఖర్చు తగ్గింపు, పర్యావరణ పరిరక్షణకు కూడా తోడ్పడుతుందని వారు పేర్కొంటున్నారు.
