రాయలసీమ న్యూస్, ఆంధ్రప్రదేశ్ డెస్క్: ఆంధ్రప్రదేశ్‌లో కరోనా వైరస్ కేసులు మరోసారి పెరుగుదల దిశగా సాగుతున్నాయి. రాష్ట్రంలో నమోదైన మొత్తం కోవిడ్-19 కేసుల సంఖ్య 19కు చేరినట్లు ఆరోగ్య శాఖ తాజా గణాంకాలు వెల్లడిస్తున్నాయి. గత కొద్ది రోజులుగా నమోదవుతున్న కేసుల్లో ఒమిక్రాన్ RF.5 వేరియంట్ ప్రభావం ఎక్కువగా కనిపిస్తున్నట్లు ప్రభుత్వం గుర్తించింది.
జిల్లాల వారీగా పరిశీలిస్తే అత్యధిక కేసులు వైఎస్సార్ కడప జిల్లాలో నమోదయ్యాయి. అక్కడ ఇప్పటివరకు 8 కేసులు గుర్తించారు. గుంటూరు, కాకినాడ జిల్లాల్లో చెరో రెండు కేసులు నమోదయ్యాయి. పార్వతీపురం మన్యం, విశాఖపట్నం, తూర్పు గోదావరి, ఏలూరు, ఎన్టీఆర్, శ్రీ పొట్టి శ్రీరాములు నెల్లూరు, బాపట్ల జిల్లాల్లో చెరో ఒక్క కేసు నమోదు అయినట్లు అధికారులు వివరించారు.
ప్రస్తుతం రాష్ట్రంలో నలుగురు కరోనా కారణంగా మృతి చెందినట్లు అధికారిక సమాచారం వెల్లడించింది. మరో ముగ్గురు కోలుకుని డిశ్చార్జి అయ్యారు. ఎనిమిది మంది వివిధ ఆసుపత్రుల్లో చికిత్స పొందుతున్నారు. మరో నలుగురు హోం ఐసోలేషన్‌లో ఉండి వైద్యుల పర్యవేక్షణలో చికిత్స పొందుతున్నారని ఆరోగ్య శాఖ తెలిపింది.
ఇటీవల నమోదవుతున్న కేసులకు ఒమిక్రాన్ RF.5 వేరియంట్ కారణమని ప్రభుత్వం గుర్తించింది. ఈ నేపథ్యంలో ప్రజలు అప్రమత్తంగా ఉండాలని ఆరోగ్య శాఖ హెచ్చరిస్తోంది. జ్వరం, దగ్గు, జలుబు వంటి లక్షణాలు కనిపించిన వెంటనే పరీక్షలు చేయించుకోవాలని, వైద్యుల సూచనలు తప్పనిసరిగా పాటించాలని అధికారులు సూచిస్తున్నారు.
గతంలో రాష్ట్రంలో తీవ్ర నష్టం మిగిల్చిన కరోనా మహమ్మారి కేసులు ఇప్పుడు మరోసారి క్రమంగా పెరుగుతుండడం ఆందోళనకు గురిచేస్తోంది. ఆరోగ్య వ్యవస్థ మళ్లీ సిద్ధంగా ఉండాల్సిన పరిస్థితి ఏర్పడుతుండగా, ప్రజలు నిర్లక్ష్యానికి పోకుండా జాగ్రత్తలు పాటించాలని వైద్య నిపుణులు సూచిస్తున్నారు.
ముఖ్యంగా వృద్ధులు, గర్భిణీలు, దీర్ఘకాలిక వ్యాధులతో బాధపడుతున్న వారు ప్రత్యేక జాగ్రత్తలు తీసుకోవాలని, అవసరం లేని గుంపులు, సమావేశాలు నివారించాలని ఆరోగ్య శాఖ సూచిస్తోంది. రాష్ట్రంలో పరిస్థితిని దగ్గరగా పరిశీలిస్తూ, అవసరమైన చర్యలు తీసుకుంటున్నామని అధికార వర్గాలు తెలియజేస్తున్నాయి.
