రాయలసీమ న్యూస్, ఆంధ్రప్రదేశ్ డెస్క్: చీరాల పట్టణంలోని ఎంజీసీ క్లాత్ మార్కెట్‌లో బుధవారం మాజీ మంత్రి డాక్టర్ పాలేటి రామారావు సందడి చేశారు. వ్యక్తిగత పనిమీద మార్కెట్‌కు వచ్చిన ఆయనను అక్కడే ఉన్న మాజీ కౌన్సిలర్, వైసీపీ బాపట్ల జిల్లా వాణిజ్య విభాగం అధ్యక్షుడు చీమకుర్తి బాలకృష్ణ మర్యాదపూర్వకంగా కలిసి, టీకి ఆహ్వానించినట్లు స్థానికులు తెలిపారు.
ఆహ్వానం మేరకు క్యాంటీన్‌కు చేరుకున్న పాలేటి రామారావు, చీమకుర్తి బాలకృష్ణతో పాటు పలువురు మాజీ కౌన్సిలర్లు, ఆర్యవైశ్య ప్రముఖులతో సరదాగా ముచ్చటించినట్లు సమాచారం. ఈ సందర్భంగా స్థానిక రాజకీయ పరిణామాలు, పట్టణ అభివృద్ధి అంశాలపై కూడా చర్చ జరిగినట్లు తెలిసింది.
ఈ భేటీలో మాజీ కౌన్సిలర్లు బత్తుల అనిల్, కంపా అరుణ్ కుమార్, చేబ్రోలు బావాజీ రావు తదితరులు పాల్గొన్నారు. మార్కెట్‌కు వచ్చిన సాధారణ వ్యక్తిగత ప్రయాణం, ఆర్యవైశ్య వర్గానికి చెందిన నాయకులతో జరిగిన ఈ సమావేశం కారణంగా రాజకీయ రంగు పులుముకున్నట్లు చీరాల రాజకీయ వర్గాలు విశ్లేషిస్తున్నాయి.
త్వరలో మున్సిపల్ ఎన్నికలు జరగనున్న నేపథ్యంలో పాలేటి రామారావు ఆర్యవైశ్య ప్రముఖులతో సమావేశం కావడం చీరాల రాజకీయ వర్గాల్లో చర్చనీయాంశంగా మారింది. ఎన్నికల ముందు కీలక సామాజిక వర్గాల నాయకులతో సంప్రదింపులు, సమావేశాలు జరగడం సహజమేనన్న అభిప్రాయం ఒకవైపు ఉండగా, ఈ భేటీకి ప్రత్యేక ప్రాధాన్యం ఉందని మరో వర్గం భావిస్తోంది.
గతంలో పాలేటి రామారావు మంత్రి హయాంలో ఆర్యవైశ్య వర్గానికి చెందిన ఇడుపులపాటి బసవయ్యను ఏఎంసీ చైర్మన్‌గా నియమించిన విషయం ఇప్పుడు మళ్లీ ప్రస్తావనకు వస్తోంది. ఆ నియామకం ద్వారా ఆర్యవైశ్య వర్గానికి రాజకీయ ప్రాతినిధ్యం కల్పించిన ఉదాహరణగా ఈ అంశాన్ని కొందరు నాయకులు గుర్తుచేసుకుంటున్నారు.
మున్సిపల్ ఎన్నికల దిశగా రాజకీయ పార్టీలు వ్యూహాలు రచిస్తున్న సమయంలో, చీరాల ఎంజీసీ మార్కెట్‌లో జరిగిన ఈ భేటీ స్థానిక రాజకీయ సమీకరణాలపై ఎలాంటి ప్రభావం చూపుతుందన్నది ఆసక్తికరంగా మారింది. పాలేటి రామారావు తాజా సందడి, ఆర్యవైశ్య నాయకులతో ఆయనకు ఉన్న అనుబంధం నేపథ్యంలో, రానున్న రోజుల్లో చీరాల మున్సిపల్ రాజకీయాల్లో మరిన్ని పరిణామాలు చోటుచేసుకునే అవకాశమున్నట్లు రాజకీయ వర్గాలు అంచనా వేస్తున్నాయి.
