రాయలసీమ న్యూస్, ఆంధ్రప్రదేశ్ డెస్క్: విశాఖ ఎకనామిక్ రీజియన్ అభివృద్ధి ప్రణాళికలపై గౌరవ ముఖ్యమంత్రి శ్రీ నారా చంద్రబాబు నాయుడు గురువారం సమీక్ష సమావేశం నిర్వహించారు. ఈ రీజియన్‌లో ఉన్న అన్ని ప్రాంతాలను సమగ్రంగా అభివృద్ధి చేసే విధంగా విస్తృత ప్రణాళికను సిద్ధం చేయాలని సంబంధిత అధికారులను ఆయన ఆదేశించారు.
విశాఖ ఎకనామిక్ రీజియన్‌ను దేశంలో కీలక ఆర్థిక కేంద్రంగా తీర్చిదిద్దే లక్ష్యంతో, వివిధ రంగాల్లో ప్రధాన ప్రాజెక్టుల ద్వారా భారీ స్థాయిలో పెట్టుబడులు ఆకర్షించేలా కార్యాచరణ రూపకల్పన చేయాలని ముఖ్యమంత్రి సూచించారు. మొత్తం రూ. 9.50 లక్షల కోట్ల పెట్టుబడులు ఈ రీజియన్‌లోకి రాబోయేలా ప్రణాళిక చేయాలని, అందులో రాష్ట్ర ప్రభుత్వ పెట్టుబడులు రూ. 3.50 లక్షల కోట్లు, ప్రైవేట్ రంగం నుంచి రూ. 5.50 లక్షల కోట్లు ఉండేలా చర్యలు తీసుకోవాలని ఆయన అధికారులకు సూచించినట్లు ప్రభుత్వ వర్గాలు తెలిపాయి.
విశాఖ ఎకనామిక్ రీజియన్ అభివృద్ధి రూపకల్పనలో ఆధునిక సాంకేతిక, పారిశ్రామిక, పర్యాటక రంగాల సమన్వయానికి ప్రాధాన్యం ఇవ్వాలని ముఖ్యమంత్రి సమావేశంలో పేర్కొన్నారు. ఏఐ డేటా సెంటర్ల ఎకో సిస్టం, పోర్టు ఆధారిత పరిశ్రమలు, టూరిజం, హైడ్రోజన్, క్లీన్-టెక్ ఎనర్జీ వంటి రంగాలు ఈ రీజియన్ అభివృద్ధిలో కీలక భాగాలుగా ఉండేలా ప్రణాళికలో ప్రతిబింబించాలని సూచించారు.
మూలపేట పోర్టు నుంచి రాజమహేంద్రవరం అఖండ గోదావరి ప్రాజెక్టు వరకూ ఉన్న ప్రాంతాలను విశాఖ ఎకనామిక్ రీజియన్ పరిధిలో సమగ్రంగా అభివృద్ధి చేయాలని, ఈ ప్రాంతాల్లో ఉన్న సహజ వనరులు, పారిశ్రామిక అవకాశాలు, పర్యాటక సామర్థ్యాన్ని పూర్తిస్థాయిలో వినియోగించుకునేలా ప్రాజెక్టులు రూపొందించాలని సమావేశంలో చర్చించినట్లు అధికార వర్గాలు వెల్లడించాయి.
ఈ సమీక్ష సమావేశంలో రాష్ట్ర ప్రభుత్వ ప్రధాన కార్యదర్శి శ్రీ జీ. సాయి ప్రసాద్, ఆర్ధిక, పరిశ్రమలు, పురపాలక, అటవీ, ఇంధన, పర్యాటక శాఖల ఉన్నతాధికారులు పాల్గొన్నారు. విశాఖ ఎకనామిక్ రీజియన్ అభివృద్ధి కోసం ఇప్పటికే ఉన్న ప్రాజెక్టులు, ప్రతిపాదిత కార్యక్రమాలపై సమగ్ర సమీక్ష నిర్వహించి, తదుపరి కార్యాచరణకు సంబంధించి ముఖ్యమంత్రి సూచనలు అందించినట్లు సమాచారం.
