రాయలసీమ న్యూస్, అన్నమయ్య: రాష్ట్రంలో ప్రముఖ వేసవి పర్యాటక కేంద్రంగా పేరుగాంచిన హార్సిలీహిల్స్ అభివృద్ధికి రాష్ట్ర ప్రభుత్వం సమగ్ర ప్రణాళికను సిద్ధం చేస్తోంది. మదనపల్లె సమీపంలో సముద్ర మట్టానికి సుమారు 4,314 అడుగుల ఎత్తులో ఉన్న ఈ కొండ ప్రాంతాన్ని ఆధునిక సౌకర్యాలతో తీర్చిదిద్దేందుకు చర్యలు ప్రారంభమయ్యాయి.
ముఖ్యమంత్రి చంద్రబాబు అధ్యక్షతన అమరావతిలో గురువారం జరిగిన రాష్ట్రస్థాయి పెట్టుబడుల ప్రోత్సాహక బోర్డు 18వ సమావేశం (ఎస్ఐపీబీ)లో హార్సిలీహిల్స్ అభివృద్ధి అంశం ప్రస్తావనకు వచ్చింది. ఈ సందర్భంగా హార్సిలీహిల్స్లో అత్యాధునిక వసతులతో కూడిన రిసార్టులను ఏర్పాటు చేయాలనే ప్రతిపాదనపై చర్చ జరిగింది. మౌలిక వసతులు మెరుగుపడితే పర్యాటకుల రాక మరింత పెరుగుతుందని ప్రభుత్వం అంచనా వేస్తోంది.
పర్యాటక ప్రాజెక్టులు కేవలం ధనిక వర్గానికే పరిమితం కాకుండా, అన్ని వర్గాలకూ అందుబాటులో ఉండేలా చూడాలని ముఖ్యమంత్రి అధికారులకు సూచించినట్లు సమాచారం. హార్సిలీహిల్స్ పరిసర ప్రాంతాల్లో ప్రతిపాదిత పర్యాటక ప్రాజెక్టులు, ఎకో సిస్టమ్ అభివృద్ధి ద్వారా స్థానిక పేద, మధ్యతరగతి యువతకు ఉపాధి అవకాశాలు కల్పించాలనే దిశగా ప్రభుత్వం ఆలోచిస్తోంది. హోటళ్లు, రిసార్టుల స్థాపనతో స్థానిక ఆర్థిక వ్యవస్థ బలోపేతం అవుతుందని అధికార వర్గాలు భావిస్తున్నాయి.
భవిష్యత్ ప్రణాళికలో భాగంగా ప్రపంచ స్థాయి రిసార్టులను ప్రైవేట్ భాగస్వామ్యంతో నిర్మించేందుకు అవకాశాలు పరిశీలిస్తున్నారు. లగ్జరీ రిసార్టులు అందుబాటులోకి వస్తే రాత్రి బస సౌకర్యాలు పెరిగి, దీర్ఘకాలిక పర్యటనలకు హార్సిలీహిల్స్ అనువైన గమ్యస్థానంగా మారుతుందని అధికారులు అంచనా వేస్తున్నారు.
కొండపైకి వెళ్లే రహదారి విస్తరణ, పర్యాటకులకు అవసరమైన కనీస సౌకర్యాల కల్పనపై కూడా సమావేశంలో చర్చ జరిగింది. రహదారి విస్తరణతో పాటు పార్కింగ్, తాగునీరు, మరుగుదొడ్లు, వీక్షణ స్థలాలు వంటి మౌలిక వసతులను దశలవారీగా అభివృద్ధి చేయాలని నిర్ణయించినట్లు తెలుస్తోంది.
రాయలసీమలోని గండికోట, అనంతపురం, కర్నూలు ప్రాంతాల్లో ఉన్న పర్యాటక కేంద్రాలను హార్సిలీహిల్స్తో అనుసంధానిస్తూ ప్రత్యేక టూరిజం ప్యాకేజీల రూపకల్పనపై కూడా ప్రభుత్వం దృష్టి సారించింది. ఈ ప్యాకేజీల ద్వారా పర్యాటకులు ఒకే ప్రయాణంలో అనేక గమ్యస్థానాలను సందర్శించేలా ప్రణాళికలు సిద్ధం చేయాలని ముఖ్యమంత్రి సంబంధిత అధికారులకు దిశానిర్దేశం చేసినట్లు అధికార వర్గాలు తెలియజేశాయి.
హార్సిలీహిల్స్ సహజ సౌందర్యాన్ని కాపాడుతూ, పర్యావరణానికి భంగం కలగకుండా అభివృద్ధి కార్యక్రమాలు అమలు చేయాలనే అంశాన్ని కూడా అధికారులు ప్రాధాన్యంగా పరిగణిస్తున్నట్లు సమాచారం. పర్యాటక పునరుజ్జీవన ప్రణాళిక అమలులోకి వస్తే హార్సిలీహిల్స్ మరోసారి రాష్ట్ర పర్యాటక పటంలో ప్రధాన ఆకర్షణగా నిలిచే అవకాశం ఉందని స్థానికులు ఆశాభావం వ్యక్తం చేస్తున్నారు.
