రాయలసీమ న్యూస్, టెక్నాలజీ డెస్క్: వినూత్న ఆవిష్కరణలకు కేరాఫ్‌ అడ్రస్‌గా పేరొందిన టెస్లా మరోసారి ప్రపంచాన్ని అబ్బురపరిచే విజువల్‌ను విడుదల చేసింది. గాల్లో ఎగరడం దీని ప్రత్యేకతగా కనిపించేలా ఉన్న ఒక కారును చూపిస్తూ కంపెనీ కొత్త వీడియోను బయటపెట్టింది. అడ్వాన్స్డ్ రోడ్స్టర్ మోడల్‌ ఆధారంగా రూపొందించిన ఈ ఫ్లైయింగ్ టెస్లా కారుకు సంబంధించిన వీడియోను స్పేస్ X అధినేత ఎలోన్ మస్క్ తన X అకౌంట్‌లో పోస్ట్‌ చేశారు.
వీడియోలో కనిపిస్తున్న టెస్లా కారు మొదట సాధారణంగా రోడ్డుపై ప్రయాణిస్తుంటుంది. కొద్ది సేపటికే అకస్మాత్తుగా గాల్లోకి ఎగిరిపోతుంది. ఆ తర్వాత పల్టీలు కొడుతూ తిరుగుతూ మళ్లీ రోడ్డుపైకి వాలిపోతున్న దృశ్యాలు వీడియోలో ఉన్నాయి. ఈ విజువల్‌ ప్రస్తుతం సోషల్‌ మీడియాలో విస్తృతంగా షేర్‌ అవుతోంది.
ఎలోన్ మస్క్ పోస్ట్‌ చేసిన ఈ వీడియోలో చివర్లో “ఈ ఎగిరే కారును మీరు చూసేయండి ...."అనే వాక్యం కనిపిస్తుంది. దీనితో వీడియోను చూసే వారు మరింత ఆసక్తిగా గమనించేలా చేసింది. అయితే ఈ విజువల్‌ నిజంగా టెస్లా రూపొందించిన ఫ్లయింగ్‌ కారునా, లేక గ్రాఫిక్స్‌ ఆధారంగా రూపొందించిన కాన్సెప్ట్‌ వీడియోనా అన్న విషయంపై అధికారిక స్పష్టత మాత్రం అందుబాటులో లేదు.
టెస్లా , స్సెస్ సంస్థలు తరచూ తమ భవిష్యత్‌ సాంకేతిక ప్రణాళికలకు సంబంధించిన కాన్సెప్ట్‌ వీడియోలను, ప్రయోగ దృశ్యాలను సోషల్‌ మీడియా వేదికల ద్వారా ప్రపంచానికి చూపిస్తూ ఉంటాయి. ఈ తాజా వీడియో కూడా అదే తరహాలో ఉండొచ్చని టెక్‌ వర్గాలు భావిస్తున్నాయి. గాల్లో ఎగిరే కార్ల భావనపై ప్రపంచవ్యాప్తంగా అనేక కంపెనీలు పరిశోధనలు చేస్తున్న నేపథ్యంలో, టెస్లా నుంచి వచ్చిన ఈ విజువల్‌ మరింత చర్చనీయాంశమైంది.
ప్రస్తుతం ఎలోన్ మస్క్ పోస్ట్‌ చేసిన ఈ ఫ్లైయింగ్ టెస్లా వీడియోపై నెటిజన్లు వివిధ కోణాల్లో స్పందిస్తున్నారు. కొందరు భవిష్యత్‌ రవాణా వ్యవస్థ ఇదే కావొచ్చని కామెంట్లు పెడుతుండగా, మరికొందరు ఇది కేవలం వినోదాత్మక కాన్సెప్ట్‌ మాత్రమే కావచ్చని అభిప్రాయపడుతున్నారు. అధికారిక వివరాలు వెలువడే వరకు ఈ వీడియోపై ఊహాగానాలు కొనసాగే అవకాశం ఉంది.
