రాయలసీమ న్యూస్, బిజినెస్ డెస్క్:
ఆదాయపు పన్ను రిటర్న్ గడువు జూలై 31తో ముగింపు: ఆలస్యానికి జరిమానా, చట్టపరమైన చర్యల హెచ్చరిక
ఆదాయపు పన్ను చెల్లింపుదారులకు ఆదాయపు పన్ను శాఖ కీలక హెచ్చరిక జారీ చేసింది. 2025-26 ఆర్థిక సంవత్సరానికి సంబంధించిన ఆదాయపు పన్ను రిటర్న్ (ITR) దాఖలు చేసేందుకు నిర్ణయించిన గడువు ఈ నెల 31తో ముగియనుంది. జూలై 31ను చివరి తేదీగా నిర్ణయించినట్లు శాఖ స్పష్టం చేసింది.
ఇప్పటికే కోట్లాది మంది తమ ఐటీఆర్‌ను దాఖలు చేసినప్పటికీ, ఇంకా రిటర్న్ దాఖలు చేయని పన్ను చెల్లింపుదారులు వెంటనే ఈ ప్రక్రియను పూర్తి చేయాలని అధికారులు సూచిస్తున్నారు. గడువు పొడిగించే అవకాశం లేదని స్పష్టం చేస్తూ, చివరి నిమిషం వరకు వేచి ఉండవద్దని ఆదాయపు పన్ను శాఖ సోషల్ మీడియా వేదిక X ద్వారా నిరంతరం అవగాహన కల్పిస్తోంది.
గడువు తేదీ తర్వాత ఐటీఆర్ దాఖలు చేసే పన్ను చెల్లింపుదారులకు జరిమానా తప్పనిసరి అవుతుంది. ఆదాయపు పన్ను చట్టంలోని సెక్షన్ 234F ప్రకారం, వార్షిక ఆదాయం రూ.5 లక్షలకు మించి ఉన్నవారు ఆలస్యంగా రిటర్న్ దాఖలు చేస్తే రూ.5,000 వరకు జరిమానా విధించబడుతుంది. వార్షిక ఆదాయం రూ.5 లక్షల లోపు ఉన్న పన్ను చెల్లింపుదారులు ఆలస్యంగా దాఖలు చేస్తే రూ.1,000 జరిమానా చెల్లించాల్సి ఉంటుంది.
జరిమానాతో పాటు ఇతర ఆర్థిక ఇబ్బందులు కూడా ఎదురయ్యే అవకాశం ఉంది. పన్ను బకాయిలు ఉన్న సందర్భంలో ఆదాయపు పన్ను చట్టంలోని సెక్షన్ 234A ప్రకారం బకాయి మొత్తంపై నెలకు 1 శాతం వడ్డీ చెల్లించాల్సి ఉంటుంది. ఆలస్యంగా దాఖలు చేసిన రిటర్న్‌ల ప్రాసెసింగ్ కూడా ఆలస్యం కావడంతో, రీఫండ్ కోసం ఎదురుచూసే పన్ను చెల్లింపుదారులకు డబ్బు అందడంలో జాప్యం ఏర్పడే అవకాశం ఉంది.
ఐటీఆర్‌లో ఆదాయాన్ని దాచిపెట్టడం లేదా తప్పుడు సమాచారం ఇవ్వడం తీవ్రమైన నేరంగా పరిగణించబడుతుంది. ఉద్దేశపూర్వకంగా పన్ను ఎగవేయడం, పదేపదే నిబంధనలు ఉల్లంఘించడం వంటి సందర్భాల్లో చట్టపరమైన చర్యలు ఎదుర్కోవాల్సి వస్తుందని నిపుణులు సూచిస్తున్నారు. నేర తీవ్రతను బట్టి మూడు నెలల నుంచి రెండు సంవత్సరాల వరకు జైలు శిక్ష పడే అవకాశం ఉందని వారు హెచ్చరిస్తున్నారు.
ఈ నేపథ్యంలో ఇంకా ఐటీఆర్ దాఖలు చేయని పన్ను చెల్లింపుదారులు చివరి తేదీ కోసం వేచి ఉండకుండా వీలైనంత త్వరగా రిటర్న్ దాఖలు ప్రక్రియను పూర్తి చేయాలని ఆదాయపు పన్ను శాఖ సూచిస్తోంది. సమయానికి ఐటీఆర్ దాఖలు చేయడం ద్వారా జరిమానాలు, వడ్డీలు, రీఫండ్ ఆలస్యం, చట్టపరమైన సమస్యలను నివారించవచ్చని అధికారులు స్పష్టం చేస్తున్నారు.
