రాయలసీమ న్యూస్, బిజినెస్ డెస్క్:
జియో ఏఐ ఏజెంట్‌, కొత్త మై జియో, టెలిఫ్రేమ్‌
రిలయన్స్‌ ఏజీఎంలో కీలక ప్రకటనలు
ముంబయి: రిలయన్స్‌ ఇండస్ట్రీస్‌ వార్షిక సాధారణ సమావేశం (AGM) వేదికగా జియో పలు సరికొత్త డిజిటల్‌ సేవలను ప్రకటించింది. ఆర్టిఫిషియల్‌ ఇంటెలిజెన్స్‌ను సాధారణ వినియోగదారులకు మరింత చేరువ చేసే దిశగా జియో కాల్‌ ఏఐ ఏజెంట్‌, పూర్తిగా మారిన మై జియో యాప్‌, ఇంటి కోసం జియో టెలిఫ్రేమ్‌ వంటి సేవలను ప్రవేశపెట్టనున్నట్లు జియో ప్లాట్‌ఫామ్‌ మేనేజింగ్‌ డైరెక్టర్‌ ఆకాశ్‌ అంబానీ వెల్లడించారు.
ఇప్పటికే జియో టెలికాం, జియో ఫైబర్‌, జియో ఎయిర్‌ఫైబర్‌ వంటి సేవలతో విస్తృత వినియోగదారుల బేస్‌ను ఏర్పరుచుకున్న రిలయన్స్‌ జియో, ఈసారి ఏఐ ఆధారిత సేవలపై దృష్టి సారించింది. ఫోన్‌ కాల్‌లలోనే ఏఐ సహాయం అందించే విధంగా జియో కాల్‌ ఏజెంట్‌ను తీసుకురావడానికి సిద్ధమవుతోంది.
కాల్‌లోనే ‘హే జియో’ ఏజెంట్‌
జియో నెట్‌వర్క్‌లోనే ఏఐ అసిస్టెంట్‌ను నేరుగా అనుసంధానం చేయనున్నారు. ఇందుకోసం వినియోగదారులు ప్రత్యేకంగా ఏదైనా యాప్‌ డౌన్‌లోడ్‌ చేసుకోవాల్సిన అవసరం ఉండదని కంపెనీ తెలిపింది. ఫోన్‌ కాల్‌ జరుగుతున్న సమయంలో వినియోగదారు ‘హే జియో’ అని పలికితే కాల్‌ ఏజెంట్‌ యాక్టివేట్‌ అవుతుంది. యూజర్‌ అనుమతి తీసుకున్న తర్వాతే ఆ ఏజెంట్‌ కాల్‌లో జాయిన్‌ అవుతుంది.
ఒకేసారి 10మందితో కాన్ఫరెన్స్‌ కాల్‌ జరుగుతున్నా, అందరి మాటలను రియల్‌ టైమ్‌లో గుర్తించి స్థానిక భాషలో ట్రాన్స్‌క్రిప్షన్‌ అందించే సామర్థ్యం ఈ ఏజెంట్‌కు ఉంటుంది. కాల్‌ ముగిసిన తర్వాత మొత్తం సంభాషణను సంక్షిప్తంగా సమ్మరైజ్‌ చేసి చూపిస్తుంది.
జియో కాల్‌ ఏజెంట్‌ ద్వారా యూజర్‌ తరఫున క్యాబ్‌ బుక్‌ చేయడం, ఫుడ్‌ ఆర్డర్‌ చేయడం, రెస్టారెంట్‌లో టేబుల్‌ రిజర్వేషన్‌ చేయడం వంటి పనులు కూడా చేయవచ్చని జియో వివరించింది. ఈ ఏడాది చివరికల్లా అన్ని జియో వినియోగదారులకు ఈ సేవను అందుబాటులోకి తేనున్నట్లు ఆకాశ్‌ అంబానీ ప్రకటించారు.
మై జియో: పర్సనల్‌ ఏఐ అడ్వైజర్‌గా
ప్రస్తుతం మొబైల్‌ రీఛార్జ్‌, అకౌంట్‌ బ్యాలెన్స్‌ తనిఖీ, సర్వీసుల నిర్వహణ కోసం ఉపయోగిస్తున్న మై జియో యాప్‌ను పూర్తిగా కొత్త రూపంలోకి తీసుకురానున్నారు. ఇకపై ఇది పర్సనల్‌ ఏఐ అడ్వైజర్‌, రిలేషన్‌షిప్‌ మేనేజర్‌గా కూడా పనిచేయనుంది.
మెనూల మధ్య తిరగాల్సిన అవసరం లేకుండా, వినియోగదారు అవసరాన్ని చెప్పగానే ఏఐ అసిస్టెంట్‌ సంబంధిత పనిని పూర్తి చేసే విధంగా సదుపాయాలు ఉండనున్నాయి. ఉదాహరణకు జియో బ్రాడ్‌బ్యాండ్‌ కనెక్షన్‌ను మరో చిరునామాకు మార్చాలనుకుంటే, ఏఐ అసిస్టెంట్‌ను అడగడం ద్వారా అవసరమైన ప్రక్రియను అది స్వయంగా పూర్తి చేస్తుంది. విదేశీ ప్రయాణం ప్లాన్‌ చేస్తున్న వినియోగదారులకు తగిన అంతర్జాతీయ రోమింగ్‌ ప్యాక్‌ను సూచించే సామర్థ్యమూ ఈ ఏజెంట్‌కు ఉంటుంది.
యూజర్‌ అనుమతితోనే ఈ ఏఐ ఏజెంట్లు పనిచేస్తాయని, వినియోగదారుల నియంత్రణకే ప్రాధాన్యం ఇస్తామని కంపెనీ స్పష్టం చేసింది.
జియో టెలిఫ్రేమ్‌: ఇంటి కోసం ఏఐ కేంద్రం
ఏజీఎంలో భాగంగా జియో టెలిఫ్రేమ్‌ అనే కొత్త పరికరాన్ని కూడా రిలయన్స్‌ ఆవిష్కరించింది. ఇది ఇంట్లో ఉన్న వివిధ ఏఐ ఏజెంట్లకు కేంద్రంగా పనిచేసేలా డిజైన్‌ చేశారు. రోజువారీ జీవితంలో వినియోగదారుల తరఫున పలు పనులను నిర్వహించేందుకు ఈ పరికరం ఉపయోగపడుతుంది.
గదిలోనే ఉండి వినియోగదారుల అవసరాలను గుర్తించి తగిన సలహాలు, సూచనలు ఇవ్వగలదు. డాక్టర్‌ అపాయింట్‌మెంట్‌ సమయం దగ్గరపడితే గుర్తు చేయడం, వర్షం వచ్చే అవకాశం ఉంటే గొడుగు తీసుకెళ్లాలని సూచించడం వంటి పనులు చేస్తుంది. క్రికెట్‌ మ్యాచ్‌ సమయంలో జియో హాట్‌స్టార్‌ను ప్లే చేయడం, లైవ్‌ స్కోర్‌ను డిస్‌ప్లేపై చూపించడం వంటి వినోద, సమాచారం సేవలను కూడా అందిస్తుంది.
ఈ కొత్త సేవలు, పరికరాల ద్వారా భారతీయ వినియోగదారుల దైనందిన జీవితంలో ఆర్టిఫిషియల్‌ ఇంటెలిజెన్స్‌ వినియోగాన్ని విస్తృత స్థాయిలో పెంచాలని జియో లక్ష్యంగా పెట్టుకుంది.
