రాయలసీమ న్యూస్, చిత్తూరు: చిత్తూరు: మున్సిపల్‌ కార్పొరేషన్‌ మేయర్‌ పదవి బీసీ జనరల్‌ వర్గానికి కేటాయించడంతో చిత్తూరు నగరంలో రాజకీయ వేడి పెరిగింది. ఈ నేపధ్యంలో బలిజ సంఘం నాయకులు కూటమి ప్రభుత్వంపై తీవ్రంగా మండిపడుతున్నారు. మేయర్‌ పదవి సీకే బాబు కుటుంబానికి ఇవ్వకుండా, ఇతర బీసీ వర్గాలకు చెందిన నాయకులకు అవకాశం కల్పించాలని వారు కోరుతున్నారు.
బలిజ సంఘం నాయకులు బీసీ వర్గాలకు చెందిన కటారి హేమలత లేదా కాజూరు బాలాజీ సతీమణికి మేయర్‌ పదవి ఇవ్వాలని డిమాండ్‌ చేశారు. గతంలో సీకే బాబు, ఆయన అనుచరుల చర్యల వల్ల బలిజ సంఘం నాయకులు నష్టపోయారని, నగరం ఆశించిన స్థాయిలో అభివృద్ధి చెందలేదని వారు ఆరోపించారు.
సీకే బాబు కుటుంబానికి మేయర్‌ పదవి కేటాయిస్తే జిల్లా వ్యాప్తంగా బలిజలు ఓటు వేయడానికి నిరాకరిస్తారని బలిజ సంఘం నాయకులు హెచ్చరించారు. తమకు, ఇతర బీసీ వర్గాలకు న్యాయం జరిగేలా కూటమి ప్రభుత్వం నిర్ణయం తీసుకోవాలని వారు కోరుతున్నారు.
బలిజలు, బీసీ నాయకులు, మొదలియార్లు, వడ్డెర్లకు మేయర్‌ పదవి ఇస్తే తమకు అభ్యంతరం లేదని బలిజ సంఘం స్పష్టం చేసింది. అయితే, సీకే బాబు కుటుంబానికి పదవి ఇవ్వడాన్ని మాత్రం వారు తీవ్రంగా వ్యతిరేకిస్తున్నారు.
చిత్తూరు ప్రెస్‌క్లబ్‌లో నిర్వహించిన మీడియా సమావేశంలో బలిజ సంక్షేమ సంఘం జిల్లా అధ్యక్షుడు ఓఎం రామదాసు, యశ్వంత్‌, పూల చందు, రెడ్డిగుంట కిషోర్‌, తులసి తదితరులు పాల్గొన్నారు. సమావేశంలో మేయర్‌ పదవి కేటాయింపుపై తమ అభిప్రాయాలను వెల్లడిస్తూ, కూటమి ప్రభుత్వం నిర్ణయాన్ని పునర్విమర్శించాలని కోరారు.
