రాయలసీమ న్యూస్, చిత్తూరు: కాణిపాకం, చిత్తూరు జిల్లా: స్వయంభు శ్రీ వరసిద్ధి వినాయక స్వామి వారి కాణిపాకం దేవస్థానంలో భక్తుల సౌకర్యార్థం సేవలు, దర్శనం టికెట్లు, ప్రసాదాలు ఇప్పుడు ఆన్‌లైన్ ద్వారా కూడా అందుబాటులోకి వచ్చాయి. ఆలయ ఈవో పెంచల కిషోర్, చైర్మన్ మణి నాయుడు సోమవారం విడుదల చేసిన ప్రకటనలో ఈ విషయాన్ని తెలిపారు.
దేవస్థానానికి వచ్చే భక్తులు వివిధ సేవల కోసం ముందస్తుగా ఆన్‌లైన్‌లో నమోదు చేసుకోవచ్చని అధికారులు పేర్కొన్నారు. దర్శనం, ఆర్జిత సేవలు, ప్రత్యక్ష సేవలు, ప్రసాదములు, పరోక్ష సేవలు వంటి అన్ని ముఖ్య సేవలను డిజిటల్ విధానంలో అందుబాటులోకి తీసుకువచ్చినట్లు తెలిపారు.
భక్తులు దేవస్థానం అధికారిక వెబ్‌సైట్‌ను సందర్శించి సేవలను బుక్ చేసుకోవచ్చు. ఇందుకోసం https://tms.ap.gov.in/#/temple-details/VVSKPK వెబ్‌సైట్‌ను అందుబాటులో ఉంచారు. ఈ వెబ్సైట్ ద్వారా ఆలయంలో లభ్యమయ్యే సేవల వివరాలు, టికెట్ల బుకింగ్, సమయాల సమాచారం పొందవచ్చు.
అలాగే మన మిత్ర వాట్సాప్ గవర్నెన్స్ ద్వారా కూడా సేవలను పొందే విధంగా ఏర్పాట్లు చేశారు. భక్తులు 9552300009 నంబర్‌కు వాట్సాప్ ద్వారా సంప్రదించి దర్శనం టికెట్లు, ఆర్జిత సేవలు, ప్రత్యక్ష సేవలు, ప్రసాదములు, పరోక్ష సేవలను బుక్ చేసుకోవచ్చని అధికారులు తెలిపారు.
ఆన్‌లైన్ సేవల ప్రారంభంతో భక్తులు ముందస్తుగా తమ సేవలను నమోదు చేసుకొని, ఆలయానికి వచ్చే సమయాన్ని సక్రమంగా ప్లాన్ చేసుకోవచ్చని దేవస్థానం అధికారులు భావిస్తున్నారు. ముఖ్యంగా దూర ప్రాంతాల నుంచి వచ్చే భక్తులకు, పండుగ రోజులలో భారీ రద్దీ సమయంలో ఈ ఆన్‌లైన్ వ్యవస్థ ఉపయోగకరంగా ఉండనుందని పేర్కొన్నారు.
కాణిపాకం దేవస్థానం సేవలను డిజిటల్ ప్లాట్‌ఫారమ్‌ల ద్వారా అందుబాటులోకి తీసుకురావడం ద్వారా పారదర్శకత, సమయపాలన, భక్తుల సౌకర్యం మరింత మెరుగుపడుతుందని ఆలయ వర్గాలు ఆశాభావం వ్యక్తం చేస్తున్నాయి. భక్తులు ఈ ఆన్‌లైన్ సేవలను వినియోగించుకొని, స్వయంభు శ్రీ వరసిద్ధి వినాయక స్వామి వారి దర్శనం, సేవలను సులభంగా పొందాలని అధికారులు సూచిస్తున్నారు.
