రాయలసీమ న్యూస్, చిత్తూరు: చిత్తూరు: ఉమ్మడి చిత్తూరు జిల్లాలో మంత్రి నారా లోకేష్ శనివారం పర్యటించనున్నారు. పాకాల, జి.డి.నెల్లూరు మండలాల్లో ఆయన పర్యటనకు సంబంధించిన ఏర్పాట్లు పూర్తయ్యాయి. పర్యటనలో భాగంగా పలువురు దివంగత నేతలు, ప్రముఖుల కుటుంబాలను లోకేష్ పరామర్శించనున్నారు.
పాకాల మండలంలోని అడుసుపల్లి గ్రామానికి లోకేష్ వెళ్లనున్నారు. అక్కడ ఇటీవల అనారోగ్యంతో మరణించిన ఎన్టీఆర్ ట్రస్ట్ చీఫ్ ఆపరేటింగ్ సిస్టం అధికారి గోపి తండ్రి ఆంజనేయుల నాయుడు కుటుంబ సభ్యులను ఆయన పరామర్శించనున్నారు. ఆంజనేయుల నాయుడు మరణంతో కుటుంబం శోకసంద్రంలో మునిగిపోయిన నేపథ్యంలో మంత్రి పరామర్శకు వెళ్లడం ప్రాధాన్యం సంతరించుకుంది.
తరువాత రాత్రికి జి.డి.నెల్లూరు మండలంలోని పెద్ద కాల్వకు లోకేష్ చేరుకోనున్నారు. అక్కడ దివంగత టిడిపి సీనియర్ నేత వసంత్ కుమార్ కుటుంబాన్ని ఆయన పరామర్శించనున్నారు. వసంత్ కుమార్ మరణంతో టిడిపి శ్రేణుల్లో నెలకొన్న విషాద పరిస్థితుల్లో, మంత్రి కుటుంబ సభ్యులకు ధైర్యం చెప్పనున్నారు.
లోకేష్ పర్యటన నేపథ్యంలో పాకాల, జి.డి.నెల్లూరు మండలాల్లో టిడిపి శ్రేణులు చురుకుగా కదులుతున్నాయి. స్థానిక నాయకులు, కార్యకర్తలు పర్యటనకు సంబంధించిన ఏర్పాట్లను సమన్వయం చేస్తున్నారు. గ్రామాల్లో భద్రతా ఏర్పాట్లను కూడా పోలీసులు పర్యవేక్షిస్తున్నారు.
దివంగత నేతల కుటుంబాలను పరామర్శించే కార్యక్రమంతో పాటు, స్థానిక సమస్యలు, అభివృద్ధి అంశాలపై కూడా లోకేష్ స్థానిక ప్రజల నుంచి వివరాలు తెలుసుకునే అవకాశం ఉన్నట్లు పార్టీ వర్గాలు భావిస్తున్నాయి. పర్యటనలో ఆయనతో పాటు స్థానిక ప్రజాప్రతినిధులు, టిడిపి నాయకులు పాల్గొననున్నారు.
