రాయలసీమ న్యూస్, చిత్తూరు: చేతబడి చేశారని భయపెట్టి డబ్బులు కాజేసిన వ్యక్తిని స్థానికులు పట్టుకుని పోలీసులకు అప్పగించిన ఘటన పలమనేరు పట్టణంలో చోటుచేసుకుంది. మంగళవారం పట్టణంలోని దండపల్లె రోడ్డులో ఈ సంఘటన వెలుగుచూసింది.
పోలీసుల సమాచారం ప్రకారం.. ఒక వ్యక్తి ఫకీరు వేషంలో ఇళ్ల వద్దకు తిరుగుతూ ప్రజలను లక్ష్యంగా చేసుకున్నాడు. ఇంట్లో మగవారు లేని సమయంలో ఆడవారిని ప్రత్యేకంగా టార్గెట్ చేసినట్లు తెలిసింది. మీ ఇంటికి చేతబడి చేశారు, దాన్ని తొలగించకపోతే అనర్థాలు జరుగుతాయని భయపెట్టి డబ్బులు వసూలు చేయడం ప్రారంభించాడు.
మీ ఇంట్లో చేతబడి ఉంది, దాన్ని తీయాలంటే నాకు రెండు వేల రూపాయలు ఇవ్వాలని ఆ వ్యక్తి మహిళలను ఒత్తిడి చేసినట్లు స్థానికులు తెలిపారు. ఈ క్రమంలో దండపల్లె రోడ్డులోని రెండు ఇళ్లలో మహిళల నుంచి డబ్బులు తీసుకున్నాడు. ఇదే తరహాలో మూడో ఇంటికి వెళ్లిన సమయంలో అక్కడి యువకులు అతని ప్రవర్తనపై అనుమానం వ్యక్తం చేశారు.
యువకులు అతడిని నిలదీసి వివరాలు అడగగా తడబడినట్లు ప్రత్యక్ష సాక్షులు పేర్కొన్నారు. వెంటనే అతడిని అదుపులోకి తీసుకుని స్థానిక తెదేపా నాయకురాలు పర్వీనా వద్దకు తీసుకెళ్లారు. ఆమె ఆధ్వర్యంలో యువకులు ఆ వ్యక్తిని పలమనేరు పోలీసులకు అప్పగించారు.
పోలీసుల విచారణలో అతను తన పేరు కిరణ్ అని, తాను బళ్లారి ప్రాంతానికి చెందినవాడినని తెలిపినట్లు సమాచారం. అతను ఇలాంటి మోసాలకు పాల్పడిన పూర్వ చరిత్ర ఉందా, మరెవరైనా అతనితో కలిసి ఉన్నారా అన్న కోణాల్లో పలమనేరు సీఐ మోహన్రెడ్డి దర్యాప్తు చేస్తున్నారు.
ఈ సందర్భంగా సీఐ మోహన్రెడ్డి ప్రజలకు అప్రమత్తత అవసరమని సూచించారు. చేతబడి, మంత్రతంత్రాలు, దెయ్యాలు వంటి పేర్లతో ఇంటింటికీ తిరుగుతూ డబ్బులు వసూలు చేసే వ్యక్తులపై నమ్మకం ఉంచవద్దని, ఇలాంటి వారు కనిపించిన వెంటనే సమీప పోలీస్స్టేషన్కు సమాచారం అందించాలని ఆయన ప్రజలను కోరారు.
చేతబడి పేరుతో మోసాలు కొత్తవి కావని, ముఖ్యంగా ఇంట్లో ఒంటరిగా ఉన్న మహిళలను లక్ష్యంగా చేసుకుని ఇలాంటి సంఘటనలు జరుగుతున్నాయని స్థానికులు పేర్కొన్నారు. ఇటీవలి కాలంలో పలుచోట్ల ఇలాంటి ఘటనలు నమోదవుతున్న నేపథ్యంలో ప్రజలు మరింత జాగ్రత్తగా ఉండాలని, అనుమానాస్పద వ్యక్తుల కదలికలు గమనించిన వెంటనే పోలీసులకు తెలియజేయాలని వారు అభిప్రాయపడ్డారు.
