రాయలసీమ న్యూస్, తెలంగాణ డెస్క్:
వాహన తనిఖీల్లో అపశృతి!
లారీ ఢీకొట్టడంతో ఆర్టీవో మృతి
తెలంగాణ లోని జయశంకర్ భూపాలపల్లి జిల్లా గణపురం మండలం చెల్పూరులో ఘోర రోడ్డు ప్రమాదం చోటుచేసుకుంది. వాహనాల తనిఖీలు నిర్వహిస్తున్న ఆర్టీవో వెంకన్నపై లారీ దూసుకెళ్లడంతో మృతిచెందారు. ఈ ఘటన జిల్లా వ్యాప్తంగా సంచలనం సృష్టించింది. ఈ ఘటనపై సమాచారం అందుకున్న పోలీసులు వెంటనే సంఘటనా స్థలానికి చేరుకుని విచారణ చేపట్టారు.
పోలీసులు తెలిపిన వివరాల ప్రకారం... చెల్పూరులోని ఆర్టీవో కార్యాలయం ఎదుట ఆర్టీవో వెంకన్న వాహనాల తనిఖీలు నిర్వహిస్తున్నారు. ఈ సమయంలో ఓ లారీని ఆపే ప్రయత్నం చేయగా, డ్రైవర్ నిర్లక్ష్యంగా వాహనాన్ని ముందుకు నడిపాడు. దీంతో లారీ నేరుగా వెంకన్నను ఢీకొట్టి, ఆయనపై నుంచి దూసుకెళ్లింది. ఈ ప్రమాదంలో తీవ్ర గాయాలైన వెంకన్నను స్థానికులు, సహచరులు వెంటనే ఆస్పత్రికి తరలించే ప్రయత్నం చేశారు. అయితే ఆస్పత్రికి చేరుకునేలోపే ఆయన మృతి చెందారు. లారీ డ్రైవర్ పరారయ్యాడా లేదా అదుపులోకి తీసుకున్నారా అనే విషయంపై వివరాలు ఇంకా వెలువడాల్సి ఉంది. ప్రమాదానికి గల కారణాలపై పోలీసులు దర్యాప్తు చేస్తున్నారు. విధి నిర్వహణలో ఉన్న ప్రభుత్వ అధికారిపై లారీ దూసుకెళ్లడంతో స్థానికులు ఆగ్రహం వ్యక్తం చేస్తున్నారు.
