రాయలసీమ న్యూస్, ఎంటర్‌టైన్‌మెంట్ డెస్క్:
శర్వానంద్–శ్రీను వైట్ల సినిమా: హీరోయిన్‌గా రుక్మిణి వసంత్ పేరు హాట్ టాపిక్
సంక్రాంతి సందర్భంగా వచ్చిన తాజా హిట్‌తో టాలీవుడ్ యంగ్ హీరో శర్వానంద్ మళ్లీ ఫామ్‌లోకి వచ్చారు. ఈ సంక్రాంతికి అందరికంటే ఆలస్యంగా థియేటర్లలోకి వచ్చిన ‘నారీ నారీ నడుమ మురారి’ బలమైన మౌత్ టాక్‌తో ప్రేక్షకులను ఆకట్టుకుని బాక్సాఫీస్ వద్ద మంచి విజయాన్ని సాధించింది. కొంతకాలంగా వరుస పరాజయాలు ఎదుర్కొంటున్న శర్వానంద్‌కు ఈ చిత్రం పెద్ద రిలీఫ్‌గా మారింది. దీంతో ఆయన తదుపరి సినిమాలపై భారీ అంచనాలు నెలకొన్నాయి.
ఇక నెక్ట్స్ ప్రాజెక్ట్‌గా శర్వానంద్ దర్శకుడు శ్రీను వైట్లతో సినిమా చేయనున్న విషయం ఇప్పటికే తెలిసిన విషయమే. ‘నారీ నారీ నడుమ మురారి’ సక్సెస్ మీట్‌లో శర్వానంద్ ఈ ప్రాజెక్ట్‌పై ఆసక్తికర వ్యాఖ్యలు చేశారు. మైత్రీ మూవీ మేకర్స్ నిర్మాణంలో తెరకెక్కనున్న ఈ చిత్రం కూడా ఫ్యామిలీ ఎంటర్టైనర్‌గా రూపుదిద్దుకోనుందని టాక్ వినిపిస్తోంది. ఒకప్పుడు వరుస హిట్లు అందుకుని స్టార్ డైరెక్టర్‌గా కొనసాగిన శ్రీను వైట్లకు ఇటీవలి కాలంలో పెద్ద సక్సెస్ లేకపోయినా, శర్వానంద్ మళ్లీ హిట్ ఫామ్‌లోకి రావడంతో ఈ కాంబినేషన్‌పై మంచి అంచనాలు నెలకొన్నాయి.
ఈ సినిమాలో హీరోయిన్ ఎంపికపై ప్రస్తుతం సోషల్ మీడియాలో చర్చ జోరుగా సాగుతోంది. శర్వానంద్ జోడిగా రుక్మిణి వసంత్ నటించనున్నారనే వార్తలు వైరల్ అవుతున్నాయి. ‘కాంతారా’తో పాన్ ఇండియా స్థాయిలో గుర్తింపు పొందిన రుక్మిణి, ప్రస్తుతం పలు పెద్ద ప్రాజెక్టులతో బిజీగా ఉన్నారు. ముఖ్యంగా ఎన్టీఆర్ నటిస్తున్న ‘డ్రాగన్’ చిత్రంలో ఆమె హీరోయిన్‌గా నటిస్తున్నారు. దీంతో శర్వానంద్–రుక్మిణి జంటపై అభిమానుల్లో ఆసక్తి పెరిగింది. అయితే దీనిపై మేకర్స్ నుంచి అధికారిక ప్రకటన రావాల్సి ఉంది.
ఇదిలా ఉండగా, ఈ చిత్రంలో హీరోయిన్‌గా ఆషికా రంగనాథ్ పేరు కూడా ఇటీవల బలంగా వినిపించింది. వీరిద్దరిలో ఎవరు శర్వానంద్ సరసన నటిస్తారు, లేక మరో హీరోయిన్ రేసులోకి వస్తారా అన్నది తెలియాలంటే కొంతకాలం వేచి చూడాల్సిందే. ఒకవేళ రుక్మిణి వసంత్ ఫైనల్ అయితే, ఆమె పాన్ ఇండియా ఇమేజ్ ఈ సినిమాకు అదనపు బలం చేకూర్చే అవకాశం ఉందన్న అభిప్రాయాలు వినిపిస్తున్నాయి.
మరోవైపు ఆషికా రంగనాథ్ కూడా తనకంటూ మంచి గుర్తింపు సంపాదించుకున్నారు. ఇటీవల రవితేజ సరసన ‘భర్త మహాశయులకు విజ్ఞప్తి’ ద్వారా ప్రేక్షకులను పలకరించిన ఆమె, ప్రస్తుతం చిరంజీవి నటిస్తున్న ‘విశ్వంభర’లో కీలక పాత్రలో నటిస్తున్నారు. మొత్తానికి, సంక్రాంతి హిట్‌తో మళ్లీ జోష్‌ మీదకు వచ్చిన శర్వానంద్, శ్రీను వైట్ల ప్రాజెక్ట్ వంటి వరుస సినిమాలతో బిజీగా మారి, కెరీర్‌లో మరో మంచి దశను అందుకునే ప్రయత్నంలో ఉన్నారు.
