రాయలసీమ న్యూస్, హెల్త్ డెస్క్: పూల పరిమళాలు మనసును హత్తుకునేంత మధురంగా ఉంటాయి. ఇప్పటివరకు ఆ పరిమళాలను ప్రధానంగా హెర్బల్‌ టీ రూపంలోనే వినియోగిస్తూ వచ్చారు తయారీదారులు. అయితే తాజాగా అదే పూల సువాసనలను, రుచులను కాఫీతో కలిపే ప్రయత్నాలు మొదలయ్యాయి. దీంతో కాఫీప్రియులకు కొత్త అనుభూతిని అందించే ఫ్లోరల్‌ కాఫీ రకాలు మార్కెట్లోకి అడుగుపెడుతున్నాయి.
సాధారణంగా కాఫీ అంటే చేదు, తీపి, క్రీమీ రుచుల కలయికగా భావిస్తారు. ఇప్పుడు ఆ రుచుల్లోకి పూల సువాసనలూ చేరుతున్నాయి. కాఫీ గింజలకు గులాబీ, లావెండర్‌తో పాటు వెనిల్లా, మల్లె, మందారం, చామంతి వంటి పూల ఫ్లేవర్‌లను జతచేసి ప్రత్యేక మిశ్రణలుగా తయారు చేస్తున్నారు. ఆ తరువాత వాటిని పొడి రూపంలోకి మార్చి వినియోగానికి అందిస్తున్నారు.
ఈ విధంగా తయారైన ఫ్లోరల్‌ కాఫీ కప్పులోకి చేరేసరికి కమ్మని కాఫీ రుచితో పాటు ఆయా పూల ప్రత్యేక రుచులు, పరిమళాలు కలగలిపి మరింత ఆకర్షణీయంగా మారుతోంది. ఉదయం లేదా సాయంత్రం వేళల్లో అలవాటైన కాఫీకి భిన్నమైన అనుభూతి కోరుకునే వారికి ఈ కొత్త రకాలు ఆసక్తిని రేకెత్తిస్తున్నాయి.
కేవలం రుచి, వాసనలకే పరిమితం కాకుండా, వినియోగదారుల అభిరుచిని దృష్టిలో పెట్టుకుని ఫ్లోరల్‌ కాఫీని కూడా పలు రూపాల్లో అందిస్తున్నారు. లాటె, ఇన్‌స్టంట్‌ వంటి వెరైటీల్లో ఈ కాఫీని తయారు చేసి మార్కెట్లోకి తీసుకొస్తున్నారు. ఇంట్లో సులభంగా కలుపుకునే ఇన్‌స్టంట్‌ రూపం నుంచి, కేఫేల్లో లభించే లాటె వరకూ విభిన్న ఎంపికలు ఉండేలా చూస్తున్నారు.
కాఫీపై ఇప్పటికే ఉన్న మక్కువకు కొత్త రుచులు, పరిమళాలు తోడవడంతో కాఫీప్రియుల ఆసక్తి మరింత పెరుగుతోంది. ఒకే రకమైన కాఫీకి బదులుగా రోజుకో కొత్త ఫ్లేవర్‌ ప్రయత్నించాలనుకునే యువత, నగరాల్లోని కేఫే సంస్కృతిని ఆస్వాదించే వర్గాలు ఈ ఫ్లోరల్‌ కాఫీ వైపు మొగ్గుచూపుతున్నాయి.
హెర్బల్‌ టీలతో మొదలైన పూల ప్రయాణం ఇప్పుడు కాఫీ కప్పుల వరకూ చేరింది. ఆరోగ్యంపై శ్రద్ధ పెరుగుతున్న నేపథ్యంలో పూల ఆధారిత పానీయాలపై ఆసక్తి పెరుగుతుండటం, వినియోగదారుల రుచుల్లో వస్తున్న మార్పులు ఈ కొత్త ఫ్లోరల్‌ కాఫీ ట్రెండ్‌కు మరింత బలం చేకూర్చుతున్నాయని పరిశ్రమ వర్గాలు భావిస్తున్నాయి.
