రాయలసీమ న్యూస్, హెల్త్ డెస్క్: ఈ మధ్య కాలంలో బరువు తగ్గడం, ఆరోగ్యాన్ని కాపాడుకోవడం లక్ష్యంగా చాలామంది సాధారణ టీకి బదులుగా గ్రీన్ టీ, బ్లాక్ టీ వైపు మొగ్గు చూపుతున్నారు. ముఖ్యంగా డయాబెటిస్ ఉన్నవారు, లేదా మధుమేహం రాకుండా జాగ్రత్త పడే వారు ఈ రెండు రకాల టీలు ఎక్కువగా తాగుతున్నారు. అయితే ఇవి రెండూ ఒకే రకమైన కామెల్లియా సినెన్సిస్ మొక్క ఆకుల నుంచే వచ్చినప్పటికీ, తయారీ విధానంలో ఉన్న తేడాల వల్ల శరీరంపై చూపే ప్రభావం భిన్నంగా ఉంటుంది.
గ్రీన్ టీ ఆకులను ఎక్కువగా ప్రాసెస్ చేయరు. అందువల్ల అందులో ఉండే EGCG కాటెచిన్స్ అనే యాంటీ ఆక్సిడెంట్లు అలాగే నిల్వ ఉంటాయి. బ్లాక్ టీ విషయంలో మాత్రం ఆకులను పూర్తిగా ఆక్సీకరణం అయ్యేలా ప్రాసెస్ చేస్తారు. దీంతో అందులోని పాలీఫెనాల్స్ రూపం మారి Theaflavins, Thearubigins వంటి వేరే సమ్మేళనాలుగా మారిపోతాయి. ఈ చిన్న తేడానే రక్తంలో చక్కెర స్థాయిలపై గమనించదగ్గ ప్రభావం చూపుతుంది.
పరిశోధనల ప్రకారం ఖాళీ కడుపుతో ఉన్నప్పుడు గ్రీన్ టీ తాగితే పరగడుపున ఉండే బ్లడ్ షుగర్ సుమారు 2.1 mg/dL వరకు తగ్గే అవకాశం ఉంది. బ్లాక్ టీ అయితే ఖాళీ కడుపుతో ఉన్నప్పుడు రక్తంలో చక్కెర స్థాయిలపై పెద్దగా ప్రభావం చూపలేదని అధ్యయనాలు సూచిస్తున్నాయి.
వయస్సు, ప్రాంతం పరంగా చూస్తే 55 ఏళ్లలోపు వయసున్నవారిలో, ముఖ్యంగా ఆసియా దేశాలకు చెందిన వారిలో గ్రీన్ టీ బ్లడ్ షుగర్ తగ్గించడంలో మరింత ప్రభావవంతంగా పనిచేసిందని పరిశోధనలు చెబుతున్నాయి. బ్లాక్ టీ విషయంలో ఇలాంటి ప్రత్యేక ప్రభావాలు గమనించబడలేదు.
భోజనం చేసిన తర్వాత రక్తంలో గ్లూకోజ్ ఒక్కసారిగా ఎగబాకకుండా నియంత్రించడంలో కూడా గ్రీన్ టీ మంచి ఫలితాలు చూపింది. అన్నం, టిఫిన్ వంటి పిండి పదార్థాలు తీసుకున్న తర్వాత గ్రీన్ టీ తాగిన వారిలో భోజనం అనంతర షుగర్ లెవెల్స్ తక్కువగా నమోదయ్యాయి. అదే సమయంలో బ్లాక్ టీ తాగిన వారిలో అంత స్థాయిలో నియంత్రణ కనిపించలేదని ఒక వారం పాటు జరిగిన పరిశోధనలో తేలింది.
గ్రీన్ టీ లోని EGCG కార్బోహైడ్రేట్లు త్వరగా విచ్ఛిన్నం కాకుండా అడ్డుకోవడం ద్వారా రక్తంలో గ్లూకోజ్ ఒక్కసారిగా పెరగకుండా సహాయపడుతుంది. బ్లాక్ టీ లో కూడా యాంటీ ఆక్సిడెంట్లు ఉన్నప్పటికీ, అవి ఆక్సీకరణం అయిన పాలీఫెనాల్స్ రూపంలో ఉండటం వల్ల షుగర్ కంట్రోల్ విషయంలో గ్రీన్ టీంత ప్రభావం చూపలేదని అధ్యయనాలు సూచిస్తున్నాయి.
దీర్ఘకాలిక నియంత్రణ సూచిక అయిన HbA1c విషయంలో కూడా గ్రీన్ టీకి కొంత ప్రయోజనం ఉన్నట్లు మెటా విశ్లేషణల్లో తేలింది. ప్రతిరోజూ గ్రీన్ టీ తాగడం వల్ల HbA1c సుమారు 0.30 శాతం వరకు తగ్గే అవకాశం ఉందని నివేదికలు చెబుతున్నాయి. బ్లాక్ టీ విషయంలో మాత్రం HbA1c రీడింగ్స్‌లో చెప్పుకోదగ్గ మార్పు కనిపించలేదు.
నిపుణుల సూచనల ప్రకారం రోజుకు 2–3 కప్పుల వరకు గ్రీన్ టీ తాగవచ్చు. ముఖ్యంగా అన్నం, రొట్టెలు వంటి పిండి పదార్థాలు ఉన్న భోజనం చేసిన 30 నిమిషాల లోపు గ్రీన్ టీ తాగితే మంచి ఫలితాలు రావచ్చని అధ్యయనాలు సూచిస్తున్నాయి. అయితే గ్రీన్ టీ గానీ, బ్లాక్ టీ గానీ ఏదైనా తాగినా అందులో చక్కెర కలపకూడదు. చక్కెర కలిపిన వెంటనే రక్తంలో గ్లూకోజ్ పెరిగిపోవడం వల్ల టీ వల్ల కలిగే ప్రయోజనం తగ్గిపోతుంది. పాలు, తేనె కలపడం కూడా మధుమేహం ఉన్నవారికి అనుకూలం కాదని నిపుణులు హెచ్చరిస్తున్నారు.
మొత్తం మీద రక్తంలో షుగర్ స్థాయిలను నియంత్రణలో ఉంచుకోవడంలో గ్రీన్ టీ, బ్లాక్ టీతో పోలిస్తే మెరుగైన ఫలితాలు ఇస్తోందని పరిశోధనలు సూచిస్తున్నాయి. ఖాళీ కడుపుతో ఉన్నప్పటికీ, భోజనం చేసిన తర్వాత అయినా గ్రీన్ టీ రక్తంలో చక్కెర స్థాయిలను సమతుల్యం చేయడంలో సహాయపడుతోంది. అయితే మధుమేహం ఉన్నవారు ఏ రకమైన టీ అయినా వైద్యుల సలహా మేరకు, చక్కెర–పాలు లేకుండా మాత్రమే తీసుకోవాలని నిపుణులు సూచిస్తున్నారు.
