రాయలసీమ న్యూస్, ఇంటర్నేషనల్ డెస్క్: అగ్ర రాజ్యం అమెరికాలో మరోసారి సామూహిక కాల్పుల ఘటన సంచలనం రేపింది. వాషింగ్టన్ రాష్ట్రంలోని సియాటెల్ నగరంలో జరుగుతున్న ప్రముఖ ‘బైట్ ఆఫ్ సియాటెల్’ ఫుడ్ ఫెస్టివల్‌లో గుర్తు తెలియని దుండగులు కాల్పులు జరపడంతో ముగ్గురు మృతి చెందగా, మరో నలుగురు గాయపడ్డారు. నగరంలోని ప్రసిద్ధ స్పేస్ నీడిల్ సమీపంలో ఉన్న సియాటెల్ సెంటర్ వద్ద ఈ ఘటన చోటుచేసుకుంది.
ఒక అనుమానితుడిని అదుపులోకి తీసుకున్నట్లు సియాటెల్ మేయర్ కార్యాలయం వెల్లడించింది. ప్రాథమిక దర్యాప్తు ప్రకారం ఇద్దరు వ్యక్తులు ఒకరిపై ఒకరు కాల్పులు జరిపినట్లు పోలీసులు భావిస్తున్నారు. ఘటనాస్థలం నుంచి రెండు తుపాకులను స్వాధీనం చేసుకున్నట్లు అధికారులు తెలిపారు. ఒక అనుమానితుడిని అరెస్ట్ చేసినప్పటికీ మరో నిందితుడి కోసం గాలింపు కొనసాగుతోంది.
సియాటెల్ సెంటర్‌లో కాల్పులు జరిగాయి. పలువురు బాధితులు ఉన్నారు. ప్రజలు ఆ ప్రాంతానికి వెళ్లకుండా ఉండాలి. మరిన్ని వివరాలు త్వరలో వెల్లడిస్తాం.
స్థానిక కాలమానం ప్రకారం సాయంత్రం 6 గంటల సమయంలో సియాటెల్ సెంటర్‌లో కాల్పులు ప్రారంభమయ్యాయి. ఆ సమయంలో అక్కడ వార్షిక ‘బైట్ ఆఫ్ సియాటెల్’ ఫుడ్ ఫెస్టివల్ జరుగుతోంది. ఈ వేడుకలో వందలాది స్థానిక ఆహార విక్రేతలు స్టాళ్లు ఏర్పాటు చేసుకోవడంతో పాటు ప్రత్యక్ష సంగీత కార్యక్రమాలు కొనసాగుతుండగా, ఒక్కసారిగా కాల్పులు జరగడంతో అక్కడ భయానక పరిస్థితులు నెలకొన్నాయి.
ఘటనకు సంబంధించిన వీడియోలు సోషల్ మీడియాలో వైరల్ అవుతున్నాయి. వీడియోల్లో ఒక్కసారిగా తుపాకీ శబ్దాలు వినిపించడంతో ప్రజలు ప్రాణాలు అరచేతిలో పెట్టుకుని పరుగులు తీస్తున్న దృశ్యాలు కనిపిస్తున్నాయి. ప్రత్యక్ష సాక్షుల వివరాల ప్రకారం ఏడు నుంచి ఎనిమిది రౌండ్ల కాల్పులు జరిగినట్లు తెలుస్తోంది. కాల్పుల శబ్దం వినిపించగానే ప్రజలు అన్ని వైపులా పరుగులు తీశారని ప్రత్యక్ష సాక్షులు చెబుతున్నారు.
25 ఏళ్ల ప్రత్యక్ష సాక్షి ఎస్టాన్ వాకోనాబో తెలిపిన వివరాల ప్రకారం, ఫుడ్ ఫెస్టివల్‌కు భారీ సంఖ్యలో ప్రజలు రావడంతో అప్పటికే అక్కడ కిక్కిరిసిన పరిస్థితి నెలకొని ఉందని చెప్పారు. కాల్పులు ప్రారంభమైన వెంటనే ప్రజలు ఒకరినొకరు తోసుకుంటూ పరుగులు తీయడంతో తొక్కిసలాట చోటుచేసుకుందని ఆయన పేర్కొన్నారు. తర్వాత తిరిగి ఘటనాస్థలానికి వెళ్లినప్పుడు పలువురు గాయాలతో నేలపై పడిఉండడాన్ని, అలాగే ఒక మృతదేహాన్ని పసుపు రంగు వస్త్రంతో కప్పి ఉంచిన దృశ్యాన్ని చూసినట్లు వాకోనాబో వెల్లడించారు.
‘బైట్ ఆఫ్ సియాటెల్’ ఫుడ్ ఫెస్టివల్ 1982లో ప్రారంభమైంది. ప్రతి సంవత్సరం మూడు రోజుల పాటు జరిగే ఈ ఉత్సవానికి సుమారు 3.5 లక్షల మంది హాజరవుతుంటారు. ఆహారం, పానీయాలు, సాంస్కృతిక కార్యక్రమాలతో ఈ వేడుకకు ప్రత్యేక గుర్తింపు ఉంది. అయితే ఈసారి జరిగిన కాల్పుల ఘటనతో ఫెస్టివల్ విషాదంలో ముగిసింది. ప్రస్తుతం పోలీసులు కేసు నమోదు చేసి దర్యాప్తు కొనసాగిస్తున్నారు.
