రాయలసీమ న్యూస్, నంద్యాల: నంద్యాల జిల్లా మహానంది మండలం బుక్కాపురం గ్రామంలో మహిళల భద్రత, బాలల హక్కులు, సైబర్ నేరాలపై పోలీసు శాఖ ఆధ్వర్యంలో బుధవారం అవగాహన కార్యక్రమం జరిగింది. గ్రామంలోని పొదుపు భవనంలో నిర్వహించిన ఈ సమావేశంలో అంగన్వాడీ టీచర్లు, మహిళలు పాల్గొన్నారు.
మహానంది ఎస్ఐ ఎస్. రామ్మోహన్ రెడ్డి మాట్లాడుతూ, మహిళల భద్రత కోసం రూపొందించిన శక్తి యాప్ వినియోగంపై వివరించారు. ప్రతి మహిళ తమ మొబైల్ ఫోన్లో శక్తి యాప్ డౌన్లోడ్ చేసుకుంటే ఆపద సమయంలో పోలీసుల తక్షణ సహాయం పొందవచ్చని ఆయన తెలిపారు.
కార్యక్రమంలో శక్తి యాప్తో పాటు బాల్య వివాహాలు, సైబర్ నేరాలు, అత్యవసర సేవల కోసం వినియోగించే 100, 112, 1098, 1930 నంబర్లు, మైనర్ల డ్రైవింగ్ ప్రమాదాలు, మహిళలు, చిన్నపిల్లలపై జరిగే నేరాలు, అపరిచితుల పట్ల జాగ్రత్తలు వంటి అంశాలపై పాల్గొన్న వారికి అవగాహన కల్పించారు.
ఎస్ఐ ఎస్. రామ్మోహన్ రెడ్డి బాల్య వివాహాలపై మాట్లాడుతూ, అలాంటి వివాహాలు చట్టరీత్యా నేరమని స్పష్టం చేశారు. తల్లిదండ్రులు, పెద్దలు బాల్య వివాహాలు జరగకుండా కట్టుదిట్టమైన చర్యలు తీసుకోవాలని సూచించారు.
సైబర్ నేరాల విషయంలో ప్రతి ఒక్కరూ అప్రమత్తంగా ఉండాలని ఎస్ఐ సూచించారు. తెలియని లింకులు, సందేశాలు, కాల్స్ పట్ల జాగ్రత్తగా ఉండాలని, వ్యక్తిగత వివరాలు, బ్యాంకు సమాచారం వంటి వాటిని ఎవరికీ ఇవ్వకూడదని హెచ్చరించారు.
మైనర్ల డ్రైవింగ్ అంశంపై ఆయన ప్రత్యేకంగా దృష్టి ఆకర్షించారు. మైనర్లు వాహనాలు నడపడం చాలా ప్రమాదకరమని, వారు వాహనాలు నడిపి ఏమైనా ప్రమాదం జరిగితే దానికి బాధ్యత వారి తల్లిదండ్రులదేనని ఎస్ఐ పేర్కొన్నారు. తల్లిదండ్రులు పిల్లలకు వాహనాలు ఇవ్వకూడదని, ట్రాఫిక్ నియమాలను పాటించేలా వారిని ప్రోత్సహించాలని సూచించారు.
ఆపద సమయంలో ఉంటే 100, 112 నంబర్లకు ఫోన్ చేస్తే వెంటనే పోలీసులు స్పందిస్తారని ఎస్ఐ వివరించారు. మహిళలు, చిన్నపిల్లలు ఎప్పుడూ జాగ్రత్తగా ఉండాలని, ఎవరిని నమ్మి మోసపోవద్దని ఆయన సూచించారు.
ఈ కార్యక్రమంలో నంద్యాల శక్తి టీం హెడ్ కానిస్టేబుళ్లు డిఎన్ ప్రసాద్, వెంకటేశ్వర్లు పాల్గొన్నారు. మహిళలు, అంగన్వాడీ సిబ్బంది ఈ అవగాహన కార్యక్రమంలో చురుకుగా పాల్గొని, శక్తి యాప్ వినియోగం, అత్యవసర నంబర్ల ప్రాముఖ్యతపై వివరాలు తెలుసుకున్నారు.
