రాయలసీమ న్యూస్, నంద్యాల: నంద్యాల : శ్రీశైలం దేవస్థానం దర్శన విధానాల్లో ముఖ్యమైన మార్పులు చేపట్టింది. సెలవు రోజుల్లో భక్తుల రద్దీ అధికంగా ఉండటంతో, దర్శన వ్యవస్థను పునర్వ్యవస్థీకరించినట్లు దేవస్థానం కార్యనిర్వాహక అధికారి శ్రీనివాసరావు ప్రకటించారు.
దేవస్థానం నిర్ణయించిన కొత్త విధానాల ప్రకారం, ఉదయం వేళల్లో అలంకార దర్శనాన్ని నిర్వహించనున్నారు. ఉదయం నిర్ణీత సమయంలో నేరుగా వచ్చే వీఐపీలకు మాత్రమే స్పర్శదర్శనం అవకాశం కల్పించనున్నారు. సాధారణ భక్తుల కోసం ఉదయం అలంకార దర్శనం ద్వారా స్వామివారి సేవలను అందుబాటులో ఉంచనున్నట్లు దేవస్థానం స్పష్టం చేసింది.
సిఫార్సు లేఖలతో వచ్చే భక్తులకు సాయంత్రం సమయంలో స్పర్శదర్శనం కల్పించనున్నట్లు దేవస్థానం అధికారులు తెలిపారు. ఈ మార్పులతో సెలవు రోజుల్లో కూడా భక్తులందరికీ సజావుగా, సంతృప్తికరంగా దర్శనం జరిగేలా చర్యలు తీసుకున్నట్లు పేర్కొన్నారు.
భక్తులకు మెరుగైన సేవలు, సంతృప్తికర దర్శనం అందించడమే ఈ మార్పుల ప్రధాన లక్ష్యమని EO శ్రీనివాసరావు వెల్లడించారు. దర్శన విధానాల్లో మార్పులు అమలులోకి వచ్చిన తర్వాత దేవస్థానం సిబ్బంది, పాలకమండలి సేవలపై భక్తులు ప్రశంసలు వ్యక్తం చేస్తున్నట్లు సమాచారం.
శ్రీశైలం దేవస్థానం నిర్వహణ, సేవా కార్యక్రమాల పట్ల భక్తుల్లో విశ్వాసం మరింత పెరుగుతోందని దేవస్థానం వర్గాలు భావిస్తున్నాయి. సెలవు రోజుల్లో భక్తుల రద్దీని సమర్థవంతంగా నియంత్రిస్తూ, అందరికీ సౌకర్యవంతమైన దర్శనం కల్పించేందుకు ఈ కొత్త విధానాలు ఉపయోగపడతాయని అధికారులు ఆశాభావం వ్యక్తం చేస్తున్నారు.
