రాయలసీమ న్యూస్, నేషనల్ డెస్క్: 2020 ఈశాన్య ఢిల్లీ అల్లర్ల సమయంలో ఇంటెలిజెన్స్ బ్యూరో ఉద్యోగి అంకిత్ శర్మ హత్య కేసులో ఢిల్లీ న్యాయస్థానం కీలక తీర్పు వెలువరించింది. మాజీ Aam Aadmi Party కౌన్సిలర్ తాహిర్ హుస్సేన్‌తో పాటు మరో నలుగురికి కర్కర్‌డూమా కోర్టు జీవిత ఖైదు శిక్షను విధించింది. ఈ ఘటన అత్యంత తీవ్రమైనదని, సమాజ మనస్సాక్షిని కదిలించిందని ధర్మాసనం వ్యాఖ్యానించింది.
శుక్రవారం కర్కర్‌డూమా కోర్టు తాహిర్ హుస్సేన్, నాజిమ్, ఖాసిం, జావేద్, అనాస్‌లకు జీవిత ఖైదు శిక్షను ఖరారు చేసింది. అంకిత్ శర్మ హత్య కేసులో వీరిని ఈ నెల ప్రారంభంలోనే హత్య, నేరపూరిత కుట్రతో పాటు ఇతర తీవ్రమైన అభియోగాల్లో దోషులుగా నిర్ధారించింది. శిక్ష ఖరారు సందర్భంగా ఈ నేరాన్ని అత్యంత తీవ్రమైన ఘటనగా కోర్టు అభివర్ణించింది.
2020 ఫిబ్రవరిలో ఈశాన్య ఢిల్లీలో చెలరేగిన మత ఘర్షణల సమయంలో అంకిత్ శర్మ హత్య జరిగినట్లు కోర్టు గుర్తుచేసింది. బాధితుడు తన మతానికి చెందిన వ్యక్తి కావడం వల్లనే అతడిపై అత్యంత క్రూరంగా దాడి జరగిందని న్యాయస్థానం వ్యాఖ్యానించింది. నేరం జరిగిన తీరు అత్యంత అమానవీయంగా ఉందని, ఘటనలో కనిపించిన క్రూరత్వం తీవ్ర దిగ్భ్రాంతికి గురిచేసిందని కోర్టు పేర్కొంది.
అంకిత్ శర్మ మృతదేహాన్ని జంతువును ఈడ్చుకెళ్లినట్లుగా చంద్రబాగ్ పులియా వరకు లాక్కెళ్లి, అనంతరం సమీప కాలువలో పడేశారని కోర్టు వివరించింది. బాధితుడి మృతదేహం పట్ల వ్యవహరించిన తీరు అత్యంత హేయంగా ఉందని, ఇలాంటి క్రూరత్వం అసహ్యాన్ని, ఆవేదనను కలిగిస్తోందని న్యాయమూర్తి వ్యాఖ్యానించారు.
ఈ కేసు ‘అరుదైన వాటిలో అత్యంత అరుదైన’ వర్గానికి చెందుతుందని, ఐదుగురు దోషులకు మరణశిక్ష విధించాలని ఢిల్లీ పోలీసులు, ప్రాసిక్యూషన్ కోర్టును కోరాయి. అయితే నిందితులకు మరణశిక్ష విధించేందుకు అవసరమైన ఆధారాలను ప్రాసిక్యూషన్ సమర్పించలేకపోయిందని కోర్టు స్పష్టం చేసింది. ఈ ఐదుగురిలో హింసాత్మక స్వభావం ఉందని లేదా భవిష్యత్తులో ఇలాంటి నేరాలకు పాల్పడే అవకాశం ఉందని నిరూపించే ఆధారాలు రికార్డుల్లో లేవని పేర్కొంది.
దోషుల్లో ఎవరికీ గతంలో నేర చరిత్ర లేదని ధర్మాసనం గుర్తించింది. క్రమశిక్షణలో ఉంచి, చట్టాన్ని గౌరవించేలా మార్చే అవకాశం ఉందని అభిప్రాయపడింది. మరణశిక్ష విధించడంపై చట్టపరమైన నిషేధం ఏమీ లేకపోయినా, కేవలం అక్రమ గుంపులో పాల్గొనడం లేదా నేరానికి పాల్పడడం మాత్రమే ఉరిశిక్షకు సరిపోదని కోర్టు స్పష్టం చేసింది. మరణశిక్ష విధించాలంటే మరింత అసాధారణమైన, తీవ్రమైన పరిస్థితులు ఉండాలని ధర్మాసనం పేర్కొంది.
జూలై 13న కర్కర్‌డూమా కోర్టు తాహిర్ హుస్సేన్, నాజిమ్, ఖాసిం, జావేద్, అనాస్‌లను అంకిత్ శర్మ హత్య కేసులో దోషులుగా నిర్ధారించింది. హత్య, నేరపూరిత కుట్రతో పాటు ఇతర అభియోగాల్లో వీరిపై నేరం రుజువైనట్లు వెల్లడించింది. ఇంటెలిజెన్స్ బ్యూరోలో ఉద్యోగిగా పనిచేస్తున్న అంకిత్ శర్మ 2020 ఫిబ్రవరిలో ఈశాన్య ఢిల్లీలో జరిగిన మత ఘర్షణల సమయంలో హత్యకు గురయ్యారు. అనంతరం ఆయన మృతదేహం సమీపంలోని ఓ కాలువలో లభ్యమైంది. ఢిల్లీ అల్లర్లకు సంబంధించిన కేసుల్లో అత్యంత సంచలనం సృష్టించిన కేసుల్లో అంకిత్ శర్మ హత్య కేసు ఒకటిగా నిలిచింది.
