రాయలసీమ న్యూస్, నేషనల్ డెస్క్:
నింగిలోకి దూసుకెళ్లిన విక్రమ్-1
తొలి ప్రైవేట్ ఆర్బిటాల్‌..
స్పేస్‌టెక్‌ స్టార్టప్‌ స్కైరూట్ ఏరోస్పేస్ సంస్థ పూర్తి స్వదేశీ పరిజ్ఞానంతో రూపొందించిన తొలి ప్రైవేట్ ఆర్బిటాల్‌ రాకెట్ విక్రమ్-1 నింగిలోకి దూసుకెళ్లింది. హైదరాబాద్ కేంద్రంగా పనిచేస్తున్న స్కైరూట్ ఏరోస్పేస్ అభివృద్ధి చేసిన విక్రమ్-1ను శ్రీహరికోటలోని సతీశ్‌ ధావన్‌ స్పేస్‌ సెంటర్‌ నుంచి ప్రయోగించారు.
చిన్న ఉపగ్రహాలను భూ కక్ష్యలోకి ప్రవేశపెట్టే సామర్థ్యంతో ఈ రాకెట్‌ను రూపొందించారు. విక్రమ్-1లో ఆధునిక సాంకేతికతను వినియోగించారు. తేలికైన కార్బన్ కాంపోజిట్‌ నిర్మాణం, అధునాతన ప్రొపల్షన్‌ వ్యవస్థలు ఈ రాకెట్ ప్రత్యేకతలుగా ఉన్నాయి. చిన్న ఉపగ్రహాల ప్రయోగాలను తక్కువ ఖర్చుతో, వేగంగా నిర్వహించాలన్న లక్ష్యంతో ఈ ప్రాజెక్టును అభివృద్ధి చేశారు.
విక్రమ్-1 ప్రధాన లక్ష్యం..
350 కిలోల వరకు ఉపగ్రహాలను మోసుకెళ్లే సామర్థ్యం ఉంది. 450 కిలోమీటర్ల ఎత్తులోని లో ఎర్త్ ఆర్బిట్‌లోకి 350 కిలోల వరకు పేలోడ్లను ప్రవేశపెట్టడం. 60 డిగ్రీల వంపు (Inclination) ఉన్న కక్ష్యలో ఉపగ్రహాలను అమర్చేలా ఈ మిషన్‌ను రూపొందించారు. ఇది చిన్న ఉపగ్రహ ప్రయోగాల మార్కెట్‌లో భారత్‌కు కొత్త అవకాశాలను తెరవనుంది.
విక్రమ్-1 ప్రత్యేకతలు..
తయారీ సంస్థ: స్కైరూట్ ఏరోస్పేస్, హైదరాబాద్
రాకెట్ రకం: ఆర్బిటల్-క్లాస్ లాంచ్ వెహికల్
పొడవు: సుమారు 24 మీటర్లు
బరువు: సుమారు 30 టన్నులు
దశలు (Stages):
మూడు ఘన ఇంధన (Solid Fuel) దశలు + 1 లిక్విడ్ ఆర్బిటల్ అడ్జస్ట్‌మెంట్ మాడ్యూల్
పేలోడ్ సామర్థ్యం: గరిష్ఠంగా 350 కిలోల వరకు
కక్ష్య: 450 కిలోమీటర్ల ఎత్తులోని లో ఎర్త్ ఆర్బిట్ (LEO)
కక్ష్య వంపు (Inclination): 60 డిగ్రీలు
విక్రమ్-1లో ఉపయోగించిన సాంకేతికత
కార్బన్ కాంపోజిట్‌తో తేలికైన నిర్మాణం
3D ప్రింటింగ్ సాంకేతికతతో తయారైన కొన్ని కీలక భాగాలు
ఘన ఇంధన రాకెట్ మోటార్లు
చివరి దశలో కక్ష్యను ఖచ్చితంగా సరిచేసే లిక్విడ్ ఆర్బిటల్ అడ్జస్ట్‌మెంట్ మాడ్యూల్
సాంకేతిక సమస్య తో మొదట వాయిదా..
అంతకుముందు.. చివరి నిమిషంలో సాంకేతిక సమస్య కారణంగా ప్రయోగం ఆలస్యమైంది. ఇంధన ప్రక్రియలో సాంకేతిక సమస్యను గుర్తించడంతో ప్రయోగాన్ని నిలిపివేసినట్టు ఇస్రో పేర్కొంది. గుర్తించారు. శాస్త్రవేత్తలు పరిస్థితిని చక్కదిద్దారు. దీంతో 35 నిమిషాలు ఆలస్యంగా ప్రయోగం ప్రారంభమైంది.
