రాయలసీమ న్యూస్, పొలిటికల్ డెస్క్: పశ్చిమ గోదావరి జిల్లా ఆచంట నియోజకవర్గానికి చెందిన ఓ వీరాభిమాని కోరికను ముఖ్యమంత్రి చంద్రబాబు నాయుడు నెరవేర్చారు. ఆచంట నియోజకవర్గం కామధేనువులంక గ్రామానికి చెందిన సత్యనారాయణ అనే వృద్ధుడు సీఎం చంద్రబాబుకు గాఢాభిమాని. తమ నియోజకవర్గానికి ముఖ్యమంత్రి వస్తున్నారనే వార్త తెలిసిన అనంతరం, కనీసం దూరం నుంచైనా ఆయన్ను చూడాలని తన కోరికను వ్యక్తం చేసిన సత్యనారాయణ వీడియో ఇటీవల సామాజిక మాధ్యమాల్లో వైరల్ అయింది.
ఆ వీడియో సీఎం చంద్రబాబు దృష్టికి వెళ్లిన విషయం తెలిసిందే. దీనిపై స్పందించిన ముఖ్యమంత్రి, సత్యనారాయణను సిద్ధాంతంలో కలుసుకుంటానని తెలియజేశారు. ఈ నేపథ్యంలో సోమవారం ‘మీ భూమి – మీ హక్కు’ కార్యక్రమంలో పాల్గొనేందుకు ముఖ్యమంత్రి చంద్రబాబు నాయుడు పశ్చిమ గోదావరి జిల్లా సిద్ధాంతం వెళ్లారు.
కార్యక్రమం అనంతరం సీఎం చంద్రబాబు, తన బస్సులోకి సత్యనారాయణను ప్రత్యేకంగా పిలిపించుకున్నారు. కొద్దిసేపు ఆత్మీయంగా మాట్లాడి ఆయన కుటుంబ పరిస్థితులు, ఆరోగ్య స్థితి గురించి వివరంగా ఆరా తీశారు. ఈ సందర్భంగా తన కుమారుడు అనారోగ్యంతో బాధపడుతున్నాడని, అతనికి వైద్యసాయం అందించాలని సత్యనారాయణ ముఖ్యమంత్రిని కోరినట్లు సమాచారం.
అలాగే తమ కామధేనువులంక గ్రామానికి డ్రైనేజ్ సదుపాయం కల్పించాలని కూడా సత్యనారాయణ ముఖ్యమంత్రికి విన్నవించారు. తన అభిమాని కుమారుడికి అవసరమైన వైద్యసాయం అందేలా చూస్తానని ముఖ్యమంత్రి చంద్రబాబు భరోసా ఇచ్చినట్లు ప్రభుత్వ వర్గాలు తెలిపాయి.
సత్యనారాయణ కుటుంబ పరిస్థితులను పరిగణనలోకి తీసుకున్న ముఖ్యమంత్రి, ఆయనకు ఇల్లు నిర్మించి ఇవ్వాలని సంబంధిత అధికారులను ఆదేశించారు. ఈ మేరకు జిల్లా కలెక్టర్‌కు సీఎం చంద్రబాబు సూచనలు జారీ చేసినట్లు అధికారిక సమాచారం వెల్లడించింది.
ఓ సాధారణ అభిమాని కోరికను గుర్తించి, వ్యక్తిగతంగా కలుసుకుని సమస్యలు తెలుసుకుని చర్యలు ప్రారంభించిన ముఖ్యమంత్రి నిర్ణయంపై స్థానికంగా చర్చనీయాంశంగా మారింది. సత్యనారాయణను కలుసుకోవడం ద్వారా అభిమానులను మరింత దగ్గర చేసిన చర్యగా రాజకీయ వర్గాలు విశ్లేషిస్తున్నాయి.
