రాయలసీమ న్యూస్, స్పోర్ట్స్ డెస్క్:
ఒకే ఓవర్లో రెండు సెంచరీలు..
ఆఫ్ఘన్ బౌలర్లపై విరుచుకుపడ్డ గిల్, ఇషాన్
లక్నోలోని ప్రతిష్ఠాత్మక ఏకానా స్టేడియంలో ఆఫ్ఘనిస్తాన్‌తో జరుగుతున్న రెండో వన్డేలో టీమిండియా బ్యాటర్లు ఆఫ్ఘన్ బౌలర్లపై విరుచుకుపడ్డారు. టాప్ ఆర్డర్ నుంచి వచ్చిన దాడికి ప్రత్యర్థి బౌలర్లు తట్టుకోలేకపోయారు. ఫోర్లు, సిక్సర్ల వర్షంతో స్టేడియం ఉత్సాహంగా మారింది. ఒకే ఓవర్లో రెండు సెంచరీలు నమోదు కావడం ఈ మ్యాచ్‌కు ప్రత్యేక ఆకర్షణగా నిలిచింది.
ఓపెనర్ యశస్వీ జైస్వాల్ త్వరగానే పెవిలియన్ చేరినా, మరో ఎండ్‌లో ఉన్న రోహిత్ శర్మ ఆఫ్ఘన్ బౌలర్లపై దాడి ప్రారంభించాడు. ఆకర్షణీయమైన షాట్లతో స్కోరు బోర్డును పరుగులు పెట్టించాడు. అయితే హాఫ్ సెంచరీకి కేవలం రెండు పరుగుల దూరంలో రోహిత్ ఔటయ్యాడు. 48 పరుగుల వ్యక్తిగత స్కోర్ వద్ద వికెట్ కోల్పోయి నిరాశగా డగౌట్‌కు చేరుకున్నాడు.
రోహిత్ ఔటైన తర్వాత బ్యాటింగ్ బాధ్యతను కెప్టెన్ గిల్ భుజాన వేసుకున్నాడు. గ్రౌండ్ నలుమూలలా క్లాసిక్ షాట్లతో ఆఫ్ఘన్ బౌలర్లను ఇబ్బందులకు గురి చేశాడు. కేవలం 77 బంతుల్లోనే 103 పరుగులు చేసి తన శతకాన్ని పూర్తి చేశాడు. ఒక అందమైన బౌండరీతో సెంచరీ మార్కును అందుకున్నాడు. టీమిండియా కెప్టెన్‌గా గిల్ సాధించిన ఇదే తొలి అంతర్జాతీయ శతకం కావడం విశేషం. మొత్తం అంతర్జాతీయ కెరీర్‌లో ఇది అతని 21వ సెంచరీ.
ఇక మరో ఎండ్‌లో ఉన్న ఇషాన్ కిషన్ కూడా టాప్ గేర్‌లో ఆడాడు. ఆఫ్ఘన్ బౌలర్లను అస్సలు వదలకుండా దాడి కొనసాగించాడు. ఫోర్లు, సిక్సర్లతో గ్రౌండ్‌లో హోరెత్తించాడు. ఈ మ్యాచ్‌లో కీలక మలుపుగా నిలిచింది ఒకే ఓవర్లో రెండు సెంచరీలు నమోదు కావడం. క్రీజులో ఉన్న గిల్ , ఇషాన్ కిషన్ ఇద్దరూ ఒకే ఓవర్లో తమ తమ సెంచరీలను పూర్తి చేసి అరుదైన రికార్డును నమోదు చేశారు.
ఇషాన్ కిషన్ 71 బంతుల్లోనే 103 పరుగులు చేశాడు. అతని ఇన్నింగ్స్‌లో 14 ఫోర్లు, 4 సిక్సర్లు ఉన్నాయి. అంతర్జాతీయ క్రికెట్‌లో ఇది ఇషాన్ కిషన్ రెండో శతకం. గిల్ , ఇషాన్ కిషన్ భాగస్వామ్యం భారత జట్టుకు భారీ స్కోరు దిశగా దూసుకెళ్లేలా చేసింది.
35 ఓవర్లు ముగిసే సమయానికి టీమిండియా రెండు వికెట్ల నష్టానికి 294 పరుగులు చేసింది. ఈ దశలో భారత బ్యాటర్ల దాడి కొనసాగుతుండటంతో ఆఫ్ఘనిస్తాన్ బౌలర్లపై ఒత్తిడి మరింతగా పెరిగింది. గిల్ క్లాస్, ఇషాన్ కిషన్ ఆగ్రెసివ్ బ్యాటింగ్‌తో టీమిండియా స్కోరు భారీ లక్ష్యాన్ని లక్ష్యంగా పెట్టుకున్నట్లు కనిపించింది.
