రాయలసీమ న్యూస్, స్పోర్ట్స్ డెస్క్: జూనియర్‌ ఆసియాకప్‌ హాకీ టోర్నమెంట్‌లో భారత పురుషుల జట్టు జపాన్‌తో జరిగిన పూల్‌-ఎ మ్యాచ్‌లో చివరి నిమిషంలో గోల్‌ చేసి ఓటమిని తప్పించుకుంది. ఆదివారం జరిగిన ఈ పోరు 3-3తో సమానంగా ముగిసింది. తొలి మ్యాచ్‌లో ఇండోనేసియాపై 14-0 తేడాతో ఘన విజయం సాధించిన భారత్‌.. రెండో మ్యాచ్‌లో మాత్రం ఆశించిన స్థాయిలో రాణించలేకపోయింది.
మ్యాచ్‌ ఆరంభం నుంచే భారత్‌ ఆధిపత్యం ప్రదర్శించింది. తొలి క్వార్టర్‌ ప్రారంభంలోనే భారత్‌కు పెనాల్టీ స్ట్రోక్‌ లభించగా, అన్మోల్‌ 4వ నిమిషంలో గోల్‌ చేసి జట్టుకు ఆధిక్యం తీసుకొచ్చాడు. కొద్ది సేపటికే భారత్‌ ఆధిక్యం మరింత పెరిగింది. 10వ నిమిషంలో అషు మౌర్య పెనాల్టీ కార్నర్‌ను గోల్‌గా మలిచి స్కోరును 2-0కు చేర్చాడు.
అయితే భారత్‌ ఆధిక్యం ఎక్కువసేపు నిలవలేదు. 11వ నిమిషంలో రయుషిన్‌ ససాకి గోల్‌ చేయడంతో జపాన్‌ ఖాతా తెరుచుకుంది. దీంతో తొలి క్వార్టర్‌ ముగిసే సమయానికి భారత్‌ 2-1తో ముందంజలో నిలిచింది. రెండో, మూడో క్వార్టర్లలో ఇరుజట్లు గోల్స్‌ కోసం తీవ్రంగా ప్రయత్నించినా, ఫినిషింగ్‌లో లోపం కారణంగా అవకాశాలను గోల్‌లుగా మలచలేకపోయాయి.
నిర్ణాయకమైన నాలుగో క్వార్టర్‌లో జపాన్‌ దూకుడును పెంచింది. 48వ నిమిషంలో కెప్టెన్‌ నకనిషి గోల్‌ చేసి స్కోరును 2-2తో సమం చేశాడు. అనంతరం అదే నకనిషి 59వ నిమిషంలో మరోసారి గోల్‌ చేయడంతో జపాన్‌ 3-2తో ముందంజలోకి వెళ్లి విజయానికి చేరువైంది.
మ్యాచ్‌ ముగియడానికి కేవలం 59 సెకన్లు మాత్రమే ఉండగా భారత్‌కు పెనాల్టీ కార్నర్‌ లభించింది. ఈ కీలక అవకాశాన్ని కెప్టెన్‌ అన్మోల్‌ సద్వినియోగం చేసుకుని గోల్‌ సాధించాడు. దీంతో భారత్‌ 3-3తో స్కోరును సమం చేసి ఓటమి అంచులనుంచి బయటపడింది. పూల్‌-ఎలో భారత్‌కు ఇది రెండో మ్యాచ్‌ కాగా, ఒక విజయం, ఒక డ్రాతో పాయింట్లు సమకూర్చుకుంది.
ఈ టోర్నీలో భారత్‌ తదుపరి మ్యాచ్‌ను మంగళవారం కొరియాతో ఆడనుంది. ఇండోనేసియాపై భారీ విజయంతో బోణీ కొట్టిన భారత జట్టు, జపాన్‌తో డ్రా తర్వాత కొరియాపై విజయం సాధించి సెమీఫైనల్‌ అవకాశాలను బలోపేతం చేసుకోవాలని లక్ష్యంగా పెట్టుకుంది.
ఇక మహిళల జూనియర్‌ ఆసియాకప్‌లో భారత అమ్మాయిలు అద్భుత ఫామ్‌ కొనసాగిస్తున్నారు. వరుసగా రెండో మ్యాచ్‌లోనూ ఘన విజయం సాధించారు. ఆదివారం జరిగిన పోరులో మలేసియాపై 11-1 తేడాతో భారత్‌ విజయం సాధించింది. మ్యాచ్‌ ఆరంభం నుంచి ముగింపు వరకు భారత్‌ ఏకపక్ష ఆధిపత్యం ప్రదర్శించింది.
ఈ మ్యాచ్‌లో పూజ సాహో (1వ, 42వ నిమిషాలు), పూర్ణిమ యాదవ్‌ (4వ, 17వ), గీత యాదవ్‌ (28వ, 53వ), సనిక మానె (43వ, 58వ) చెరో రెండు గోల్స్‌ చేశారు. బినిమా ధాన్‌ (8వ), కృష్ణ శర్మ (14వ), సుఖ్‌వీర్‌ కౌర్‌ (21వ) ఒక్కో గోల్‌ సాధించారు. మలేసియా తరఫున ఏకైక గోల్‌ను నూర్‌ మహ్మద్‌ 38వ నిమిషంలో నమోదు చేసింది.
