రాయలసీమ న్యూస్, స్పోర్ట్స్ డెస్క్: జూనియర్‌ ఆసియాకప్‌ హాకీ టోర్నమెంట్‌లో భారత పురుషుల జట్టు దూకుడు కొనసాగిస్తోంది. చైనీస్‌ తైపీపై భారీ విజయం సాధించి సెమీఫైనల్‌కు చేరుకుంది. కెప్టెన్‌ అన్మోల్‌ ఎక్కా సత్తా చాటడంతో బుధవారం భారత్‌ 15-0 తేడాతో చైనీస్‌ తైపీని చిత్తుగా ఓడించింది.
ఆరంభం నుంచే వరుస దాడులతో ప్రత్యర్థి రక్షణను భారత్‌ ఛిద్రముచేసింది. తొలి అర్ధభాగం ముగిసే సమయానికి భారత్‌ 6-0 ఆధిక్యంలో నిలిచింది. ద్వితీయార్ధంలోనూ అదే జోరును కొనసాగించి గోల్స్‌ వర్షం కురిపించింది.
అన్మోల్‌ ఎక్కా 25వ, 29వ, 32వ, 33వ, 45వ, 51వ నిమిషాల్లో మొత్తం ఆరు గోల్స్‌ నమోదు చేశాడు. ఇవన్నీ పెనాల్టీ కార్నర్ల ద్వారానే రావడం విశేషం. ఆర్యన్‌ 17వ, 52వ, 53వ నిమిషాల్లో మూడు గోల్స్‌ సాధించాడు. హర్‌పాల్‌ 48వ, 53వ నిమిషాల్లో రెండు గోల్స్‌ చేశాడు.
ప్రభ్‌దీప్‌ 18వ నిమిషంలో, గుర్‌సేవక్‌ 22వ నిమిషంలో, అర్జున్‌ సంతోష్‌ 28వ నిమిషంలో, అజీత్‌ యాదవ్‌ 35వ నిమిషంలో తలో గోల్‌ చేసి జట్టు విజయానికి తోడ్పడ్డారు.
నాలుగు మ్యాచ్‌ల నుంచి 10 పాయింట్లు సాధించిన భారత్‌ గ్రూప్‌-ఎను అగ్రస్థానంతో ముగించింది. మూడు మ్యాచ్‌లలో విజయం సాధించిన భారత్‌ ఒక మ్యాచ్‌ను డ్రా చేసింది. మొత్తం 9 పాయింట్లు సాధించిన కొరియా రెండో స్థానంతో సెమీఫైనల్‌కు అర్హత పొందింది. ఆ జట్టు తన చివరి గ్రూప్‌ మ్యాచ్‌లో జపాన్‌ను 3-2 తేడాతో ఓడించింది.
క్వార్టర్స్‌లో భారత్‌–పాక్‌ పోరు
జూనియర్‌ ఆసియాకప్‌ హాకీ టోర్నీలో భారత్‌ కీలక పోరుకు సిద్ధమైంది. గురువారం జరగనున్న క్వార్టర్‌ ఫైనల్లో చిరకాల ప్రత్యర్థి పాకిస్థాన్‌తో తలపడనుంది.
ఎలైట్‌ పూల్‌లో బుధవారం చైనాతో జరిగిన ఆఖరి మ్యాచ్‌ను భారత్‌ 0-0తో డ్రా చేసుకుంది. ఈ మ్యాచ్‌లో రెండు జట్లకు గోల్‌ చేసే అవకాశాలు వచ్చినప్పటికీ వాటిని సద్వినియోగం చేసుకోలేకపోయాయి.
ముఖ్యంగా ఏడో నిమిషంలో చైనా పొందిన పెనాల్టీ స్ట్రోక్‌ను గోల్‌గా మలచడంలో విఫలమైంది. భారత గోల్‌కీపర్‌ నిధి అద్భుతంగా స్పందించి ఈ షాట్‌ను అడ్డుకుంది. తర్వాతి మూడు క్వార్టర్లలోనూ భారత్‌, చైనా జట్లు పొందిన పెనాల్టీ కార్నర్లను వృథా చేశాయి.
ఈ పూల్‌లో భారత్‌ నాలుగు మ్యాచ్‌ల్లో మూడు విజయాలు, ఒక డ్రాతో 10 పాయింట్లు సాధించి అగ్రస్థానంలో నిలిచింది. చైనా కూడా సమాన పాయింట్లు సాధించినప్పటికీ గోల్‌ వ్యత్యాసం కారణంగా రెండో స్థానంలో నిలిచింది.
