రాయలసీమ న్యూస్, శ్రీ సత్యసాయి:
పుట్టపర్తి మున్సిపాలిటీలో పాలన గాడితప్పి..
ప్రజా సమస్యలు పెనుభారంగా
శ్రీసత్యసాయి జిల్లా కేంద్రమైన పుట్టపర్తి మున్సిపాలిటీలో పాలన పూర్తిగా గాడి తప్పిపోయింది. కమిషనర్, రెవెన్యూ, పరిపాలన, ఇంజినీరింగ్, పారిశుద్ధ్య విభాగాల్లో పని చేసే అధికారుల మధ్య సఖ్యత లేకపోవడంతో అభివృద్ధి, సేవల నిర్వహణలో తీవ్ర అంతరాయం ఏర్పడింది. ఫలితంగా ఎక్కడి పనులు అక్కడే ఆగిపోయి, ప్రజా సమస్యలు రోజురోజుకూ మరింత తీవ్రమవుతున్నాయి.
జిల్లా కలెక్టర్ శ్యామ్ప్రసాద్ ఇటీవల మున్సిపాలిటీ కార్యాలయాన్ని ఆకస్మికంగా తనిఖీ చేసి, అధికారుల పనితీరుపై ఆగ్రహం వ్యక్తం చేస్తూ, తీరుతెన్నులు మార్చుకోవాలని హెచ్చరించినా పరిస్థితుల్లో పెద్దగా మార్పు రాలేదని స్థానికులు చెబుతున్నారు. అధికారులంతా తమ ఇష్టానుసారంగా వ్యవహరిస్తున్నారనే విమర్శలు వెల్లువెత్తుతున్నాయి.
క్షేత్రస్థాయిలో పరిస్థితి మరింత దారుణంగా ఉంది. చిత్రావతినది రహదారి విస్తరణ పనులను గుత్తేదారులు గత నవంబరులో ప్రారంభించారు. అయితే బిల్లులు సకాలంలో మంజూరు కాకపోవడంతో పనులు అర్ధాంతరంగా నిలిచిపోయాయి. రహదారి పూర్తికాకపోవడంతో కంకరపై కాలినడకన వెళ్లాల్సి వస్తున్న భక్తులు, పర్యాటకులు, స్థానికులు తీవ్ర ఇబ్బందులు పడుతున్నారు. బిల్లులు ఎప్పుడు మంజూరు అవుతాయో స్పష్టత లేక గుత్తేదారుడు పనులు కొనసాగించేందుకు వెనుకంజ వేస్తున్నాడు.
పట్టణంలో చెత్త తొలగింపునకు అద్దె ట్రాక్టర్ల ఏర్పాటుకు ఇప్పటికే పలుమార్లు టెండర్ ప్రక్రియ నిర్వహించినా గుత్తేదారులు ముందుకు రావడం లేదు. పట్టణంలోని ప్రధాన రహదారులతో పాటు పలు ప్రాంతాల్లో వీధి దీపాలు వెలగక చీకటిమయంగా మారాయి. దీపాల కొనుగోలుకు టెండర్ నిర్వహించినప్పటికీ ఎవరూ ఆసక్తి చూపకపోవడంతో సమస్య అలాగే కొనసాగుతోంది.
తాగునీటి సరఫరా విభాగం పర్యవేక్షణ అధికారి లేకపోవడంతో ఆ వ్యవస్థ అస్తవ్యస్తంగా మారింది. పట్టణంలో ఎక్కడ చూసినా పైపులైన్లు లీకేజీలు, తాగునీటి పథకాలు మరమ్మతులకు గురైనప్పటికీ పర్యవేక్షించే బాధ్యత వహించే నాథులు లేరు. మున్సిపాలిటీలో చెత్త తరలించే కంపాక్టర్లు రెండు మరమ్మతులకు గురైనప్పటికీ వాటిని తిరిగి వినియోగంలోకి తీసుకురావడం లేదు. అద్దె ట్రాక్టర్లతోనే చెత్త తరలింపును నిర్వహిస్తున్నారు.
ట్రాక్టర్ల యజమానులకు గత 11 నెలలుగా బిల్లులు మంజూరు కాకపోవడంతో వారు చెత్త తరలింపును నిలిపివేశారు. ప్రస్తుతం కేవలం ఒక ట్రాక్టర్తో సుమారు 12 టన్నుల చెత్తను తరలించాల్సి రావడంతో కార్మికులు తీవ్ర శ్రమ పడుతున్నారు. చెత్త పేరుకుపోవడంతో పారిశుద్ధ్య పరిస్థితులు మరింత దిగజారుతున్నాయి.
మున్సిపాలిటీని గాడిలో పెట్టేలా కార్యాచరణతో ముందుకు వెళ్తున్నాం. పారిశుద్ధ్యం, తాగునీటి విభాగాలతో పాటు భూగర్భ మురుగునీటి వ్యవస్థ నిర్వహణపై దృష్టి సారించాం.
అని కమిషనర్ శ్రీనివాసులు పేర్కొన్నారు. అయితే నేలమట్టంలో కనిపిస్తున్న పరిస్థితులను దృష్టిలో పెట్టుకుని, మున్సిపాలిటీ పాలనలో స్పష్టమైన మార్పు కోసం ప్రజలు ఎదురుచూస్తున్నారు.
