రాయలసీమ న్యూస్, టెక్నాలజీ డెస్క్: చైనా మార్కెట్లో షియోమీ రెడీమి నోట్ 17 Pro స్మార్ట్‌ఫోన్‌ను అధికారికంగా విడుదల చేసింది. భారీ 9000mAh బ్యాటరీ, 1.5K AMOLED డిస్‌ప్లే, క్కుఅల్కమ్ స్నాప్ద్రగోన్ 6s Gen 4 ప్రాసెసర్, IP66, IP68, IP69, IP69K రేటింగ్స్ వంటి ఫీచర్లతో ఈ ఫోన్‌ను కంపెనీ మార్కెట్లోకి తీసుకొచ్చింది. ఎక్కువ బ్యాటరీ బ్యాకప్ కోరుకునే వినియోగదారులను లక్ష్యంగా చేసుకుని ఈ మోడల్‌ను రూపొందించినట్లు షియోమీ వెల్లడించింది.

డిస్‌ప్లే పరంగా చూస్తే, రెడీమి Note 17 Proలో 6.83 అంగుళాల 1.5K అమోల్డ్ స్క్రీన్‌ను అందించారు. ఈ డిస్‌ప్లే 120Hz రిఫ్రెష్ రేట్, 3200Hz ఇన్‌స్టంట్ టచ్ శాంప్లింగ్ రేట్, 3840Hz PWM డిమ్మింగ్, HDR10+, 12-bit కలర్ డెప్త్‌కు మద్దతు ఇస్తుంది. గరిష్టంగా 3200 నిట్స్ బ్రైట్‌నెస్‌ను అందించగల ఈ స్క్రీన్‌లో కంటి సంరక్షణ కోసం ప్రత్యేకంగా రూపొందించిన “గ్రీన్ మౌంటెన్ ఐ ప్రొటెక్షన్” టెక్నాలజీని ఉపయోగించారు. చీకటి వాతావరణంలో స్క్రీన్ బ్రైట్‌నెస్‌ను 1 నిట్ వరకు తగ్గించే సౌకర్యం కూడా ఇందులో ఉంది.

పనితీరు కోసం ఈ ఫోన్‌లో 4nm తయారీ ప్రక్రియతో రూపొందించిన క్కుఅల్కమ్ స్నాప్ద్రగోన్ 6s Gen 4 చిప్‌సెట్‌ను ఉపయోగించారు. 8GB, 12GB LPDDR4X ర్యామ్ ఆప్షన్లు, గరిష్టంగా 512GB స్టోరేజ్ వేరియంట్లతో రెడీమి Note 17 Pro అందుబాటులో ఉంది. ఈ ఫోన్ ప్రధాన ఆకర్షణ 9000mAh భారీ బ్యాటరీ. దీనికి 67W ఫాస్ట్ ఛార్జింగ్, 22.5W రివర్స్ వైర్డ్ ఛార్జింగ్ సపోర్ట్ ఉంది. రివర్స్ ఛార్జింగ్ ద్వారా ఇతర డివైస్‌లను కూడా ఈ ఫోన్‌తో ఛార్జ్ చేయవచ్చు.

బ్యాటరీపై వినియోగదారులకు అదనపు భరోసా కల్పించేందుకు షియోమీ ప్రత్యేకంగా 5 సంవత్సరాల బ్యాటరీ అప్‌గ్రేడ్ వారంటీని ప్రకటించింది. కంపెనీ వివరాల ప్రకారం, మొదటి నాలుగు సంవత్సరాల్లో బ్యాటరీ సామర్థ్యం 80 శాతం కంటే తక్కువకు పడిపోతే వినియోగదారులకు ఉచితంగా కొత్త బ్యాటరీని అందిస్తారు. ఐదో సంవత్సరంలో బ్యాటరీ సామర్థ్యం 80 శాతం కంటే తక్కువకు చేరితే, మరింత అధిక సామర్థ్యం కలిగిన బ్యాటరీతో ఉచిత అప్‌గ్రేడ్‌ను అందించనున్నట్లు షియోమీ తెలిపింది.

కెమెరా విభాగంలో రెడీమి నోట్ 17 Proలో 50MP ప్రధాన కెమెరా, 2MP డెప్త్ సెన్సార్‌ను ఏర్పాటు చేశారు. సెల్ఫీలు, వీడియో కాల్స్ కోసం 8MP ఫ్రంట్ కెమెరా అందుబాటులో ఉంది. రక్షణ పరంగా ఈ ఫోన్‌కు IP66, IP68, IP69, IP69K రేటింగ్స్ లభించాయి. దీంతో దుమ్ము, నీరు, అధిక పీడనంతో వచ్చే వాటర్ జెట్లను కూడా తట్టుకునే సామర్థ్యం ఈ డివైస్‌కు ఉందని కంపెనీ పేర్కొంటోంది.

సాఫ్ట్‌వేర్ పరంగా రెడీమి నోట్ 17 Proలో ఆండ్రాయిడ్ 16 ఆధారిత HyperOS 3 పనిచేస్తుంది. ఇన్-డిస్‌ప్లే ఫింగర్‌ప్రింట్ సెన్సార్, స్టీరియో స్పీకర్లు, డాల్బీ ఆటమ్స్, NFC, ఇన్‌ఫ్రారెడ్ సెన్సార్, USB టైపు-C, 5G, Wi-Fi 5, బ్లూటూత్ 5.1 వంటి ఫీచర్లు ఈ ఫోన్‌లో ఉన్నాయి.

ధరల విషయానికి వస్తే, రెడీమి నోట్ 17 Pro ప్రస్తుతం చైనా మార్కెట్లో స్కై బ్లూ, నెబుల పర్పుల్, బ్లాక్, వైట్ రంగుల్లో అమ్మకాలకు అందుబాటులో ఉంది. చైనాలో విక్రయాలు ఇప్పటికే ప్రారంభమయ్యాయి. భారత్‌లో లాంచ్ తేదీపై షియోమీ ఇంకా అధికారిక ప్రకటన చేయలేదు.

చైనాలో ఈ ఫోన్ ధరలు ఇలా ఉన్నాయి: 8GB + 128GB వేరియంట్ ధర 1,599 యువాన్, 8GB + 256GB వేరియంట్ 1,899 యువాన్, 12GB + 256GB వేరియంట్ 2,199 యువాన్, 8GB + 512GB వేరియంట్ 2,299 యువాన్‌గా నిర్ణయించారు.