రాయలసీమ న్యూస్, తెలంగాణ డెస్క్: ఆదిలాబాద్ జిల్లా కేంద్రంలోని రిమ్స్ ఆస్పత్రి ఎస్ఎన్సీయూ (SNCU) చిల్డ్రన్స్ వార్డులో సోమవారం అర్ధరాత్రి జరిగిన షార్ట్ సర్క్యూట్ ప్రమాదం తీవ్ర కలకలం రేపింది. వార్డులోని ఏసీ యూనిట్లో అకస్మాత్తుగా పేలుడు సంభవించడంతో అక్కడి మొత్తం ప్రాంతం దట్టమైన పొగతో నిండిపోయింది. పొగతో వార్డు నిండిపోవడంతో అక్కడ ఉన్న తల్లిదండ్రులు, సిబ్బంది ఒక్కసారిగా భయాందోళనకు గురయ్యారు.
ప్రమాదం చోటుచేసుకున్న సమయంలో వార్డులో చికిత్స పొందుతున్న చిన్నారులను తల్లిదండ్రులు, సిబ్బంది కలిసి తొందరగా బయటకు తరలించారు. ఈ ఘటనలో 5 రోజుల పసికందు మృతి చెందినట్లు సమాచారం. పొగ, గందరగోళం కారణంగా మరో 24 మంది పిల్లల ఆరోగ్య పరిస్థితి విషమించింది. వారిలో ముగ్గురు పిల్లల పరిస్థితి అత్యంత సీరియస్గా ఉన్నట్లు వైద్య వర్గాలు ప్రాథమికంగా వెల్లడించాయి.
ప్రమాదం సంభవించిన వెంటనే రిమ్స్ సిబ్బంది విద్యుత్ సరఫరాను నిలిపివేసి, చిల్డ్రన్స్ వార్డులో ఉన్న పిల్లలను పక్కనే ఉన్న ఇతర వార్డులకు తరలించారు. అనంతరం సమీపంలోని ప్రైవేట్ ఆస్పత్రులకు 24 మంది చిన్నారులను తరలించి చికిత్స అందిస్తున్నారు. పిల్లల పరిస్థితిని వైద్యులు నిశితంగా గమనిస్తున్నట్లు ఆస్పత్రి వర్గాలు పేర్కొన్నాయి.
షార్ట్ సర్క్యూట్ కారణంగా ఏసీ యూనిట్లో పేలుడు సంభవించిందా, లేక ఇతర సాంకేతిక లోపాల వల్ల ఈ ప్రమాదం జరిగిందా అన్న దానిపై అధికారుల దర్యాప్తు కొనసాగుతోంది. ఘటన సమాచారం అందుకున్న వెంటనే అగ్నిమాపక సిబ్బంది రిమ్స్కు చేరుకుని సహాయక చర్యలు చేపట్టారు. వార్డు ప్రాంతంలో మిగిలిన పొగను తొలగించి, పరిస్థితిని అదుపులోకి తీసుకువచ్చారు.
ఈ ఘటనపై కలెక్టర్ రాజర్షి ష స్పందించినట్లు సమాచారం. ప్రమాదానికి గల కారణాలు, ఆస్పత్రిలో భద్రతా ప్రమాణాల అమలు, విద్యుత్ వ్యవస్థ నిర్వహణపై సమగ్ర విచారణ జరిపి నివేదిక ఇవ్వాలని సంబంధిత అధికారులకు ఆదేశాలు జారీ చేసినట్లు జిల్లా వర్గాలు చెబుతున్నాయి. చిన్నారుల చికిత్స, వారి ఆరోగ్య పరిస్థితిపై నిరంతరం సమాచారం అందించాలని వైద్య శాఖ అధికారులను కలెక్టర్ ఆదేశించినట్లు తెలుస్తోంది.
రిమ్స్లో జరిగిన ఈ ఘటనతో ఆదిలాబాద్ ప్రజలు తీవ్ర ఆందోళనకు గురయ్యారు. ప్రభుత్వ ఆస్పత్రుల్లో పిల్లల వార్డుల భద్రత, విద్యుత్ పరికరాల నిర్వహణపై మరింత జాగ్రత్తలు తీసుకోవాల్సిన అవసరం ఉందని స్థానికులు అభిప్రాయపడుతున్నారు.
