రాయలసీమ న్యూస్, తెలంగాణ డెస్క్: హైదరాబాద్లోని కేపీహెచ్బీ పోలీస్ స్టేషన్ పరిధిలో మైనర్ బాలికపై అత్యాచారం జరిగిన ఘటన వెలుగులోకి వచ్చింది. ఏడవ తరగతి చదువుతున్న ఓ బాలికపై లైంగిక దాడి చేసినట్లు ఆరోపణలు ఎదుర్కొంటున్న ఉత్తరప్రదేశ్కు చెందిన రెహాన్ను పోలీసులు అరెస్ట్ చేశారు. ఈ సంఘటన స్థానికంగా తీవ్ర ఆగ్రహం, ఆందోళనకు దారితీసింది.
పోలీసులు వెల్లడించిన వివరాల ప్రకారం, నిందితుడు రెహాన్ బాధితురాలి ఇంటి సమీపంలో పండ్లు విక్రయిస్తూ అక్కడే జీవనం సాగిస్తున్నాడు. ఈ క్రమంలో బాలికతో పరిచయం పెంచుకున్నాడు. ఆ పరిచయాన్ని ఆసరాగా చేసుకుని ఆమెపై దృష్టి పెట్టిన నిందితుడు.
రెహాన్ తన ఇంట్లో చాక్లెట్లు, బిస్కెట్లు ఉన్నాయని చెప్పి బాలికను నమ్మబలికి ఇంటికి తీసుకెళ్లాడు. అక్కడ ఆమెపై అత్యాచారానికి పాల్పడినట్లు కేసు దర్యాప్తు వివరాల్లో వెల్లడైంది. ఘటన గురించి ఎవరికైనా చెబితే తీవ్ర పరిణామాలు ఎదుర్కోవాల్సి వస్తుందని బెదిరించినట్లు కూడా పోలీసులు పేర్కొన్నారు.
నిందితుడి బెదిరింపుల కారణంగా భయాందోళనకు గురైన బాలిక నెలల తరబడి ఈ విషయాన్ని ఇంట్లో ఎవరికీ వెల్లడించలేదు. రెహాన్ మరోసారి వేధింపులకు పాల్పడేందుకు ప్రయత్నించడంతో బాలిక మరింత భయంతో, ఆందోళనతో తన తల్లిదండ్రులకు జరిగిన విషయాన్ని చెప్పింది.
బాలిక నుంచి వివరాలు తెలుసుకున్న తల్లిదండ్రులు వెంటనే కేపీహెచ్బీ పోలీస్ స్టేషన్ను ఆశ్రయించి ఫిర్యాదు చేశారు. ఫిర్యాదు స్వీకరించిన పోలీసులు కేసు నమోదు చేసి దర్యాప్తు ప్రారంభించారు. దర్యాప్తు భాగంగా నిందితుడు రెహాన్ను గుర్తించి అదుపులోకి తీసుకున్నారు.
రెహాన్పై ప్రొటెక్షన్ అఫ్ చిల్డ్రన్ ఫ్రొం సెక్సువల్ ఆఫెన్సెస్ (POCSO) చట్టం కింద, అలాగే సంబంధిత భారతీయ దండన చట్టం సెక్షన్ల కింద కేసులు నమోదు చేసినట్లు పోలీసులు తెలిపారు. నిందితుడిని అరెస్ట్ చేసిన అనంతరం కోర్టులో హాజరుపరచి రిమాండ్కు తరలించారు.
ఈ ఘటనపై పోలీసులు మరింత లోతుగా దర్యాప్తు కొనసాగిస్తున్నారు. బాధితురాలి వాంగ్మూలం, వైద్య పరీక్షలు, సంఘటన స్థల పరిశీలనతో పాటు ఇతర సాక్ష్యాధారాలను సేకరిస్తున్నట్లు పోలీసు వర్గాలు పేర్కొన్నాయి. మైనర్ బాలికలపై లైంగిక దాడి కేసులను అత్యంత తీవ్రంగా పరిగణించి, చట్టపరమైన కఠిన చర్యలు తీసుకుంటామని పోలీసులు స్పష్టం చేస్తున్నారు.
