రాయలసీమ న్యూస్, శ్రీ సత్యసాయి:

టిడ్కో ఇళ్ల గందరగోళం:

జిల్లాలో 10 వేల మందికి రూ.3.4 కోట్లు బకాయి

హిందూపురం పట్టణం టిడ్కో ఇళ్ల కోసం సొమ్ము చెల్లించిన లబ్ధిదారుల పరిస్థితి ఇల్లూ దక్కక, చెల్లించిన డబ్బూ తిరిగి అందక ఇరుక్కుపోయిన దుస్థితిగా మారింది. 2017–18లో అప్పటి తెదేపా ప్రభుత్వం పట్టణాల్లో బహుళ అంతస్తుల భవనాలు నిర్మించి, వాటిలోని ఇళ్లను పేదలకు కేటాయించాలని నిర్ణయించింది. ఇందుకోసం కేటాయించే ప్లాటు విస్తీర్ణాన్ని బట్టి లబ్ధిదారుల వాటా పేరుతో రూ.500, రూ.50 వేలు, రూ.లక్ష చొప్పున వసూలు చేశారు.

నిర్మాణాలు కొనసాగుతున్న సమయంలో ప్రభుత్వం మారడంతో టిడ్కో ఇళ్ల పనులు అర్ధాంతరంగా నిలిచిపోయాయి. అనంతరం టిడ్కో ఇళ్ల పథకాన్ని రద్దు చేసి, జగనన్న కాలనీల్లో ఇళ్లను మంజూరు చేశారు. అయితే టిడ్కో ఇళ్ల కోసం తాము చెల్లించిన సొమ్మును తిరిగి ఇవ్వాలని లబ్ధిదారులు పదేపదే డిమాండ్‌ చేసినా, గత వైకాపా ప్రభుత్వం ఐదేళ్లపాటు ఈ అంశాన్ని పట్టించుకోలేదని లబ్ధిదారులు ఆరోపిస్తున్నారు. శ్రీసత్యసాయి జిల్లాలో మాత్రమే సుమారు 10 వేల మంది లబ్ధిదారులకు కలిపి రూ.3.4 కోట్లు రావాల్సి ఉంది. ఇందులో టిడ్కో ఇప్పటికే రూ.2.40 కోట్లు సంబంధిత ఖాతాల్లో జమ చేసింది. మిగిలిన మొత్తాన్ని కూడా చెల్లించాలని ఆదేశాలు జారీ అయినప్పటికీ, అమలు కాలేదని అధికారులు చెబుతున్నారు.

కూటమి ప్రభుత్వం ఏర్పడిన తరువాత టిడ్కో ఇళ్ల లబ్ధిదారుల సమస్యపై ప్రత్యేక దృష్టి సారించినట్లు అధికార వర్గాలు తెలిపాయి. నెల రోజుల క్రితం లబ్ధిదారుల సొమ్మును ఆయా పురపాలక సంఘాలకు మంజూరు చేశారు. లబ్ధిదారుల వివరాలను పరిశీలించి, అర్హులైన వారికి సొమ్ము అందజేయాలని సంబంధిత మున్సిపాలిటీలకు స్పష్టమైన ఆదేశాలు జారీ చేశారు. పట్టణాల్లో చెల్లించాల్సిన మొత్తంలో సుమారు 70 శాతం నిధులను మున్సిపాలిటీల ఖాతాల్లో మొదటి విడతగా జమ చేసినట్లు సమాచారం. పూర్తి సొమ్ము వచ్చిన తరువాత అందరికీ ఒకేసారి చెల్లింపులు చేస్తామని మున్సిపల్‌ అధికారులు తెలియజేస్తున్నారు. ముందుగా అన్ని అవసరమైన పత్రాలు, వివరాలు సమర్పించిన లబ్ధిదారులకు ప్రాధాన్యంగా చెల్లింపులు జరిపి, మిగిలిన వారికి తరువాత విడతల్లో సొమ్ము జమ చేస్తామని టిడ్కో అధికారులు పేర్కొంటున్నారు.