రాయలసీమ న్యూస్, తిరుపతి: తిరుమల: రిలయన్స్ ఇండస్ట్రీస్‌ అధిపతి ముకేశ్‌ అంబానీ కుటుంబసభ్యులతో కలిసి శనివారం తిరుమల శ్రీవేంకటేశ్వర స్వామివారిని దర్శించుకున్నారు. ఉదయం శ్రీవారి ఆలయంలో నిర్వహించిన అభిషేక సేవలో ఆయన కుమారుడు అనంత్‌ అంబానీ, కోడలు రాధికతో కలిసి పాల్గొన్నారు. ఆలయ ఆవరణలోకి చేరుకున్న వెంటనే తితిదే అధికారులు వారికి స్వాగతం పలికారు.
ముకేశ్‌ అంబానీ కుటుంబం ఆలయానికి రాకముందు తితిదే ఈవో రవిచంద్ర, అదనపు ఈవో వెంకయ్య చౌదరి దర్శన ఏర్పాట్లను పర్యవేక్షించారు. వారి బృందంతో కలిసి ఆలయ లోపలి, బయటి ప్రాంతాల్లో భద్రతా, ప్రోటోకాల్‌ చర్యలను సమీక్షించారు. అనంతరం ముకేశ్‌ అంబానీ, అనంత్‌ అంబానీ, రాధికలకు ప్రత్యేక ప్రవేశం కల్పించి శ్రీవారి సన్నిధికి తీసుకెళ్లారు.
దర్శన అనంతరం రంగనాయకుల మండపంలో అంబానీ కుటుంబానికి ప్రత్యేక కార్యక్రమం నిర్వహించారు. అక్కడ పండితులు వేద మంత్రోచ్చారణల మధ్య అంబానీ కుటుంబానికి ఆశీర్వచనం చేశారు. కుటుంబ సభ్యుల సౌభాగ్యం, ఆరోగ్యం, అభ్యుదయానికి శ్రీవారి కటాక్షం లభించాలని పండితులు ప్రార్థనలు చేశారు.
తరువాత తితిదే అధికారులు ముకేశ్‌ అంబానీ కుటుంబానికి శ్రీవారి తీర్థప్రసాదాలను అందజేశారు. స్వామివారి లడ్డూ ప్రసాదంతో పాటు ఇతర తీర్థప్రసాదాలను కూడా వారికి ఇచ్చారు. ఆలయ సంప్రదాయానికి అనుగుణంగా అధికారుల బృందం అంబానీ కుటుంబాన్ని సత్కరించింది.
