రాయలసీమ న్యూస్, వై.యస్.ఆర్: కడప జిల్లాలో అమృత్ 2.0 పథకం కింద చేపడుతున్న తాగునీటి సరఫరా, మురుగునీటి శుద్ధి, జలవనరుల పునరుద్ధరణ పనులను వేగవంతం చేసి, నిర్దేశిత గడువుల్లో పూర్తి చేయాలని జిల్లా కలెక్టర్ డా. శ్రీధర్ చెరుకూరి సంబంధిత శాఖల అధికారులను ఆదేశించారు. బుధవారం కలెక్టరేట్ బోర్డు మీటింగ్ హాలులో అమృత్ 2.0 పనుల పురోగతిపై సమీక్ష సమావేశం నిర్వహించారు.
జిల్లా కలెక్టర్ డా. శ్రీధర్ చెరుకూరి, జాయింట్ కలెక్టర్ డా. నిధి మీనా ఆధ్వర్యంలో జరిగిన ఈ సమావేశంలో అమృత్ 2.0 పథకం అమలు పరిస్థితిని విభాగాల వారీగా పరిశీలించారు. జిల్లా పరిధిలోని కడప, బద్వేల్, మైదుకూరు, ఎర్రగుంట్ల, జమ్మలమడుగు పట్టణ స్థానిక సంస్థల్లో జరుగుతున్న పనుల పురోగతిని అధికారులు వివరించారు.
సమీక్ష సందర్భంగా ప్రతి పట్టణంలో అమలు చేస్తున్న తాగునీటి శుద్ధి కేంద్రాలు, నీటి నిల్వ రిజర్వాయర్లు, పైప్లైన్లు, గృహ కనెక్షన్లు, మురుగునీటి శుద్ధి కేంద్రాలు, చెరువుల పునరుద్ధరణ పనుల స్థితిగతులను జిల్లా కలెక్టర్ క్షుణ్ణంగా పరిశీలించారు. పనుల అమలులో ఎక్కడైనా ఆలస్యం జరుగుతున్న చోట కారణాలు తెలుసుకుని, వాటిని వెంటనే అధిగమించేలా చర్యలు తీసుకోవాలని సూచించారు.
ఇప్పటికే ప్రారంభమైన పనులను మరింత వేగవంతం చేయాలని, పనుల నాణ్యతపై ప్రత్యేక దృష్టి పెట్టాలని కలెక్టర్ అధికారులు ఆదేశించారు. అమృత్ 2.0 పథకం లక్ష్యాలకు అనుగుణంగా తాగునీటి సరఫరా వ్యవస్థను బలోపేతం చేయడంతో పాటు, మురుగునీటి శుద్ధి సదుపాయాలను మెరుగుపరచడం, చెరువులు, జలవనరులను పునరుద్ధరించడం ద్వారా పట్టణాల్లో శాశ్వత పరిష్కారాలు కల్పించాల్సిన అవసరాన్ని ఆయన ఉటంకించారు.
ఇంకా ప్రారంభం కాని పనులను వెంటనే ప్రారంభించేందుకు అవసరమైన పరిపాలనా, సాంకేతిక చర్యలను వేగంగా పూర్తి చేయాలని సంబంధిత విభాగాల ఇంజనీర్లు, అధికారులు సమావేశంలో హామీ ఇచ్చారు. పనుల పురోగతిపై నిరంతర పర్యవేక్షణ కొనసాగిస్తూ, నిర్దేశిత గడువుల్లో అన్ని ప్రాజెక్టులు పూర్తి అయ్యేలా కార్యాచరణ ప్రణాళికను రూపొందించాలని కలెక్టర్ సూచించారు.
సమీక్షలో పట్టణ స్థానిక సంస్థల ప్రతినిధులు, నీటి వనరుల, పంచాయతీ రాజ్, మున్సిపల్, పర్యావరణ సంబంధిత విభాగాల అధికారులు పాల్గొన్నారు. అమృత్ 2.0 పథకం ద్వారా పట్టణ ప్రజలకు మెరుగైన తాగునీటి, పారిశుద్ధ్య సదుపాయాలు అందించేందుకు సమన్వయంతో పనిచేయాలని సమావేశంలో నిర్ణయించారు.
