రాయలసీమ న్యూస్, వై.యస్.ఆర్:
జిల్లాకు రూ.1.07 లక్షల కోట్లకు పైగా పెట్టుబడులు
కడపను ఇంధన, పారిశ్రామిక హబ్గా అభివృద్ధి చేస్తాం: మంత్రి ఎస్. సవిత
వై ఎస్ ఆర్ కడప: రాష్ట్ర అభివృద్ధి, పారిశ్రామిక ప్రగతి, ఉపాధి కల్పనకు ప్రభుత్వం అత్యంత ప్రాధాన్యత ఇస్తోందని జిల్లా ఇన్చార్జి మంత్రి ఎస్. సవిత తెలిపారు. రాయలసీమ, ముఖ్యంగా కడప జిల్లాను పునరుత్పాదక ఇంధన, పారిశ్రామిక రంగాలకు కేంద్రంగా తీర్చిదిద్దే దిశగా ప్రభుత్వం చర్యలు చేపట్టిందని ఆమె పేర్కొన్నారు.
ఎన్డీఏ కూటమి ప్రభుత్వం అధికారంలోకి వచ్చి రెండేళ్లు పూర్తైన సందర్భంగా గురువారం కడప నగరంలోని పుత్తా ఎస్టేట్లో “రాష్ట్రంలో రెండేళ్ల నమ్మకం - అభివృద్ధి - సంక్షేమం” విజయోత్సవ సభ ఘనంగా జరిగింది. ఈ కార్యక్రమానికి రాష్ట్ర బీసీ సంక్షేమ, చేనేత, జౌళి పరిశ్రమల శాఖ మంత్రి, జిల్లా ఇన్చార్జి మంత్రి ఎస్. సవిత ముఖ్య అతిథిగా హాజరయ్యారు. జిల్లా కలెక్టర్ డాక్టర్ శ్రీధర్ చెరుకూరి, జిల్లా ఎస్పీ సెల్కే నచికేత్ విశ్వనాథ్, ప్రభుత్వ విప్లు, కడప ఎమ్మెల్యే సి. ఆదినారాయణ రెడ్డి, జమ్మలమడుగు ఎమ్మెల్యే ఆర్. మాధవి రెడ్డి, మైదుకూరు ఎమ్మెల్యే పుట్టా సుధాకర్ యాదవ్, ప్రొద్దుటూరు ఎమ్మెల్యే నంద్యాల వరదరాజుల రెడ్డి, కమలాపురం ఎమ్మెల్యే పుత్త కృష్ణ చైతన్య రెడ్డి, జిల్లా జాయింట్ కలెక్టర్ డా. నిధి మీన, కడప నగర కమిషనర్ హెచ్.ఎస్. భావన తదితరులు పాల్గొన్నారు.
ఈ సందర్భంగా మంత్రి ఎస్. సవిత మాట్లాడుతూ ప్రపంచవ్యాప్తంగా సౌర, వాయు విద్యుత్ వంటి పునరుత్పాదక ఇంధన వనరుల వినియోగం పెరుగుతున్న నేపథ్యంలో కడప జిల్లాలో భారీ స్థాయిలో సోలార్, పంప్డ్ స్టోరేజ్ ప్రాజెక్టులు అమలవుతున్నాయని తెలిపారు. జిల్లాలో సుమారు 4,500 మెగావాట్ల సామర్థ్యంతో సోలార్ విద్యుత్ ప్రాజెక్టులు వివిధ దశల్లో ఉండగా, ఇప్పటికే 1,100 మెగావాట్లకు పైగా విద్యుత్ ఉత్పత్తి యూనిట్లు గ్రిడ్కు అనుసంధానమయ్యాయని వివరించారు.
ఈ ప్రాజెక్టుల ద్వారా రూ.1.07 లక్షల కోట్లకు పైగా పెట్టుబడులు జిల్లాకు రానుండటంతో పాటు వేలాది ప్రత్యక్ష, పరోక్ష ఉద్యోగాలు సృష్టించబడతాయని మంత్రి చెప్పారు. యువత భవిష్యత్తును దృష్టిలో ఉంచుకుని ప్రత్యేక స్కిల్ డెవలప్మెంట్ కార్యక్రమాలు అమలు చేస్తున్నట్టు తెలిపారు. పరిశ్రమల అవసరాలకు అనుగుణంగా నైపుణ్య శిక్షణలు అందించి స్థానిక యువతకు ఉపాధి అవకాశాలు కల్పించడమే లక్ష్యమని వివరించారు. ఉద్యోగాల కోసం ఇతర ప్రాంతాలకు వలస వెళ్లాల్సిన అవసరం లేకుండా జిల్లాలోనే అవకాశాలు సృష్టిస్తున్నామని పేర్కొన్నారు.
విద్యా రంగంలో ప్రభుత్వ పాఠశాలల అభివృద్ధికి ప్రత్యేక ప్రాధాన్యత ఇస్తున్నట్టు మంత్రి తెలిపారు. నాడు-నేడు కార్యక్రమం ద్వారా పాఠశాలల్లో మౌలిక సదుపాయాలు మెరుగుపరిచామని, మరుగుదొడ్లు, తాగునీటి వసతులు, తరగతి గదుల ఆధునీకరణ వంటి పనులు చేపట్టినట్టు వివరించారు. ప్రతి విద్యార్థికి నాణ్యమైన విద్య అందేలా ప్రభుత్వం కట్టుబడి ఉందని చెప్పారు.
రాష్ట్ర, దేశ అభివృద్ధిలో యువత కీలక పాత్ర పోషించాలని మంత్రి పిలుపునిచ్చారు. ప్రధానమంత్రి నరేంద్ర మోదీ నాయకత్వంలో దేశం అన్ని రంగాల్లో పురోగమిస్తోందని, మహిళా సాధికారత, యువత అభ్యున్నతి, రైతుల సంక్షేమం కోసం అనేక కార్యక్రమాలు అమలవుతున్నాయని ఆమె పేర్కొన్నారు. అభివృద్ధి ఫలాలు సమాజంలోని ప్రతి వర్గానికీ చేరేలా కేంద్ర, రాష్ట్ర ప్రభుత్వాలు సమన్వయంతో పనిచేస్తున్నాయని తెలిపారు.
మౌలిక వసతుల అభివృద్ధిలో భాగంగా జిల్లాలో రోడ్లు, రైల్వే కనెక్టివిటీ విస్తరణకు ప్రాధాన్యత ఇస్తున్నట్టు మంత్రి వెల్లడించారు. సుమారు 500 కిలోమీటర్లకు పైగా రహదారి అభివృద్ధి పనులు కొనసాగుతుండగా, వాటి కోసం రూ.18 వేల కోట్లకు పైగా వ్యయం ప్రతిపాదించబడిందని చెప్పారు. ఈ ప్రాజెక్టులు పూర్తయితే కడప నుంచి హైదరాబాద్, బెంగళూరు, చెన్నై వంటి ప్రధాన నగరాలకు ప్రయాణ సమయం గణనీయంగా తగ్గుతుందని పేర్కొన్నారు.
పండుగలు, సంప్రదాయాలు భారతీయ సంస్కృతికి ప్రతీకలని, మన పెద్దలు అందించిన విలువలు, ఆచారాలను భావితరాలకు అందించాల్సిన బాధ్యత ప్రతి ఒక్కరిపై ఉందని మంత్రి సవిత అన్నారు. పండుగలు ప్రజల్లో ఐక్యత, సామరస్యాన్ని పెంపొందిస్తాయని, యువత సంస్కృతి పరిరక్షణలో ముందుండాలని ఆమె పిలుపునిచ్చారు.
ప్రజల ఆకాంక్షలకు అనుగుణంగా అభివృద్ధి కార్యక్రమాలు అమలు చేస్తూ కడప జిల్లాను రాష్ట్రంలోనే ప్రముఖ పెట్టుబడుల గమ్యస్థానంగా, పారిశ్రామిక కేంద్రంగా తీర్చిదిద్దేందుకు ప్రభుత్వం కట్టుబడి ఉందని మంత్రి స్పష్టం చేశారు. ప్రజల సహకారంతోనే అభివృద్ధి సాధ్యమవుతుందని, చివరికి నిజాయితీ, పారదర్శకత, అభివృద్ధే విజయం సాధిస్తాయని ఆమె పేర్కొన్నారు.
ఈ కార్యక్రమంలో పలు రాష్ట్ర అభివృద్ధి కార్పొరేషన్లకు చెందిన జిల్లా నాయకులు, వివిధ సంక్షేమ శాఖల అధికారులు, జిల్లాకు చెందిన ప్రజాప్రతినిధులు, ఎన్డీఏ కూటమి నాయకులు తదితరులు పాల్గొన్నారు.
