రాయలసీమ న్యూస్, వై.యస్.ఆర్:
జూన్ 22 నుంచి 27 వరకు "రైతన్న మీకోసం" కార్యక్రమం
రాష్ట్ర ప్రభుత్వం చేపట్టిన "రైతన్న మీకోసం" కార్యక్రమాన్ని జిల్లాలో విజయవంతంగా నిర్వహించేందుకు వ్యవసాయ శాఖ విస్తృత ఏర్పాట్లు చేయాలని జిల్లా కలెక్టర్ డాక్టర్ శ్రీధర్ చెరుకూరి ఆదేశించారు. రైతుల అభ్యున్నతి, లాభసాటి వ్యవసాయం, ఆధునిక సాగు పద్ధతులపై అవగాహన కల్పించడమే ఈ కార్యక్రమం ప్రధాన లక్ష్యంగా ప్రభుత్వం నిర్ణయించింది.
జిల్లా కలెక్టర్ సూచనల మేరకు వ్యవసాయ శాఖ ఆధ్వర్యంలో 2026 జూన్ 22 నుంచి 27 వరకు ఈ కార్యక్రమాన్ని మండల, గ్రామ స్థాయిలో నిర్వహించనున్నారు. ఈ సందర్భంగా "రైతన్న మీకోసం" కరపత్రాలను డాక్టర్ శ్రీధర్ చెరుకూరి విడుదల చేశారు. కార్యక్రమం ద్వారా ప్రభుత్వం అమలు చేస్తున్న పథకాలు, ఖరీఫ్ సీజన్కు సంబంధించిన సాగు సూచనలు, ఎరువులు, విత్తనాల లభ్యత వంటి అంశాలు రైతులకు చేరవేయాలని అధికారులు ప్రణాళికలు సిద్ధం చేస్తున్నారు.
ఈ కార్యక్రమంలో వ్యవసాయ, ఉద్యానవన, పశుసంవర్ధక, మత్స్య, పట్టు పరిశ్రమ, సహకార, మార్కెటింగ్ తదితర అనుబంధ శాఖల అధికారులు గ్రామ స్థాయిలో రైతులను ప్రత్యక్షంగా కలుసుకోనున్నారు. ప్రభుత్వం అమలు చేస్తున్న వివిధ పథకాల వివరాలు, సహజ వ్యవసాయం, నీటి యాజమాన్యం, డ్రోన్ సాంకేతికత వినియోగం, పంటల వైవిధ్యీకరణ, మార్కెట్ ఆధారిత పంటల సాగు వంటి అంశాలపై రైతులకు అవగాహన కల్పించేందుకు చర్యలు తీసుకుంటున్నారు.
అలాగే రైతుల సమస్యలు, సూచనలు గ్రామ స్థాయిలోనే స్వీకరించి, సంబంధిత శాఖల ద్వారా పరిష్కారానికి చర్యలు చేపట్టాలని కలెక్టర్ సూచించారు. రైతు సేవా కేంద్రాల ద్వారా అందుబాటులో ఉన్న సేవలు, పంటల నమోదు, పంటల బీమా, వ్యవసాయ యంత్రాల వినియోగం, విలువ ఆధారిత ఉత్పత్తుల తయారీ, ఆహార శుద్ధి అవకాశాలపై కూడా ఈ కార్యక్రమం ద్వారా వివరాలు తెలియజేయనున్నారు.
జిల్లాలోని అన్ని మండలాలు, గ్రామాలలో "రైతన్న మీకోసం" కార్యక్రమాన్ని నిర్వహించేందుకు షెడ్యూల్ సిద్ధం చేశారు. ఈ కార్యక్రమంలో రైతులు అధిక సంఖ్యలో పాల్గొని ప్రభుత్వ సేవలను సద్వినియోగం చేసుకోవాలని జిల్లా కలెక్టర్ డాక్టర్ శ్రీధర్ చెరుకూరి పిలుపునిచ్చారు.
