రాయలసీమ న్యూస్, డిస్ట్రిక్ట్ న్యూస్ డెస్క్:
కమలాపురం–ఖాజీపేట మార్గంలో
లోలెవెల్ వంతెన ప్రమాదకరం
కమలాపురం–ఖాజీపేట ప్రధాన రహదారిపై ఉన్న లో లెవెల్ వంతెన ప్రస్తుతం ప్రయాణికులకు ప్రమాదంగా మారింది. వంతెన పలుచోట్ల దెబ్బతినడంతో సంబంధిత శాఖ అధికారులు ఇటీవల గుత్తేదారుల ద్వారా మరమ్మతు పనులు చేపట్టినప్పటికీ, సమస్య పూర్తిగా పరిష్కారం కాలేదని స్థానికులు చెబుతున్నారు.
వంతెనపై మరమ్మతు పనులు జరుగుతున్న సమయంలో పక్కనే తాత్కాలికంగా బైపాస్ రహదారిని ఏర్పాటు చేశారు. అయితే ఎగువ ప్రాంతాల్లో కురిసిన వర్షాల కారణంగా బైపాస్ రోడ్డుపై వర్షపు నీరు నిరంతరం ప్రవహిస్తోంది. దీతో ఆ తాత్కాలిక రహదారి కొన్ని చోట్ల కుంగిపోతూ, గుంతలు ఏర్పడుతున్నాయని వాహనదారులు ఆందోళన వ్యక్తం చేస్తున్నారు.
బైపాస్ రహదారి స్థితి దారుణంగా ఉండటంతో రెండు వైపులా వాహనాలు నత్తనడకన కదులుతున్నాయి. ముఖ్యంగా రాత్రి వేళల్లో, భారీ వాహనాలు వెళ్లే సమయంలో ప్రమాదాల భయం మరింతగా ఉందని ప్రయాణికులు పేర్కొంటున్నారు. రహదారి ఇరుకుగా ఉండటం, ఒకేసారి రెండు వాహనాలు దాటుకునే అవకాశం లేకపోవడం వల్ల తరచూ ట్రాఫిక్ జామ్లు ఏర్పడుతున్నాయని వారు అంటున్నారు.
వంతెన మరమ్మతు పనులు నెమ్మదిగా సాగడం, బైపాస్ రహదారి బలహీనంగా ఉండటం వల్ల ప్రతిరోజూ ఈ మార్గంలో ప్రయాణించే వాహనదారులు బిక్కుబిక్కుమంటూ రాకపోకలు సాగిస్తున్నారు. చిన్నపాటి పొరపాటు జరిగినా వాహనాలు బైపాస్ రహదారి నుంచి జారిపడే ప్రమాదం ఉందని వారు హెచ్చరిస్తున్నారు.
ఈ పరిస్థితుల్లో సంబంధిత శాఖ అధికారులు, గుత్తేదారులు యుద్ధ ప్రాతిపదికన చర్యలు తీసుకోవాలని వాహనదారులు డిమాండ్ చేస్తున్నారు. వంతెనకు శాశ్వత, నాణ్యమైన మరమ్మతులు చేపట్టి, పనులు పూర్తయ్యే వరకు బైపాస్ రహదారిని బలపరచాలని, అవసరమైతే అదనపు భద్రతా ఏర్పాట్లు చేయాలని కోరుతున్నారు.
ప్రజల ప్రాణాలకు ముప్పు వాటిల్లే ముందే వంతెన మరమ్మతు పనులను వేగవంతం చేసి, రహదారి పరిస్థితిని సురక్షితంగా మార్చాలని స్థానికులు, ప్రయాణికులు ప్రభుత్వాన్ని, సంబంధిత అధికారులను విజ్ఞప్తి చేస్తున్నారు.
