రాయలసీమ న్యూస్, వై.యస్.ఆర్: కడప జిల్లా ప్రొద్దుటూరులోని ఉటుకూరు వీరయ్య ఉన్నత పాఠశాలలో బ్రహ్మకుమారీస్ ఆధ్వర్యంలో నశాముక్త భారత్ అభియాన్ కార్యక్రమాన్ని గురువారం ప్రారంభించారు. మాదకద్రవ్య రహిత భారత్ నిర్మాణ లక్ష్యంతో నిర్వహించిన ఈ కార్యక్రమంలో ప్రధానోపాధ్యాయులు సి.వి. అమర్నాథ్ రెడ్డి, ఓం శాంతి భవన్ నిర్వాహకులు బీకే శాంత, ఉపాధ్యాయులు, విద్యార్థులు పాల్గొన్నారు.
ఈ సందర్భంగా బీకే శాంత మాట్లాడుతూ, యువతను మాదకద్రవ్యాల బారిన పడకుండా కాపాడటం, విలువలతో కూడిన సమాజ నిర్మాణమే నశాముక్త భారత్ అభియాన్ ప్రధాన లక్ష్యమని వివరించారు. విద్యార్థుల్లో వ్యసనాల పట్ల అవగాహన పెంచి, ఆరోగ్యకరమైన జీవన విధానాన్ని అలవర్చుకోవాల్సిన అవసరాన్ని ఆమె ప్రస్తావించారు.
కార్యక్రమంలో భాగంగా విద్యార్థులతో వ్యసన రహిత ప్రతిజ్ఞ చేయించారు. అనంతరం రాజయోగ ధ్యానం నిర్వహించి, ధ్యానం ద్వారా మానసిక ప్రశాంతత, ఆత్మవిశ్వాసం పెంపొందించుకోవచ్చని బీకే శాంత విద్యార్థులకు సూచించారు. నిత్య జీవితంలో కొద్ది నిమిషాలైనా ధ్యానానికి కేటాయిస్తే ఆలోచనా విధానం మారి, చెడు అలవాట్లకు దూరంగా ఉండగలమని ఆమె పేర్కొన్నారు.
ప్రధానోపాధ్యాయులు అమర్నాథ్ రెడ్డి మాట్లాడుతూ, మత్తు పదార్థాలే కాకుండా సెల్ఫోన్, టీవీ వంటి వ్యసనాల నుంచి కూడా విద్యార్థులు దూరంగా ఉండాలని సూచించారు. ఇటువంటి వ్యసనాలు చదువుపై, వ్యక్తిత్వ వికాసంపై ప్రతికూల ప్రభావం చూపుతాయని, సమయాన్ని సద్వినియోగం చేసుకోవాలని ఆయన విద్యార్థులకు సూచించారు.
మంచి స్నేహితులను ఏర్పరుచుకోవడం, కుటుంబ సభ్యులతో సమయం గడపడం, క్రీడలు, పఠనం వంటి సృజనాత్మక కార్యకలాపాల్లో పాల్గొనడం ద్వారా వ్యసనాల బారిన పడకుండా ఉండవచ్చని అమర్నాథ్ రెడ్డి విద్యార్థులకు చాటి చెప్పారు. తమతో పాటు కుటుంబ సభ్యులు, స్నేహితులను కూడా వ్యసనాల నుంచి దూరంగా ఉండేలా చైతన్యం కల్పించాలని విద్యార్థులను ఆయన కోరారు.
కార్యక్రమంలో యోగా ట్రైనర్ వాసు, బీకే సౌజన్య, శేఖర్, పాఠశాల ఉపాధ్యాయులు పాల్గొన్నారు. విద్యార్థులు రాజయోగ ధ్యానం, నశాముక్త భారత్ అభియాన్ లక్ష్యాలపై ఆసక్తి కనబరిచారు. కార్యక్రమం ముగింపులో నిర్వాహకులు విద్యార్థులకు ధన్యవాదాలు తెలిపారు.
