రాయలసీమ న్యూస్, వై.యస్.ఆర్: వేంపల్లె మండలంలోని కుమ్మరాంపల్లి గ్రామంలో ఖరీఫ్ సీజన్ సందర్భంగా నిర్వహించిన "పొలం పిలుస్తోంది" కార్యక్రమంలో రైతులకు పంటల సాగు విధానాలు, ప్రస్తుత వాతావరణ పరిస్థితులపై విస్తృత అవగాహన కల్పించారు. మండల వ్యవసాయ అధికారి బాల గంగాధర్ రెడ్డి అధ్యక్షతన ఈ కార్యక్రమం జరిగింది.
కార్యక్రమంలో పాల్గొన్న రైతులకు వరి పంటలో ఎదురయ్యే సమస్యలు, ఎల్ నినో ప్రభావం నేపథ్యంలో నీటి వినియోగంలో తీసుకోవాల్సిన జాగ్రత్తలపై బాల గంగాధర్ రెడ్డి వివరించారు. సస్యరక్షణ చర్యలు, వరి సాగులో జింక్ సల్ఫేట్ వినియోగం, చవుడు భూముల్లో జిప్సం వాడకం వంటి అంశాలపై ఆయన రైతులకు సూచనలు చేశారు.
అలాగే పంటను ఆశించే కాండం తొలిచే పురుగు, ఆకుముడత వంటి సమస్యల నివారణకు రైతులు తీసుకోవాల్సిన తక్షణ చర్యలను క్షుణ్ణంగా వివరించారు. ఈ సందర్భంగా రైతులు ఎదుర్కొంటున్న సమస్యలను అధికారులు తెలుసుకుని, తగిన సాంకేతిక సూచనలు అందించారు.
ప్రస్తుత వాతావరణ పరిస్థితుల్లో రైతులు ఆరుతడి పంటల సాగుకు ప్రాధాన్యత ఇవ్వాలని వ్యవసాయ అధికారి సూచించారు. పీఎంఎఫ్బీవై (PMFBY) కింద పంటల బీమా నమోదు ప్రక్రియ ఆగస్టు 15 వరకు కొనసాగుతుందని ఆయన తెలిపారు. ప్రతి రైతు తప్పనిసరిగా ఈ-పంట (e-Panta) నమోదుతో పాటు రైతు విశిష్ట గుర్తింపు సంఖ్య (Farmer Registration) పూర్తి చేసుకోవాలని స్పష్టం చేశారు.
ప్రభుత్వం అమలు చేస్తున్న వ్యవసాయ సంక్షేమ పథకాల ప్రయోజనాలు, సున్నా వడ్డీ పంట రుణాలు, పంట నష్టపరిహారం, కనీస మద్దతు ధర వంటి ప్రయోజనాలు పొందేందుకు ఈ నమోదులు అత్యంత అవసరమని బాల గంగాధర్ రెడ్డి పేర్కొన్నారు. రైతులందరూ సమయానికి నమోదు ప్రక్రియ పూర్తి చేసుకుని, పథకాల ప్రయోజనాలు పొందాలని ఆయన సూచించారు.
కార్యక్రమం అనంతరం అధికారులు, సిబ్బంది కలిసి గ్రామ పరిధిలోని పంట పొలాలను సందర్శించారు. క్షేత్రస్థాయిలో పంటల సంరక్షణ, ప్రకృతి వ్యవసాయం వల్ల కలిగే ప్రయోజనాలపై రైతులకు పలు సూచనలు చేశారు. పంటల పెరుగుదల, వ్యాధుల నియంత్రణ, నేల ఆరోగ్యం మెరుగుపరచడం వంటి అంశాలపై రైతులకు ప్రాయోగిక అవగాహన కల్పించారు.
ఈ కార్యక్రమంలో వ్యవసాయ శాఖ సిబ్బంది, ప్రకృతి వ్యవసాయ సిబ్బంది, కుమ్మరాంపల్లి గ్రామ రైతులు పెద్ద సంఖ్యలో పాల్గొన్నారు. రైతులు కార్యక్రమంలో పొందిన సూచనలను తమ పొలాల్లో అమలు చేసి, దిగుబడులు పెంచుకోవాలని అధికారులు ఆకాంక్షించారు.
