రాయలసీమ న్యూస్, చిత్తూరు: మదనపల్లె : జాతీయ చేనేత దినోత్సవాన్ని పురస్కరించుకుని మదనపల్లెలో జనసేన పార్టీ ఆధ్వర్యంలో భారీ ర్యాలీ నిర్వహించారు. రాష్ట్ర చేనేత వికాస విభాగం ప్రధాన కార్యదర్శి అడపా సురేంద్ర నేతృత్వంలో జరిగిన ఈ ర్యాలీకి చేనేత కార్మికులు, కూటమి నాయకులు పెద్ద సంఖ్యలో హాజరయ్యారు.
మున్సిపల్ కార్యాలయం నుంచి సబ్ కలెక్టర్ కార్యాలయం వరకు ర్యాలీ కొనసాగింది. చేనేత కార్మికులు, జనసేన కార్యకర్తలు, కూటమి నాయకులు కలిసి జాతీయ చేనేత దినోత్సవ శుభాకాంక్షలు తెలుపుతూ నినాదాలు చేశారు. ర్యాలీ సందర్భంగా చేనేత రంగ ప్రాధాన్యం, చేనేత కార్మికుల సమస్యలను ప్రస్తావించారు.
ర్యాలీ అనంతరం అడపా సురేంద్ర, కూటమి నాయకులు సబ్ కలెక్టర్ను, చేనేత శాఖ అసిస్టెంట్ డైరెక్టర్ను కలిసి చేనేత రంగ అభివృద్ధికి ప్రభుత్వం మరింత ప్రోత్సాహం అందించాలని కోరారు. చేనేత కార్మికుల సంక్షేమం కోసం ప్రత్యేక చర్యలు తీసుకోవాల్సిన అవసరాన్ని అధికారుల దృష్టికి తీసుకెళ్లారు.
చేనేత రంగం ఎదుర్కొంటున్న ఇబ్బందులు, మార్కెట్ సమస్యలు, ముడి సరుకుల వ్యయభారం, ఆధునికీకరణ అవసరాలపై సమావేశంలో చర్చించినట్లు నిర్వాహకులు తెలిపారు. చేనేత ఉత్పత్తులకు తగిన ప్రోత్సాహం, సరైన ధరలు, విస్తృత మార్కెట్ అవకాశాలు కల్పించాలనే డిమాండ్ను వారు ముందుకు తెచ్చారు.
ఈ కార్యక్రమంలో కూటమి నాయకులు, జనసేన పార్టీ కార్యకర్తలు, వీర మహిళలు, చేనేత కార్మికులు, వివిధ సంఘాల నాయకులు పాల్గొన్నారు. చేనేత కార్మికుల సంక్షేమం, చేనేత రంగ పరిరక్షణకు సమష్టిగా కృషి చేయాల్సిన అవసరాన్ని వారు నొక్కి చెప్పారు. జాతీయ చేనేత దినోత్సవం సందర్భంగా చేనేతకు మరింత మద్దతు లభించాలని పాల్గొన్నవారు ఆకాంక్షించారు.
