రాయలసీమ న్యూస్, బిజినెస్ డెస్క్:
సింగపూర్ పర్యటన రెండో రోజు..
సీఎం చంద్రబాబు కీలక భేటీలు
సింగపూర్‌లో రెండో రోజు పర్యటనలో ఆంధ్రప్రదేశ్ ముఖ్యమంత్రి నారా చంద్రబాబు నాయుడు బిజీ షెడ్యూల్‌తో కొనసాగుతున్నారు. రాష్ట్రానికి పెట్టుబడుల ఆకర్షణ, అమరావతి రాజధాని ప్రాంత అభివృద్ధి, సెమీకండక్టర్ రంగ విస్తరణ వంటి అంశాలపై పలు అంతర్జాతీయ ప్రతినిధి బృందాలు, ప్రపంచ స్థాయి పారిశ్రామికవేత్తలతో ఆయన వరుస భేటీలు నిర్వహించనున్నారు.
మంగళవారం రోజున వరల్డ్ సిటీస్ సమ్మిట్‌లో ముఖ్యమంత్రి కీలకోపన్యాసం చేయనున్నారు. ఈ సదస్సులో లీడర్‌షిప్ ప్లీనరీ-2 విభాగంలో ఆయన ప్రసంగించేందుకు షెడ్యూల్ ఖరారైంది. పట్టణాభివృద్ధి, మౌలిక వసతుల సదుపాయాలు, సుస్థిర నగరాల నిర్మాణం వంటి అంశాలపై ఈ సదస్సులో చర్చలు జరగనున్నాయి.
ఆసియా-పసిఫిక్ సెమికాన్ ఎకోసిస్టమ్‌పై నిర్వహించే రౌండ్ టేబుల్ సమావేశానికి కూడా సీఎం చంద్రబాబు హాజరుకానున్నారు. సెమీకండక్టర్ రంగంలో పెట్టుబడుల అవకాశాలు, సాంకేతిక సహకారం, ఎకోసిస్టమ్ అభివృద్ధి వంటి అంశాలపై ఈ సమావేశంలో చర్చలు జరగనున్నట్లు అధికార వర్గాలు తెలిపాయి.
తర్వాత సుర్బానా జురాంగ్ ప్రతినిధులతో ముఖ్యమంత్రి సమావేశం నిర్వహిస్తారు. పట్టణాభివృద్ధి ప్రణాళికలు, రాజధాని ప్రాంత రూపకల్పన, మౌలిక వసతుల అభివృద్ధి వంటి అంశాలపై సుర్బానా జురాంగ్ సీనియర్ ఎగ్జిక్యూటివ్ డైరెక్టర్లు, నిపుణులతో సీఎం సుదీర్ఘంగా చర్చించనున్నారు. అమరావతి అభివృద్ధి ప్రణాళికలపై కూడా ఈ సమావేశంలో దృష్టి సారించే అవకాశం ఉంది.
మధ్యాహ్నం సమయంలో సింగపూర్ ఉప ప్రధాని, వాణిజ్య-పరిశ్రమల శాఖ మంత్రి Gan Kim Yong, విదేశాంగ శాఖ సహాయ మంత్రి Gan Siow Huang, ఇతర ప్రభుత్వ ఉన్నతాధికారులతో సీఎం చంద్రబాబు నాయుడు భేటీ కానున్నారు. ద్వైపాక్షిక సహకారం, పెట్టుబడుల అవకాశాలు, పారిశ్రామిక రంగంలో భాగస్వామ్యాలపై ఈ సమావేశంలో చర్చలు జరగనున్నట్లు సమాచారం.
వరల్డ్ సిటీస్ సమ్మిట్ ఎగ్జిబిషన్ స్టాళ్లను కూడా ముఖ్యమంత్రి పరిశీలించనున్నారు. సింగపూర్ పెవిలియన్, Google స్టాళ్లను సందర్శించి, అక్కడ ప్రదర్శనకు ఉంచిన సాంకేతికతలు, పట్టణాభివృద్ధి నమూనాలను ఆయన పరిశీలిస్తారు.
సాయంత్రం సమయంలో Seatrium ప్రతినిధులతో సీఎం సమావేశమై పర్యావరణ పరిరక్షణ, గ్రీన్ ఎనర్జీ, మెరైన్ రంగాలపై చర్చిస్తారు. పర్యావరణహిత సాంకేతికతలు, సముద్ర సంబంధిత పరిశ్రమల అభివృద్ధి, హరిత శక్తి వినియోగం వంటి అంశాలు ఈ చర్చల్లో ప్రధానంగా ఉండనున్నాయి.
అనంతరం IHC, CII PS 2026 బిజినెస్ రోడ్‌షోలో ముఖ్యమంత్రి పాల్గొంటారు. ఈ కార్యక్రమంలో ఆంధ్రప్రదేశ్ వ్యాపార ప్రతినిధుల బృందంతో కలిసి పెట్టుబడిదారులతో ముఖాముఖి చర్చలు జరిపి, రాష్ట్రంలో ఉన్న పెట్టుబడి అవకాశాలను వివరించనున్నారు. ఈ రోడ్‌షోతో రెండు రోజుల సింగపూర్ పర్యటన ముగియనుంది.
ముఖ్యమంత్రి పాల్గొనే కార్యక్రమాల్లో మంత్రి నారాయణ, వివిధ శాఖల ఉన్నతాధికారులు కూడా భాగస్వాములు కానున్నారు. రేపు రాత్రి సింగపూర్ నుంచి తిరుగు ప్రయాణం ప్రారంభించి, సీఎం చంద్రబాబు స్వదేశానికి చేరుకోనున్నారు.
