రాయలసీమ న్యూస్, బిజినెస్ డెస్క్: బెంగళూరుకు చెందిన ప్రముఖ జ్యువెలరీ రిటైల్ సంస్థ రాజేశ్ ఎక్స్పోర్ట్స్ లిమిటెడ్‌పై సెక్యూరిటీస్ అండ్ ఎక్స్చేంజ్ బోర్డ్ ఆఫ్ ఇండియా (SEBI) చర్యలు ప్రారంభించడంతో కంపెనీ షేరు ధర బలంగా దెబ్బతింది. ఆర్థిక అవకతవకల ఆరోపణల నేపథ్యంలో సెబీ, రాజేశ్ ఎక్స్‌పోర్ట్స్‌తో పాటు దాని ప్రమోటర్ రాజేశ్ మెహతాను సెక్యూరిటీస్ మార్కెట్ల నుంచి తాత్కాలికంగా నిషేధించింది.
సెబీ నిర్ణయం ప్రభావంతో బుధవారం స్టాక్ మార్కెట్ ట్రేడింగ్ సెషన్‌లో రాజేశ్ ఎక్స్పోర్ట్స్ షేర్లు భారీగా నష్టపోయాయి. కంపెనీ షేరు విలువ 5 శాతం వరకూ పడిపడి లోయర్ సర్క్యూట్‌ను తాకింది. ఫలితంగా షేరు ధర రూ.103.92 స్థాయికి క్షీణించింది.
రాజేశ్ ఎక్స్‌పోర్ట్స్‌పై వచ్చిన ప్రతికూల పరిణామాలు సంబంధిత ఇతర కంపెనీలపై కూడా ప్రతిఫలించాయి. ముఖ్యంగా ఈ సంస్థలో గణనీయమైన వాటాలు కలిగిన ఎల్‌ఐసీ షేర్లు నేటి ట్రేడింగ్‌లో ఒత్తిడికి లోనయ్యాయి. ఒక దశలో ఎల్‌ఐసీ షేరు విలువ 1 శాతానికి పైగా పడిపోయింది.
ఉదయం 11 గంటల సమయానికి నిఫ్టీలో ఎల్‌ఐసీ షేరు విలువ 0.77 శాతం నష్టంతో రూ.399.80 వద్ద ట్రేడ్ అవుతున్నట్లు మార్కెట్ డేటా తెలిపింది. రాజేశ్ ఎక్స్పోర్ట్స్ కంపెనీలో ఎల్‌ఐసీకి 10.80 శాతం వాటాలు ఉండటమే ఈ ఒత్తిడికి ప్రధాన కారణంగా మార్కెట్ విశ్లేషకులు భావిస్తున్నారు.
రాజేశ్ ఎక్స్‌పోర్ట్స్‌పై సెబీ విధించిన తాత్కాలిక నిషేధం ఆ సంస్థ భవిష్యత్ వ్యాపార కార్యకలాపాలపై, అలాగే దాని ప్రమోటర్ రాజేశ్ మెహతా పెట్టుబడి ప్రణాళికలపై ప్రభావం చూపే అవకాశముందని మార్కెట్ వర్గాలు అంచనా వేస్తున్నాయి. ఆర్థిక అవకతవకల ఆరోపణలపై జరుగుతున్న దర్యాప్తు ఫలితాల ఆధారంగా తదుపరి చర్యలు ఉండే అవకాశమున్నట్లు సూచిస్తున్నారు.
రాజేశ్ ఎక్స్‌పోర్ట్స్‌లో గణనీయమైన వాటాలు కలిగిన ఎల్‌ఐసీపై పెట్టుబడిదారులు నిశితంగా దృష్టి పెట్టారు. ఈ పరిణామాల నేపథ్యంలో ఎల్‌ఐసీ పెట్టుబడి వ్యూహం, పోర్ట్‌ఫోలియో నిర్వహణపై కూడా ప్రశ్నలు తలెత్తుతున్నాయి. అయితే, మొత్తం మార్కెట్ దిశ, తదుపరి సెషన్‌లలో రాజేశ్ ఎక్స్పోర్ట్స్, ఎల్‌ఐసీ షేర్ల ప్రవర్తనపై ఆధారపడి ఉండనుందని విశ్లేషకులు చెబుతున్నారు.
రాజేశ్ ఎక్స్పోర్ట్స్ ఏకీకృత ఆదాయంలో 97–99 శాతం విదేశీ అనుబంధ సంస్థల నుంచే వస్తోందని కంపెనీ తెలిపింది. ముఖ్యంగా స్విట్జర్లాండ్ కేంద్రంగా పనిచేసే సంస్థ నుంచే ఈ ఆదాయం వస్తోందని పేర్కొంది. అయితే ఆ అనుబంధ సంస్థల ఆర్థిక లావాదేవీలను కంపెనీ బహిర్గతం చేయకపోవడంతో సెబీ తనిఖీలు చేపట్టింది.
ఈ తనిఖీల్లో కీలక అంశాలు వెలుగులోకి వచ్చినట్లు సెబీ దర్యాప్తు వివరాలు సూచిస్తున్నాయి. స్విట్జర్లాండ్ సంస్థ స్టాండ్‌అలోన్ ఆదాయం చాలా తక్కువగా ఉండగా, రాజేశ్ ఎక్స్పోర్ట్స్ మాత్రం దాన్ని పెంచి చూపించినట్లు సెబీ గుర్తించింది. 2021–2025 ఆర్థిక సంవత్సరాల మధ్య దాదాపు రూ.15.15 లక్షల ఆదాయం సమకూరినట్లు కంపెనీ తప్పుడు ప్రచారం చేసుకుందని సెబీ వెల్లడించింది. ఈ నేపథ్యంలోనే నియంత్రణ సంస్థ తాత్కాలిక నిషేధం సహా రెగ్యులేటరీ చర్యలు చేపట్టింది.
