రాయలసీమ న్యూస్, చిత్తూరు: చిత్తూరు:- జిల్లాలో మామిడి సీజన్‌ ఊపందుకుంది. అందరినీ నోరూరించే మధుర ఫలం మామిడి వ్యాపారం చిత్తూరు మార్కెట్‌ యార్డులో చురుగ్గా సాగుతోంది. ముఖ్యంగా టేబుల్‌ రకాలైన బేనీషా, మల్లిక, కాలేపాడు, హిమామ్‌ పసంద్, తోతాపురి (బెంగళూర లైన్‌)లకు గిరాకీ పెరిగింది. వీటి ధరలు రోజురోజుకూ ఎగబాకుతున్నాయని వ్యాపార వర్గాలు చెబుతున్నాయి.
చిత్తూరు మామిడి కాయల మార్కెట్‌ యార్డులో ఉదయం నుంచే రద్దీగా కనిపిస్తోంది. రైతులు తోటల నుంచి తెచ్చిన కాయలను కూలీలు వర్గీకరించి గ్రేడింగ్‌ చేస్తున్నారు. కవర్లు తొడిగిన బేనీషా కాయలను జాగ్రత్తగా వేరు చేసి, నాణ్యత ఆధారంగా తరగతులు నిర్ణయిస్తున్నారు. టేబుల్‌ రకాల మామిడికి దేశవ్యాప్తంగా డిమాండ్‌ ఉండటంతో, యార్డులో పోటీ వాతావరణం నెలకొంది.
రాజస్థాన్, ఉత్తరప్రదేశ్, దిల్లీ, మహారాష్ట్ర, పంజాబ్, మధ్యప్రదేశ్‌ తదితర రాష్ట్రాల నుంచి ఎగుమతిదారులు, పెద్ద వ్యాపారులు చిత్తూరుకు తరలివస్తున్నారు. ముఖ్యంగా బేనీషా, తోతాపురి లైన్‌ కాయల కొనుగోలులో వీరు పోటీపడుతున్నారు. మంచి నాణ్యత గల కాయలకు అధిక ధరలు చెల్లించేందుకు ముందుకు వస్తున్నారని స్థానిక మండీల యజమానులు వెల్లడిస్తున్నారు.
మండీల యజమానుల సమాచారం ప్రకారం రోజుకు సుమారు 1,200 టన్నుల బేనీషా కాయలు ఇతర రాష్ట్రాలకు ఎగుమతి అవుతున్నాయి. ఈ రకం కాయలు యార్డుకు తక్కువగా రావడం వల్ల సరఫరా తగ్గింది. దీంతో రాబోయే వారం రోజుల్లో బేనీషా ధరలు మరింత పెరిగే అవకాశం ఉందని వారు అంచనా వేస్తున్నారు.
వ్యాపారులు రైతులకు పక్వానికి వచ్చిన కాయలనే కోసి మార్కెట్‌కు తీసుకురావాలని సూచిస్తున్నారు. పండిన, సరైన పరిమాణం, రంగు, ఆకారంతో ఉన్న కాయలకు మంచి ధర లభిస్తోందని చెబుతున్నారు. ఈ ఏడాది మామిడి కాయల నాణ్యతను బట్టి ధరలు నిర్ణయించబడుతున్నాయని, బేనీషా కాయ నాణ్యత మెరుగ్గా ఉంటే ఎలాంటి వెనుకంజ లేకుండా మంచి ధర చెల్లిస్తున్నట్లు వ్యాపార వర్గాలు పేర్కొంటున్నాయి.
చిత్తూరు జిల్లాలో మామిడి సాగు విస్తీర్ణం ఎక్కువగా ఉండటంతో ప్రతి ఏడాది ఇక్కడి మార్కెట్‌ యార్డు దేశవ్యాప్తంగా వ్యాపారులను ఆకర్షిస్తుంది. ఈసారి టేబుల్‌ రకాలపై డిమాండ్‌ పెరగడం, సరఫరా కొంత తగ్గడం వల్ల ధరలు ఎగిసిపడుతున్నాయని రైతులు, వ్యాపారులు భావిస్తున్నారు. సీజన్‌ మరికొన్ని వారాలు కొనసాగనుండటంతో మామిడి మార్కెట్‌ ధరల మార్పుపై అందరి దృష్టి నిలిచింది.
