రాయలసీమ న్యూస్, చిత్తూరు:
చిత్తూరు జడ్పీ సమావేశాలకు తిరుపతి అధికారుల గైర్హాజరు
చిత్తూరు జిల్లా పరిషత్‌ సర్వసభ్య, స్థాయీ సంఘ సమావేశాలకు తిరుపతి, అన్నమయ్య జిల్లాల ఉన్నతాధికారులు హాజరుకావడం లేదని జడ్పీటీసీ సభ్యులు ఆగ్రహం వ్యక్తం చేశారు. చిత్తూరు జడ్పీ కొత్త సమావేశ మందిరంలో శనివారం నిర్వహించిన స్థాయీ సంఘ సమావేశాల్లో ఈ అంశంపై సభ్యులు తీవ్ర అసంతృప్తి వ్యక్తం చేశారు.
జిల్లా పరిషత్‌ స్థాయీ సంఘ సమావేశాలకు తిరుపతి, అన్నమయ్య జిల్లాల స్థాయి అధికారులు రావడం లేదని, అక్కడ జడ్పీటీసీ సభ్యులను పట్టించుకోవడం లేదని సభ్యులు ఆరోపించారు. క్షేత్రస్థాయికి జిల్లా ఉన్నతాధికారులు వచ్చినా, మండల కార్యాలయాలకు వెళ్లినా ప్రజాప్రతినిధులను పిలిపించి మాట్లాడాల్సిన అవసరం ఉందని, కానీ అలాంటి పద్ధతి కనిపించడం లేదని వారు మండిపడ్డారు.
తిరుపతి జిల్లాకు చెందిన ఉన్నతాధికారులు ఈ సమావేశాలకు హాజరుకాకపోవడంతో నిరసనగా సమావేశం నుంచి వాకౌట్‌ చేస్తున్నట్లు నారాయణవనం జడ్పీటీసీ సభ్యుడు సుమన్‌ తెలిపారు. స్థానిక జడ్పీ కొత్త సమావేశ మందిరంలో జడ్పీ ఛైర్మన్‌ శ్రీనివాసులు అధ్యక్షతన ఒకటి, రెండు, ఏడు స్థాయీ సంఘ సమావేశాలు జరిగాయి. పాత సమావేశ మందిరంలో మూడు, ఆరు స్థాయీ సంఘ సమావేశాలకు వైస్‌ ఛైర్మన్‌ ధనంజయరెడ్డి అధ్యక్షత వహించగా, ఐదో స్థాయీ సంఘ సమావేశాన్ని తవణంపల్లె జడ్పీటీసీ సభ్యురాలు భారతి అధ్యక్షతన నిర్వహించారు.
సుమన్‌ మాట్లాడుతూ మండలంలోని పొంగూరులో గ్రామీణ జలవనరుల శాఖకు సంబంధించిన పనుల కోసం జడ్పీ సాధారణ నిధుల నుంచి రూ.2.30 లక్షలు విడుదల కాగా, రూ.1.90 లక్షలకే బిల్లులు పెట్టారని ఆరోపించారు.
వడమాలపేట జడ్పీటీసీ సభ్యుడు స్వర్ణ సచివాలయాల్లో ఉద్యోగులు సమయపాలన పాటించడం లేదని సమావేశ దృష్టికి తీసుకువచ్చారు. అన్ని రంగాల్లో చిత్తూరు జిల్లాలో కనిపిస్తున్న అభివృద్ధి వేగం తిరుపతి జిల్లాలో కనిపించడం లేదని ఆయన వాపోయారు. పీలేరు–యలమంద రహదారిపై కేబుల్స్‌ కోసం తవ్విన గుంతలను వెంటనే పూడ్చాలని ఆయన కోరారు.
సమావేశంలో జడ్పీ సీఈవో రవికుమార్‌నాయుడు, డిప్యూటీ సీఈవో వెంకటనారాయణ, వివిధ శాఖల అధికారులు, జడ్పీటీసీ సభ్యులు పాల్గొన్నారు. అధికారులు, ప్రజాప్రతినిధుల మధ్య సమన్వయం లోపిస్తే అభివృద్ధి కార్యక్రమాలు దెబ్బతింటాయని సభ్యులు అభిప్రాయపడ్డారు. తిరుపతి, అన్నమయ్య జిల్లాల ఉన్నతాధికారులు కూడా చిత్తూరు మాదిరిగా వేగం చూపించి, జడ్పీ వ్యవస్థను గౌరవించేలా చర్యలు తీసుకోవాలని వారు సూచించారు.
